uLuuka 8 - ULufingwi uLupwa

Avhantanda vhe vhahamwavwaga uYeesu

¹ Lwe zyatuuha izyo, uYeesu ahazyunguulaga mu nkaaya inyinji na mu ntala, ahakumusyaga nu kulumbiilila Izwi iLyinza ilya vhumwene uvhwa Mulungu. Áamile pooka na vhasundikwa vhaakwe 12.

² Havhili áamile pooka na vhantanda vhamo vhe ávhaponiizye amavhinu nu kuvheefwa impepo imbiivhi. Mu vhantanda ivho, áliipo uMaliiya uwa ku Magidaala we uYeesu ámwefwizye impepo inkandamanu 7,

³ nu Yowaana umushi wa Kuuza. UKuuza áamile muvhomvi umupiti uwa mwene uHeelodi. Havhili, áliipo uSuzaana, na vhantanda avhanji avhinji. Avhantanda ivho vhahafumwaga ivintu vwavho, kumwavwa uYeesu na vhasundikwa vhaakwe.

Ishiholanyo isha mupesa mbeyu

⁴ Isiku limo, avhantu ivhungaana ipiti kufuma mu nkaaya inyinji, vhávhungiine pe uYeesu áali. Pe uYeesu ahavhavhuuzya ku shiholanyo, ahati,

⁵ “Umulimi wumo ásogooye kupesa imbeyu zyakwe. Lwe akupesa, imbeyu zimo zihagwila pa luvhazu pi idala, zihahanywa, ni nyunyi zihalya.

⁶ Izyamwavho zihagwila pi iyalaawe. Lwe zyamela nu kwanda kukula, zihuuma, mwe pe patáamile ishiweleelezi.

⁷ Izyamwavho zihagwila pahati pa mimvwa. Amimvwa lwe gakukula pooka ni mbeyu izyo, gahazibuda.

⁸ Izyamwavho zihagwila pa nsi inyinza, zihamela nu kukula, zihapaapa ahinza nkaani, zyonti zihapaapa amantonongwa amashumi ishumi shumi.” UYeesu lwe aamala kuyanga izyo, ahayanga kwi izwi ipiti ahati, “We ali na makutwi, atejeelezye!”

UYeesu akulondovhola ishiholanyo isha mupesa mbeyu

⁹ Pisinda, avhasundikwa vhaakwe vhahamuvhuziilizya vhahati, “Ishiholanyo ishi kwe kuuti vhuli?”

¹⁰ Ahavhavhuuzya ahati, “Imwe uMulungu avhapiiye kuzimanya izya kukwilu izya vhumwene vhwakwe. Ileelo avhanji nkuvhasambiilizya ku viholanyo, inga ‘vhenyaaje, zye nkuvhomba, ileelo vhatazilolaje. Havhili vhatejelezyaje zye nkuyanga, ileelo vhatazimanyinsanyaaje.’

¹¹ “Ishiholanyo ishi kwe kuuti: Imbeyu lizwi lya Mulungu.

¹² Imbeyu zye zyágwiliiye pa luvhazu pi idala, shiholanyo isha vhantu vhe vhakwivwa izwi ilya Mulungu, ileelo ahavhaliilizyo hanaaho, uMukwalanzi akwinza nu kwefwa izwi ilyo mu mooyo gaavho, inga vhatahinze vhiitishe nu kupokwa.

¹³ Imbeyu zye zyágwiliiye pansi pi iyalaawe, shiholanyo isha vhantu vhe vhakwivwa izwi ilya Mulungu nu kuliposheela ku luseshelo. Ileelo vhakupootwa kusimpa, vhakuvha inza ikwi lye litisiizye amazi pansi. Pe vhakwitiha ku havhaliilizyo hansi vhweleele, inga vhalingwa vhakululeha ulwitiho.

¹⁴ Imbeyu zye zyágwiliiye mu mimvwa, shiholanyo isha vhantu vhaala vhe vhakwivwa izwi ilya Mulungu, ileelo pisinda mu vhulanzi vhwavho, vhakulemwa na maganigani nu kutepushila mu vhudumbwe na mu nyinza izya mu nsi. Izyo zikuliviganya izwi ilyo nu kulivhiiha kuuti lipootwe kupaapa amantonongwa.

¹⁵ Ileelo imbeyu zye zyágwiliiye pa nsi inyinza, shiholanyo isha vhantu vhe vhakwivwa izwi nu kulilema ku mwoyo umugolosu uwa mushinzi. Ivho vhe vhakupaapa amantonongwa uku vhakujimbiilila amayimba gonti.”

Ishiholanyo isha nyaale

¹⁶ “Ataliipo umuntu we akuhozya inyaale nu kuyigubishila ni nsonta, poosye kuyivhiiha kwi izungululu ku shitala, nkandi akuyivhiiha pi ibeeja, inga avhantu lwe vhakwinjila, vhalolaje.

¹⁷ Vhwevhulo, zyope zyonti zye zizyihiime ziliivha apazelu, havhili zyonti zye zili kukwilu, zilivumbuha.

¹⁸ Pe ishi, mutejelezyaje ahinza, mwe pe umuntu we akulema insambiilizyo zyane, kuuti zimwonjezye uvhumanyi. Ileelo we atakulema, nu vhumanyi uvhunsi vhwe akusiivha kuuti ali navhwo, vhwope alifwulwa.”

Unyina na vhanine avha Yeesu

¹⁹ Pe unyina na vhanine avha Yeesu, vhahasogola kwa Yeesu, ileelo vhahapootwa kufiha pe áali, mwe pe ivhungaana ilya vhantu lyámile lipiti nkaani.

²⁰ Pe vhamo vhahamuvhuuzya uYeesu vhahati, “Umaayi waaho na vhanine vhaaho vhimiliiye panzi vhakukwanza.”

