VaHebuli 11 - ULufingwi uLupwa

Amaha aga lwitiho ulwa vhantu avha hali

¹ Kumwitiha uMulungu kwe kuvha nu vhwanalyoli kuuti ziila zye tukuzisuuvhila zilivhombeha. Havhili kwe kwitiha kuuti ziila zye tutakuzilola ishi zya nalyoli.

² Kwi idala ilyo ilya kumwitiha uMulungu, avhataata vhiitu vhámuhondeziizye nkaani uMulungu.

³ Kwi idala ilya kwitiha, iswe tumanyile kuuti uMulungu ápezile imwanya ni nsi kwi idala ilya izwi lyakwe. Havhili tumanyile kuuti ivintu vwonti vwe vikuloleha atávipezile kufuma ku vintu vwe vikuloleha.

⁴ Mwe pe uAabeli ámwitisile uMulungu, ámufumwiziizye uMulungu impuutile inyinza kuluusya umukulu waakwe uKaayini. Kuzya kwitiha kwakwe, uMulungu ámuvhaziizye uAabeli kuuti muntu umugolosu. UMulungu áposheleeye impuutile yaakwe, pooka nu kuuti uAabeli ahafwa, ulwitiho lwakwe lukujendeelela kuvha shiholanyo ishinza isha iswe kushilandata poosye ileelo.

⁵ Mwe pe uEenoki ámwitisile uMulungu, uMulungu ámunyatuuye uEenoki kusogola ku mwanya ishisita kufwa. Atálolesile havhili, mwe pe uMulungu ámunyatuuye. Yeenya, uVhusimbe uVhufinjile vhukuhomeshezya kuuti lwe uMulungu ashiili kumunyatula, uEenoki ahavhombaga zye zihondeeye pilongolela ilya Mulungu.

⁶ Ataliipo umuntu we angamuhondezya uMulungu ishisita ulwitiho. Umuntu wonti we akwanza kumupuuta uMulungu, akwanzilwa kwitiha kuuti uMulungu aliipo nu kuuti aliivhapa ivipeelwa vhaala vhe vhakulondola kumumanya.

⁷ Mwe pe uNoowa ámwitisile uMulungu, ámushindisile uMulungu lwe amusoha ku zye zyáshiili kufumila. Pe ahagomba imbogooso, inga uMulungu amuposhe uweene pooka na vhantu avha mu nyumba yaakwe. Kwi idala ilyo, ávhalonzile avhantu avha mu nsi vhe vhatámwitisile uMulungu. Kuli izyo, uMulungu ahamuvhaazya uNoowa kuuti muntu umugolosu pilongolela lyakwe.

⁸ Mwe pe uAabulahamu ámwitisile uMulungu, lwe uMulungu amuvhuuzya kuuti ayeepe mu nsi yaakwe nu kusogola mu nsi ye uMulungu áfinzile kuumupa, uAabulahamu áyeefile mu nsi iyo pooka nu kuuti atámanyile kwe ahasogolaga.

⁹ Havhili, mwe pe uAabulahamu ámwitisile uMulungu, álandiiye fwe mujeni mu nsi iyo. Ahalandilaga mu maheema inza vwe vhoope avha Yisaaka nu Yaakobu vhálandiiye pilongolela. Vhoope vhweleele vháposheleeye ulufingwi lweluula ulwa nsi inza vwe uAabulahamu áposheleeye.

¹⁰ UAabulahamu ávhomvile vhwevhulo, mwe pe ahasuvhilaga kulandila mu nkaaya ye yili nu lwalo ulugomu lwe lutakunanjiha naalumo. Inkaaya iyo wu Mulungu wuuyo áyisengiinye nu kuyizenga.

¹¹ Mwe pe uSaala umushi wa Aabulahamu ámwitisile uMulungu, uMulungu ámupiiye uSaala amaha aga kuvha nu vhumwamu nu kupaapa umwana, pooka nu kuuti uSaala áamile mugumba havhili áamile mugoosi. USaala ahitihaga kuuti uMulungu mutungamu havhili akuvhomba ziila zye afinzile.

¹² Kuli izyo, kwi idala ilya muntu wooka uAabulahamu we áamile mugoosi nkaani, vhápafwilwe avhantu avhinji nkaani vhe nuumo atangavhaazya inza inzota, poosye inza ulusenga ulwa mu luvhazu mwa sumbi.

