VaHebuli 10 - ULufingwi uLupwa1 Indajizyo izya Moose shiholanyo isha nyinza zye zikwinza. Ye nongwa zyope impuutile zye avhantu vhakufumwa amaaha gonti kulandatana ni ndajizyo izyo, zitangavhavhiiha kuvha vhalunjisu naalumo avhantu vhe vhakumupuuta uMulungu. 2 Inga uMulungu nalyoli ahavhazelufwaga uvhutalamalandu vhwavho avhantu ivho vhe vhahamupuutaga kwi idala ilya kulandata indajizyo, nkandi vhatahajendelelaga kuyilola mu mooyo gaavho kuuti vhatalamalandu. Havhili, nkandi vhálesile kufumwa impuutile zyavho, mwe pe uMulungu, nkandi avhazelufwizye lwoka vhweleele. 3 Ileelo impuutile izyo zye vhahafumwaga amaaha gonti zihavhakumbusyaga uvhutalamalandu vhwavho, 4 mwe pe amavhanda aga nkambaku na ga saawe gatangeefwa uvhutalamalandu inga hansi. 5 Ye nongwa lwe uChilisiti ayinza mu nsi umu, ámuvhuziizye uMulungu átili, “Iwe utakwanza impuutile izya vihanu, poosye impuutile izyamwavho izinji, ileelo umuvhili waane uvhusengiinye. 6 Iwe utázisungwilwe impuutile izya kulungulizya, poosye impuutile zye avhantu vhahazifumwaga kuzya vhutalamalandu. 7 Pe nkati, ‘We Mulungu! Ishi ine ninzile inga mbombe ulukasamo lwaho, inza vwe yisimviilwe mu Vhusimbe uVhufinjile ku zyane.’” 8 Ilya kwanda ámuvhuziizye uMulungu átili, “Iwe utakwanza impuutile izya vihanu ni zya kulungulizya, ni zya vhutalamalandu, ni zyamwavho izinji,” pooka nu kuuti impuutile zyonti izyo vhahazifumwaga kulandatana ni ndajizyo izya Moose. 9 Ilya vhuvhili ámuvhuziizye átili, “We Mulungu! Ishi ine ninzile, inga mbombe ulukasamo lwaho.” Kuli izyo, uMulungu aheefwa ulufingwi ulwa kwanda nu kuluvhiiha ulufingwi ulwa vhuvhili. 10 Mwe pe uYeesu ahalulandataga ulukasamo ulwa Mulungu, uMulungu akutuzelufwa uvhutalamalandu vhwitu kwi idala ilya Yeesu Chilisiti kuyifumwa lwoka vhweleele kuvha mpuutile. 11 Kulandatana nu lufingwi ulwa hali, insiku zyonti, avhapuuti vhonti avha Vhayuuda vhahamuvhombelaga uMulungu nu kufumwa impuutile zyeziila ulwinji zye zitangeefwa uvhutalamalandu inga hansi. 12 Ileelo uChilisiti áyifumwizye lwoka vhweleele kuvha mpuutile, inga atuzelufwe uvhutalamalandu vhwitu. Uweene we mpuutile iya shiima. Kuli izyo, atendiime uluvhazu ulwa nyoovhe iya kundiilo iya Mulungu pa vhushindamu uvhupiti nkaani. 13 Uweene ali ku mwanya ukwo kwe akujendeelela kuguliilila kufishila pe uMulungu avhavhiiha avhalugu vhaakwe pansi pa vinama vwakwe. 14 Kwi idala ilya Yeesu kuyifumwa lwoka vhweleele, avhazelufwizye avhantu vhaakwe shiima. 15 Woope uMupepo uMufinjile akuhomeshezya kuuti inongwa izi zya nalyoli lwe akuti, 16 “UMWENE uMulungu áyanzile átili, ‘Ulu lwe lufingwi ulupwa lwe ndiluvhiiha na vhantu vhaane insiku izyo zye zikwinza. Ndivhiiha indajizyo zyane mu mooyo gaavho nu kuzisimba mu njeele zyavho.’” 17 Havhili akuyanga akuti, “Te nkavhukumbushe havhili uvhutalamalandu vhwavho, poosye imbombo zyavho imbiivhi.” 18 Ishi inga uMulungu avhaswila avhantu uvhutalamalandu, yitakwanzilwa kufumwa impuutile izya vhutalamalandu havhili. Avhiitisi vhali nu vhusatushe kusogola pilongolela ilya Mulungu 19 Mwe vhamwitu, kwi idala ilya mavhanda aga Yeesu, iswe tuli nu vhusatushe kwinjila aPafinjile pa Pafinjile ku vhudandamazu. 20 Kwi idala ilya vhufwe vhwakwe, uweene átwiguliiye idala ipwa ilya vhulanzi, inga twinjilaje pilongolela ilya Mulungu kutuushila pa mwenda we wukudinda aPafinjile pa Pafinjile, kwe kuuti kutuushila umuvhili waakwe. 