VaEfeso 6 - ULufingwi uLupwa

Avhapaafi na vhaana vhaavho vwe vhakwanzilwa kulandila

¹ Niimwe mwe vhaana, muvhashindihaje avhapaafi vhiinyu inza vwe yikwanzilwa ku vhantu vhe vhamwitisile uMwene uYeesu, mwe pe kuvhomba isho, vhugolosu.

² Ululajizyo lwe lukuti, “Umushindihaje utaata waaho nu maayi waaho,” lwe lwa kwanda lwe luli nu lufingwi. Ulufingwi lwakwe lwa kuuti, “Uvhakunde,

³ inga uposheele uvhuloote nu kulandila ku havhaliilizyo ahatali mu nsi.”

⁴ Niimwe mwe vhataata, mutavhanzilizyaje avhaana vhiinyu, nkandi muvhasungaje ku masunde aga Mwene uYeesu nu kuvhasambiilizya insambiilizyo zyakwe.

Avhamwene na vhazya vhaavho vwe vhakwanzilwa kulandila

⁵ Niimwe mwe vhazya, mukwanzilwa muvhashindihaje nu kuvhanyila avhamwene vhiinyu. Muvhombaje vhwevhulo ku mwoyo wonti, inza vwe mukumuvhombela uChilisiti.

⁶ Mutavhavhombelaje ahinza lwe vhakuvhalola vhweleele, inga vhavhatiime, nkandi muvhavhombelaje fwe mwe vhavhomvi avha Chilisiti, muvhombaje ku mwoyo wonti inza vwe uMulungu akwanza.

⁷ Muvhavhombelaje ku mwoyo mwinza, te fwe mukuvhavhombela vhantu, nkandi fwe mukumuvhombela wu Mwene uYeesu.

⁸ Mumanye kuuti uMwene uYeesu aliimupa ishipeelwa umuntu wonti ku mbombo yaakwe inyinza ye akuvhomba, avhe muzya poosye te muzya.

⁹ Niimwe mwe vhamwene, muvhavhombelaje ahinza inza vhwevhulo avhazya vhiinyu. Mutavhogofwaje kuuti mukuuvhapa isunde, mwe pe mumanyile kuuti, avheene pooka niimwe, uMwene wiinyu ali wooka, woope ali ku mwanya. Uvhulonzi vhwakwe ku vhonti vhwa nalyoli, havhili uweene atakusavhulanya avhantu.

Idala ilya kupoota uvhulugu uvhwa Seetano

¹⁰ Izyamwavho, nkwanza muposheele amaha kufuma ku maha amasisya aga Mwene uYeesu.

¹¹ Muzwale ivizwalo vwonti ivwa kulwila uvhulugu vwe mukupeelwa nu Mulungu, inga muyipinjishe nu lukasamo lwonti ulwa Mukwalanzi lwe lwa vhushevu.

¹² Muvhombe vhwevhulo, mwe pe tutakulwa na vhantu. Tukulwa ni mpepo imbiivhi izya maha na maha amasisya, zye zikukonzya mu nsi iya shiisi ino, na vhasikaali, vhe mpepo imbiivhi izya mu nsi ye yitakuloleha pa minso amazelu.

¹³ Kuli izyo, muzwale ivizwalo vwonti ivwa kulwila uvhulugu vwe mukupeelwa nu Mulungu, inga muvhwezye kupoota pi isiku lyonti lye imbiivhi zikuvhinzila. Inga mwamala zyonti izya kuyisengaanya nu vhulugu, mukusimpa.

¹⁴ Mukwanzilwa kuyisengaanya inza ishi, kutumvanya nu Mukwalanzi. Inza vwe umusikaali akuyipinya ni ilamba mu musana, kuyisengaanya kulwa, niimwe mulandataje uvhwanalyoli uvhwa Mulungu, inga vhuvhavwaje. Havhili inza vwe umusikaali akuzwala inkwela ku shifuvha, inga ayidinde nu vhwele ni mpalala, niimwe mukwanzilwa muvhanje nu lujendo ulugolosu, inga muyidinde nu Mukwalanzi.

¹⁵ Havhili inza vwe umusikaali akuzwala ivilyatu, kuyisengaanya ku vhulugu, niimwe mukwanzilwa musuvhilaje Izwi iLyinza lye likuleeta uvhutehamu, kuyisengaanya kulwa nu Mukwalanzi.

¹⁶ Pooka niizyo zyonti, mumwitihaje uMulungu ku zyonti. Inza inkwela vwe yikuvhomba, ulwitiho lwope lukuzimanya uvhwele uvhwa mwoto vhwe vhukufuma kwa Muvhiivhi ula.

¹⁷ Havhili muposheelaje kufuma kwa Mulungu uvhuposhi vhwakwe ni izwi lyakwe. Uvhuposhi vhukuvha ngati nkofwela iya shijela ye umusikaali akuzwala ku vhulugu, lyope izwi likuvha ngati lipanga lye mukupeelwa nu Mupepo uMufinjile kulwila.

¹⁸ Ishi vhamwitu, ahavhaliilizyo honti mulaavhaje ku mpuuto zyonti inza vwe uMupepo uMufinjile akuvhalongola. Kuvhomba isho, muvhanje minso, mutalitaje kuvhalaavhila avhafinjile vhonti.

¹⁹ Niine vhuulo, mundavhilaje kuuti uMulungu ampe amazwi aga kuyanga, inga mbuvumbule uvhuzigizigi uvhwa Izwi iLyinza ku vhudandamazu.

²⁰ Ine ne hoome uwa Izwi ilyo, lyope lye lintwaliiye kukungwa mu jeela. Mundavhilaje injendeelele kukumusya inza vwe yikwanzilwa ku vhudandamazu.

Amazwi aga kulagana

²¹ Uwamwitu unkundwa uTikiiko, umuvhomvi umutungamu uwa Mwene uYeesu alivhavhuuzya inongwa zyane zyonti, inga niimwe mumanye vwe nkujendeelela na zye nkuvhomba ishi.

²² Kuli izyo, imusonteleziizye kuli imwe, inga ayinze avhavhuuzye zye zikuvhombeha kuli iswe nu kuvhasuvhaalizya.

²³ Vhamwitu, uTaata uMulungu nu Mwene wiitu uYeesu Chilisiti vhaavhape uvhutehamu, havhili vhavhaloote mujendeelele kumwitiha nu kukundana.

²⁴ UMulungu avhafwile uvhwila vhonti vhe vhakumukunda uMwene wiitu uYeesu Chilisiti ku shikunzi she shitali nu vhusililishilo.