VaGalati 1 - ULufingwi uLupwa

Umulaamu

¹ Ukalaata uno nsimvile neene ne Paavhuli ne mutumwa. Ine ntátumiilwe na vhantu, poosye kusaavhulwa nu muntu wonti, nátumiilwe nu Yeesu Chilisiti, nu Taata uMulungu we ámuzyusiizye uYeesu.

² Ine na vhamwitu vhonti vhe vhali pooka niine, tukuvhalamuha imwe, mwe vha mu vivhanza ivwa Mulungu ivwa mu shigavho isha nsi isha Galaatiya.

³ UTaata wiitu uMulungu, nu Mwene uYeesu Chilisiti, vhavhafwilaje uvhwila nu kuuvhapa uvhutehamu.

⁴ UChilisiti áyifumwizye kufwa kuzya kwefwa uvhutalamalandu vhwitu, inga atuposhe kufuma mu mbiivhi zyonti izya mu nsi iya havhaliilizyo iha, inza vwe ákasiime uTaata wiitu uMulungu.

⁵ UMulungu ashindikwaje shiima! Amina.

Izwi iLyinza ilinji naalimo

⁶ Nkusukumila nkaani, ahavhaliilizyo hansi vhweleele hatuuha, imwe mwamuleha uMulungu we ávhiisite ku vhwila uvhwa Chilisiti, havhili mukulandata izinji zye vhamo vhakuti lye Lizwi iLyinza,

⁷ poosye she te Lizwi iLyinza inga hansi. Nalyoli avhantu ivho vhakuvhatamwa imwe, havhili vhakwanza kwandula Izwi iLyinza ilya Chilisiti.

⁸ Ileelo inga umuntu wonti kufuma muli iswe, poosye uhavhizya kufuma ku mwanya, akwinza nu kuvhalumbiilila izwi lye likusugaana na lye návhalumbiliiye ine, uyo atipwe!

⁹ Nkuvhavhuuzya imwe havhili inza vwe návhavhuziizye ahavhaliilizyo haala kuuti, inga umuntu wonti akuvhalumbiilila Izwi iLyinza lye likusugaana na vwe mwáposheleeye, umuntu uyo atipwe!

¹⁰ Ishi vhuli, mukusiivha kuuti nkwanza kukundwa na vhantu? Ndaali, nkwanza kukundwa nu Mulungu weeka vhweleele! Inga nanzaga kukundwa na vhantu, ine nkandi te ne muzya wa Chilisiti.

UPaavhuli átumiilwe nu Mulungu kulumbiilila Izwi iLyinza

¹¹ Vhamwitu, nkwanza mumanye kuuti, Izwi iLyinza lye ine návhalumbiliiye, litáfumile ku vhantu.

¹² Ntáposheleeye kufuma ku vhantu, havhili umuntu wonti atánsambiliziizye, nkandi uYeesu Chilisiti wuuyo we ándolesiizye.

¹³ Yeenyi, mwivuuye ulujendo lwane vwe lwáli, lwe nkalwilaga ishipuuto shaane isha Vhayuuda, na lwe nkavhayimvwaga avhantu avha mu shivhanza isha Mulungu, nu kulinga kushilovwa nziila.

¹⁴ Nalyoli návhapoosite avhamwitu avhinji vhe twákuzile pooka navho, kulwila shipuuto shiitu isha Vhuyuuda. Nákanyiiye nkaani kugalema amaata aga vhataata vhiitu.

¹⁵ Ileelo uMulungu ku vhwila vhwakwe, ánsavhuuye lwe nshiili nu kupaapwa, ahaniita kumuvhombela.

¹⁶ Ávhwenyi kuuti hinza andolesezye uMwana waakwe vwe ali, inga ndumbiilile izwi lyakwe ku vhantu vhe te Vhayuuda. Ahavhaliilizyo haala ntásogooye naluvhiilo kwa muntu wonti kumuvhuziilizya zye nkwanzilwa kuvhomba.

¹⁷ Havhili ntásogooye suuti ku Yelusaleemu ku vhaala vhe vhándongoleeye ine kuvha vhatumwa, nkandi násogooye mu nsi iya Alaabiya, pisinda nkagaluha havhili mu Damaasiki.

¹⁸ Lwe amaaha gatatu gatuuha kufuma pe uMulungu ándolesiizye uMwana waakwe, nkasogola ku Yelusaleemu, inga nkomaane nu Keefa, nkatendama ku kwakwe insiku 15.

¹⁹ Ileelo ntávhavhwenyi avhatumwa avhanji, nkandi we Yaakobu umunine uwa Mwene uYeesu.

²⁰ Nkulapa pilongolela ilya Mulungu, kuuti izi zye nkuvhasimbila, ntakuluma ilenga.

²¹ Pe pisinda nkasogola mu shigavho isha nsi isha Siiliya ni sha Kiliikiya.

²² Ahavhaliilizyo iho, ine ntáhomiine na vhiitisi avha mu vivhanza ivwa Chilisiti ivwa mu shigavho isha nsi isha Yudeeya.

²³ Vházimanyile zye nongwa zye vházyivuuye kuuti, “Umuntu we atuyimvwaga ku vhwandilo, ishi akulumbiilila izya lwitiho lweluula lwe alingaga kululovwa.”

²⁴ Pe vhahamutiima uMulungu ku zye nkavhombaga.