¹³ Avhantu ivho vhonti vháfuuye she vhakwitiha kuuti uMulungu aliivhapa vwonti vwe áfinzile kuuvhapa. Vhatáposheleeye vwe uMulungu áfinzile kuuvhapa, ileelo vhahavilolaga ukutali nu kudovhela. Avheene vhahitihaga kuuti vhajeni havhili vhantu vhe vhakutuuha vhweleele mu nsi.

¹⁴ Avhantu vhe vhakwitiha izyo vhakulolesya apazelu kuuti vhakuyilondola insi yaavho vhuuvho.

¹⁵ Inga vhahasiivhaga izya nsi yaavho iya hali kwe vháfumile, pe nkandi vhágalusile kusogola ku mwavho.

¹⁶ Ileelo avhantu ivho vhahayinyonywaga insi inyinza nkaani iya ku mwanya. Ye nongwa uMulungu atakulola insoni inga avhantu ivho vhakumwita kuuti wu Mulungu waavho, mwe pe avhasenganiziinye inkaaya.

¹⁷ Mwe pe uAabulahamu ámwitisile uMulungu, ámufumwizye umwana waakwe uYisaaka kuvha mpuutile lwe uMulungu amulinga. UAabulahamu we áposheleeye ulufingwi kufuma kwa Mulungu, ileelo áyitisile kumufumwa umwana waakwe imozi

¹⁸ pooka nu kuuti uMulungu ápezile amuvhuziizye uAabulahamu atili, “Avhaana avha mu luho lwaho vhaliifuma mu mpaapo izya Yisaaka.”

¹⁹ UAabulahamu ahitihaga kuuti uMulungu angamuzyusya uYisaaka. Kwi idala ilyo, uAabulahamu ámuposheleeye havhili uYisaaka we áamile ngati afuuye nu kuvha mulanzi havhili.

²⁰ Mwe pe uYisaaka ámwitisile uMulungu, ávhaloosite avhaana vhaakwe, uYaakobu nu Eesavhu ku ziila zye zilifumila kwilongolela.

²¹ Mwe pe uYaakobu ámwitisile uMulungu, lwe apalamila kufwa, ávhaloosite avhaana vhavhili avha Yoosefu, nu kumupuuta uMulungu she ayegamiiye indoogo yaakwe.

²² Mwe pe uYoosefu ámwitisile uMulungu, lwe apalamila kufwa, áyanzile izya Vhaisilayeeli kufuma mu nsi iya Miisili. Havhili ávhalajiziizye kuuti vhahanyatule amafupa gaakwe nu kusogola nago kugasyila mu nsi iya Kanaani.

²³ Mwe pe avhapaafi avha Moose vhámwitisile uMulungu, vhámuzyisile uMoose lwe apaapwa ku havhaliilizyo aha meezi gatatu. Vhávhomvile vhwevhulo, mwe pe uMoose ápafwilwe mwinza, vhatógofile kuluhaana ululajizyo ulwa mwene uwa ku Miisili ulwa kuvhagoga avhaana vhonti avhanaavuli aVhaisilayeeli.

²⁴ Mwe pe uMoose ámwitisile uMulungu, áhaanile kuuti uweene mwana wa samwene uwa Falaawo, umwene uwa nsi iya Miisili.

²⁵ Uweene ásavhuuye kuyimba pooka na vhantu vha Mulungu kuluusya kuseshela mu vhutalamalandu ku havhaliilizyo hansi.

²⁶ UMoose ávhwenyi kuuti kuyimvilwa kuzya Chilisiti lilonka nkaani kuluusya uvhwinza nu vhudumbwe uvhwa mu nsi iya Miisili. Ávhomvile vhwevhulo, mwe pe ahasuvhilaga ishipeelwa she uMulungu aliimupa insiku izya kwilongolela.

²⁷ Mwe pe uMoose ámwitisile uMulungu, áyeefile mu nsi iya Miisili ishisita kwogopa uvhuhalazu uvhwa mwene uwa mu nsi iyo. Uweene ájimbiliiye, mwe pe áamile ngati amuvhwenyi uMulungu we atakuloleha na minso.