21 Iswe tuli nawo umupuuti umupiti we mwimiilizi uwa vhantu avha mu nyumba ya Mulungu. 22 Kuli izyo, tusogolaje pilongolela ilya Mulungu na mooyo aminza ge nalyoli gakumwitiha, mwe pe uMulungu atuzelufwizye amooyo giitu amavhiivhi kwi idala ilya mavhanda aga Yeesu nu kugazelufwa amavhili giitu na minzi amazelu. 23 Ishi pe tulemeelele nziila ulwitiho ulwo lwe tukulwitiha, mwe pe uweene we áfinzile mutungamu. 24 Havhili tukwanzilwa tusajilanaje nu kugomanya amooyo nu kukundana nu kuvhombelana inyinza. 25 Tutahagaleshe amaata giitu aga kuhomaana inza vwe avhantu avhanji vhalesile kuhomaana. Ileelo tujendeelele kugomanya amooyo, mwe pe tumanyile kuuti isiku ilya kugaluha uMwene uYeesu lipalamiiye. 26 Inga tukujendeelela kuvhomba uvhutalamalandu umwenzo she tuvhumanyile uvhwanalyoli uvhwa Mulungu, kutali impuutile iyamwavho ye yingatuzelufwa uvhutalamalandu. 27 Ileelo kukusyala kwe kuguliilila uvhulonzi uvhwa Mulungu vhwe vhukwogofwa nu mwoto we wulivhalovwa avhantu vhonti vhe vhakumuhaana uMulungu. 28 Umuntu wonti we ahahaanaga kuzilandata indajizyo izya Moose, vhahamugogaga ishisita uvhwila lwe avhahoome vhavhili, poosye vhatatu vhahomeshezya kuuti nalyoli avhomvile vhwevhulo. 29 Ishi sivhiliili umuntu we akumusuufwa uMwana wa Mulungu. Isunde lyakwe liliivha vhuli? Havhili, yiliivha vhuli kwa ula we amavhanda aga lufingwi ulwa Mulungu gamuzelufwizye, ileelo uweene akugalola te shintu? Havhili, yiliivha vhuli kwa ula we akumusaamula uMupepo uwa Mulungu we akuvhafwila uvhwila avhantu vhaakwe? Nalyoli isunde lyavho ivho liliivha lipiti, havhili lihali nkaani. 30 Yeenya, tumanyile kuuti uMulungu áyanzile átili, “Kulanduzya mbombo yaane, ine ndilanduzya.” Havhili áyanzile átili, “UMWENE uMulungu alivhalonga avhantu vhaakwe ku vhugolosu.” 31 Nalyoli yikwogofwa nkaani kupeelwa isunde nu Mulungu uMulanzi. 32 Ileelo mukumbushe ahavhaliilizyo haala aha ku vhwandilo, lwe mwamwitiha uChilisiti. Pooka nu kuuti muhayimvilwaga nkaani, muhajimbililaga amayimba igo. 33 Ahavhaliilizyo hamo muhayimvilwaga nu kuligwa pilongolela ilya vhantu avhinji. Havhili muhavhasajilaga nu kuvhaavwa vhaala vhoope vhe vhahayimvilwaga inza vhwevhulo. 34 Havhili muhavhafwilaga uvhwila avhamwinyu vhe vhákunziilwe mu jeela. Havhili lwe vhavhafwula ivwuma vwinyu, muhaseshelaga mu mooyo giinyu, mwe pe mwámanyile kuuti muli ni vintu ivwinza nkaani vwe vitakusila naalumo. 35 Kuli izyo, muvhanje nu vhudandamazu, mwe pe muliposheela ishipeelwa ishipiti nkaani kufuma kwa Mulungu. 36 Yeenya, mukwanzilwa kujimbiilila kuvhomba ulukasamo ulwa Mulungu, inga muhaposheele ziila zye uMulungu áfinzile kuuvhapa. 37 Yeenya, yisimviilwe mu Vhusimbe uVhufinjile kuuti, “Hasyaye ahavhaliilizyo hansi nkaani, uyo we akwinza, kwe ayinze, havhili te ahaavhe. 38 Umuntu we akuvha nu vhulanzi, we wula we akuvhaazilwa kuuti mugolosu kwi idala ilya kumwitiha uMulungu. Ileelo umuntu uyo inga akusisinta kundandata, ntakuhondezelwa nawo.” 39 Ileelo iswe tutali inza avhantu ivho vhe vhakusisinta nu kuteega, nkandi tuli pooka na vhaala vhe vhakumwitiha. Kwi idala ilyo, tupokwilwe. |
© 2021 Wycliffe Bible Translators, Inc.
Wycliffe Bible Translators, Inc.