VaHebuli 12 - ULufingwi uLupwaKulandata ishiholanyo isha Yeesu 1 Ishi, mwe pe tuzyunguliilwe ni mpuga impiti iya vhahoome inza vhwevhulo, niiswe vhweleele tuvwefwe vwonti vwe vikutudindila mu lwitiho, nu kuvhuleha uvhutalamalandu vhwe vhutakuhaavha kutugwisya. Havhili tuyikungulaje kuvhomba zye uMulungu azivhiisile pilongolela lyitu, inza umuntu vwe akushimbila uluvhilo ku mute mu lutumvanyo. 2 Tuvhombaje vhwevhulo, uku tukumwenyeelezya uYeesu we átalisiizye idala ilya kuuti iswe tumwitihaje uMulungu, havhili we akuutupa umwoyo kuuti tujendelelaje kumwitiha kufishila ku vhusililishilo. Havhili ávhujimbiliiye uvhufwe pa shihovhenkanyo ishisita kusaajila kulola insoni, kuzya luseshelo lwe lwávhisiilwe pilongolela lyakwe. Ishi atendiime uluvhazu ulwa kundiilo ulwa shitengo isha vhumwene isha Mulungu, pa vhushindamu uvhupiti nkaani. 3 Musivhiilile zye zyámwazile uYeesu, na vwe ahajimbililaga ku ziila zye avhatalamalandu vhahamudindaga, inga mutahinze mulite nu kuvunziha umwoyo. 4 Pooka nu kuuti mukulwa ku mute kuvhupoota uvhutalamalandu, ileelo mutaluuye uvhulugu uvhwo kufishila kwita amavhanda giinyu. 5 Vhuli, muluviilwe insoshi ziila zye uMulungu ahavhasohaga imwe mwe vhaana vhaakwe lwe akuvhagomwa amooyo? Yeenya, uMulungu áyanzile átili, “We mwana waane, tejeelezya! Utasufwaje lwe uMWENE uMulungu akuukupa isunde kukusoha, havhili utafwanje umwoyo lwe akukupilila paala pe ukuteega. 6 UMWENE uMulungu akuumupa isunde umuntu wonti we amukunzite. Havhili akuumupa isunde umuntu wonti we akumwitiha kuuti mwana waakwe.” 7 Ishi mujimbililaje lwe uMulungu akuvhasunda. Akuvhomba vhwevhulo, mwe pe mwe vhaana vhaakwe. Ataliipo umwana we atakusundwa nu yise waakwe. 8 UMulungu akuuvhapa isunde avhaana vhaakwe vhonti. Inga uMulungu atakuuvhapa isunde, mumanye kuuti, imwe te mwe vhaana vhaakwe avha nalyoli. 9 Inga tuhavhashindihaga avhataata vhiitu avha mu nsi umu vhe vhahatusundaga, vhuli, tutakwanzilwa kumushindiha nkaani uMulungu uTaata wiitu uwa ku mwanya, inga tuvhe nu vhulanzi uvhwa shiima? 10 Avhataata vhiitu avha mu nsi umu vhakutusunda ku havhaliilizyo hansi kulandatana na vwe avheene vhakulola kuuti hinza. Ileelo uMulungu akutusunda kwi ilonka lyitu, inga tuvhe nu vhuliilani nawo mu vhufinjile vhwakwe. 11 Ataliipo umuntu we akuseshela lwe akusundwa, vhonti vhakuswimiililwa. Ileelo vhaala vhe kusundwa kwavho kuvhavhiisile kuuti vhaluvhaalile kuvha nu lujendo ulwinza, vhakuvhomba ingolosu pilongolela ilya Mulungu nu kuvha nu vhutehamu. 12 Kuli izyo, mugomwe inyoovhe zyinyu injeyevhazu ni vinama vwinyu vwe vitozosile, inga musimpe ahinza. 13 Mujendaje mu madala amagolosu, inga vhe vhali ni vinama vwe vilemaaye vhatahavwalale, nkandi vhapone. Insoshi ku vhiitisi 14 Mwe vhamwitu, mukanyilaje kulandila ku vhutehamu na vhantu vhonti. Havhili mukanyilaje kuvha mwe vhafinjile mu vhulanzi vhwinyu, mwe pe ataliipo umuntu we angamulola uMWENE uMulungu ishisita kuvha mufinjile. 