²⁸ Mwe pe uMoose ámwitisile uMulungu, ávhiisile ishikulukuulu isha Pasaaka nu kuvhalajizya aVhaisilayeeli kuuti vhapashe amavhanda aga hagonzi mu mapampa aga malyango aga nyumba zyavho, inga lwe uhavhizya uwa kulovwa akutuuha, atahinze avhalovwe na vhaana vhaavho avhahatoote.

²⁹ Mwe pe aVhaisilayeeli vhámwitisile uMulungu, vhálamvile usumbi uwa Shaamu ulwa pansi inza vwe avhantu vhakujenda pa nsi inyuumu. Ileelo lwe vhoope aVhamiisili vhakulamba, usumbi ahavhamila, vhahafwa vhonti.

³⁰ Mwe pe aVhaisilayeeli vhámwitisile uMulungu, vháluzyunguluuye ulupitu ulupiti ulwa nkaaya iya Yeeliko insiku 7, lwope luhagwa.

³¹ Mwe pe uLaahabu we áamile wu malaaya ámwitisile uMulungu, áponile kumugoga inza avhanji vhe vháhaanile kumwitiha uMulungu. Uweene áponile kumugoga, mwe pe ávhaposheleeye ahinza avhahapenza aVhaisilayeeli.

³² Mwe vhamwitu, ishi injanje ishooni havhili? Yeenya, ntali na havhaliilizyo aha kukwilana kulondovhola izya lwitiho ulwa Gidiyooni nu Balaaka nu Samusooni nu Yeefuta nu Daavhudi nu Saamweli na vhakuvhwi avhanji.

³³ Mwe pe avhantu ivho vhámwitisile uMulungu, vhahapootaga uvhulugu vhwe vhahalwanga na vhamwene avha mu nsi izinji. Vhahakonzyaga ku vhugolosu nu kuposheela ziila zye uMulungu áfinzile kuuvhapa. Havhili vhamo vháamile na maha aga kudindila amalomu aga nsama, inga zitahavhavwalazye.

³⁴ Havhili, mwe pe vhahamwitihaga uMulungu, vhahazimanyaaga umwoto umuhali na vhalugu vhaavho vhahapotwaga kuvhagoga. Vháali vhayeyevhazu, ileelo uMulungu ávhapiiye amaha aga kupoota uvhulugu nu kuvhashimbizya avhasikaali vhe vhahafumaga mu nsi izinji.

³⁵ Mwe pe avhantanda vhamo vhámwitisile uMulungu, vhávhaposheleeye avhajenzi vhaavho vhe vhápezile vhafuuye lwe vhazyuha. Vhamo vháhaanile kuuti vhavhavhiishe kuvha vhasatushe, mwe pe vhávhwenyi kuuti hinza kuyimvilwa nu kuvhagoga kuluusya kumuleha uMulungu. Vhávhomvile vhwevhulo, inga uMulungu avhazyusye nu kuuvhapa uvhulanzi uvhwinza nkaani.

³⁶ Vhamo vhahavhasupizyaga nu kuvhahoma nu muchaapu. Vhamo vhahavhakungaga na manyoloolo nu kuvhatwala mu jeela.

³⁷ Havhili vhamo vhahavhahomaga na mavhwe kufishila kufwa, vhamo vhahavhavholanyaaga na masumeeno na vhamwavho vhahavhagogaga na mapanga. Vhamo vháali vhapiina, vhahazwalaga amakwembe aga ngʼonzi na ga mbuzi, vhahavhayimvwaga nu kuvhavhombela imbiivhi inyinji.

³⁸ Avhantu ivho vhaheleelaga mu luugwa na mu magamba, vhahalandilaga mu mashembo na mu machele. Vháali vhantu vhinza nkaani, ni nsi yitáhondeeye kuuti avhantu ivho vhalandilaje muumwo.

³⁹ Pooka nu kuuti avhantu vhonti ivho vhe tukuvhayanga vhahamwitihaga uMulungu, atáliipo inga wooka we áposheleeye zye uMulungu áfinzile.

⁴⁰ UMulungu ávhomvile vhwevhulo, mwe pe ápezile alongoleeye kutusenganizanya inyinza nkaani, inga avheene vhatahaapelwe kuvha vhalunjisu ishisita iswe.