15 Muvhanje minso, atahaavhe umuntu inga wooka uwa kusovhelwa uvhwila uvhwa Mulungu. Atahaavhe umuntu we ali ngati lizi ihali. Umuntu inza uyo akutamwa nu kugahandamanya amooyo aga vhantu avhinji. 16 Muvhanje minso, inga atahaavhe umuntu we mulugusu, poosye we atakumushindiha uMulungu inza uEesavhu. Uweene ákaziizye uvhupwano vhwakwe uvhwa kuvha wu hatoote ku shaakulya isha kulya lwoka vhweleele. 17 Niimwe mumanyile kuuti pisinda lwe uEesavhu akwanza kuuti aposheele uvhuloote uvhwo, uyise áhaanile kumuloota. Pooka nu kuuti uEesavhu ákuusite nkaani, uyise atámuloosite, mwe pe uEesavhu atáhaazile ahavhaliilizyo aha kutonta. 18 Imwe mutafisile pi igamba inza igamba uSinaayi lye avhantu vhangalifishila. Mutafisile pi igamba inza ilyo lye lihaahaga umwoto, lye lyáli ni shiisi ishipiti ni nkungu impiti. 19 Havhili mutafisile pe aVhaisilayeeli vhívuuye amasaji gakukuuta ni izwi ipiti ilya Mulungu. Lwe vhiivwa izwi ilyo vhógofile nkaani, vhahamulambiilizya uMoose kuuti uMulungu atayangaje navho havhili. 20 Yeenya, uMulungu álajiziizye átili, “Poosye shivhe shihanu, poosye muntu, we alilema igamba ili akwanzilwa ahomwe na mavhwe kufishila kufwa.” Lwe vhiivwa izyo, vhahoogopa nkaani. 21 Zyonti zye zyáfumiiye pi igamba uSinaayi zyávhogofwizye nkaani avhantu, nu Moose ahayanga ahati, “Natetema nkaani, mwe pe noogopa.” 22 Ileelo imwe mwafiha pi igamba uSayuuni, pa nkaaya iya Yelusaleemu iya ku mwanya. Inkaaya iyo nkaaya iya Mulungu uMulanzi. Apenepo, vhavhungiine ku luseshelo avhahavhizya amashumi na mashumi. 23 Imwe mufisile pa luhomaano ulupiti ulwa vhiitisi vhonti vhe uMulungu akuvhiita kuvha vhaana vhaakwe avhahatoote. Avhiitisi ivho, amazina gaavho gasimviilwe ku mwanya. Mufisile pilongolela ilya Mulungu we Mulonzi uwa vhantu vhonti na pilongolela ilya vhantu avhagolosu vhe uMulungu ahavhazelufwa. 24 Mufisile kwa Yeesu we akuvhakundanya avhantu nu Mulungu mu lufingwi ulupwa. Amavhanda gaakwe ge gítisile pa shihovhenkanyo kuzya vhutalamalandu vhwitu te gakulanduzya inza aga Aabeli. 25 Kuli izyo, mumutejelezyaje we akuvhasoha, mwe pe uMulungu ávhapiiye isunde ipiti avhataata vhiitu vhe vhahahaanaga kumutejeelezya uMoose lwe akuvhasoha. Nalyoli iswe tulisundwa nkaani kuluusya avheene, inga tukuhaana kumutejeelezya we akutusoha kufuma ku mwanya. 26 Ahavhaliilizyo haala he aVhaisilayeeli vhívuuye lwe uMulungu akuyanga pi igamba uSinaayi, insi yonti yáyingiine. Ileelo ishi afinzile kuuti, “Ndiyiyinzaanya insi havhili, te nkayiyinzaanye ye nsi yeeka, nkandi ndiyiyinzaanya ni mwanya vhweleele.” 27 Izwi ilyo lye likuti, “havhili,” likulolesya apazelu kuuti, ivintu vwonti vwe uMulungu ahavipela mu nsi viliyingaana nu kuvwefwa, inga visyale viila vwe vitangayingaana. 28 Kuli izyo, tumusalifwaje uMulungu, mwe pe atwitisile kuuti tuvhanje mu vhumwene vhwakwe vhwe vhutakuyingaana. Ishi tumupuutaje uMulungu kwi idala lye likumuhondezya nu kuvha nu vhwahayiisye nu kumunyila. 29 Nkuyanga vhwevhulo, mwe pe uMulungu wiitu ali ngati mwoto umuhali, we wukupemba nu kulovwa nziila! |
© 2021 Wycliffe Bible Translators, Inc.
Wycliffe Bible Translators, Inc.