²¹ Ileelo uYeesu ahavhaamula ahati, “Umaayi waane na vhanine vhaane vhe vhala vhonti vhe vhakutejeelezya izwi ilya Mulungu nu kulilandata.”

UYeesu akupilila inkungu na mavhilingwa

²² Isiku limo, uYeesu ahavhavhuuzya avhasundikwa vhaakwe ahati, “Tulambe kwi isyila ilya sumbi.” Pe vhahinjila mwi ivhooti vhahanda kulamba.

²³ Lwe vhakulamba, uYeesu ahasupiila utulo. Inkungu impiti yihanda kuvugula nu kuvhiiha amavhilingwa amapiti mwa sumbi. Aminzi gahanda kunyamfushila mwi ivhooti, vhahafishila kuuti vhadwivhe.

²⁴ Pe avhasundikwa vhahasogola kumudaamusya, vhahati, “We Mwene! Tukufwa!” UYeesu ahadaamula, ahayipilila inkungu na mavhilingwa, naluvhiilo vihapuuma mwaa!

²⁵ Pe uYeesu ahavhavhuziilizya avhasundikwa vhaakwe ahati, “Ulwitiho lwinyu luli kwoshi?” Avhasundikwa vhahasukumila nu kwogopa, vhahavhuzilizanya vhahati, “Muntu vhuli uno we akupilila, ni nkungu impiti na mavhilingwa vwope vikumushindiha?”

UYeesu akumuponia umuntu we ali ni mpepo inkandamanu

²⁶ Pe uYeesu na vhasundikwa vhaakwe vhahalamba usumbi uwa Galilaaya, vhahafiha kwi isyila mu nsi iya Vhagelaasi.

²⁷ UYeesu lwe ayiiha mwi ivhooti, umuntu wumo uwa mu nsi iyo ahinza ku kwakwe. Umuntu uyo áamile ni mpepo inkandamanu. Insiku inyinji ahajendaga ishitali, havhili atahatendamaga mu nyumba, ahatendamaga ku mbiipa.

²⁸ Lwe amulola nu kumumanya uYeesu, ahahoola inkoolo, ahamusugamilila, ahayanga kwi izwi ipiti ahati, “Shooni she ukuninjiilila iwe Yeesu, we Mwana wa Mulungu uMupiti uwa ku Mwanya? Nalamba utahanjimvwe.”

²⁹ Áyanzile vhwevhulo, mwe pe uYeesu ápezile ayipiliiye impepo inkandamanu kuuti yifume mwa muntu uyo. Impepo iyo yihamuyimvwaga umuntu uyo ulwinji. Avhantu vhahamugulilaga nu kumukunga na manyoloolo ni mpingu, ileelo ahavidumulanyaaga. Pe impepo iyo yihamulongolaga kushimbiilila mwi ilaala.

³⁰ UYeesu ahamuvhuziilizya ahati, “Izina lyaho we naanu?” Ahamwamula ahati, “Izina lyane ne Mpuga,” mwe pe impepo inkandamanu zyámile nyinji mu kwakwe.

³¹ Pe impepo izyo zihamulambiilizya uYeesu kuuti atahazitwale kwi ilivha ilya ku vhuzimu.

³² Ahavhaliilizyo iho pi igamba pa luvhazu páamile impuga impiti iya nguluvhe, zye vhahazidiimaga. Pe impepo izyo zihamulambiilizya uYeesu kuuti, azyitishile zyinjile mu nguluvhe izyo, woope ahazyitishila.

³³ Pe zihafuma mwa muntu uyo, zihinjila mu nguluvhe. Pe inguluvhe zyonti zihashimbiilila ku lwiha lwe lwásuliime nkaani, zihagwila mwa sumbi nu kufwa.

³⁴ Avhadiimi avha nguluvhe lwe vhaalola izyo, vhahashimbila uluvhilo kusogola mu nkaaya na mu ntala, vhahayanga zyonti zye vhazilola.

³⁵ Avhantu vhe vhívuuye izyo, vhahasogola kwenya zye zyáfumiiye. Lwe vhaafiha pe uYeesu áamile, vhahamulola umuntu we impepo imbiivhi zimwefile atendiime pilongolela ilya Yeesu, azwaye ahinza, havhili ali ni njeele zyonti, pe ilyoga lihavhalema.

³⁶ Avhantu vhe vhávhwenyi zye zyávhombesile, vhahavhavhuuzya avhanji vwe zyámile lwe uYeesu akumuponia uwa mpepo uyo.

³⁷ Pe avhantu vhonti avha mu nsi iya Vhagelaasi, vhahalemwa ni lyoga. Pe vhahamulambiilizya uYeesu kuuti avhwele ku mwavho. Woope ahinjila mwi ivhooti, ahavhwela.

³⁸ Lwe uYeesu akusogola, umuntu uyo we impepo inkandamanu zyámwefile, ahamulambiilizya kuuti vhasogole vhonti. Ileelo uYeesu atahamwitishila, ahati,

³⁹ “Vhwelaaga ku mwinyu, usogole ukumusye zyonti zye uMulungu akuvhombela.” Pe umuntu uyo aheepa paala, ahasogola mu nkaaya. Ukwo, ahakumusya zye uYeesu ámuvhombeeye.

UYeesu akumuponia umwantanda nu kumuzyusya umulindu

⁴⁰ Lwe uYeesu agaluha kwi isyila ilyamwavho, ahaposheelwa ku luseshelo ni ivhungaana ilya vhantu, mwe pe vhahamugulililaga.

⁴¹ Pe ahinza umuntu wumo we izina lyakwe vhahatinji uYaayili. Umuntu uyo áamile wooka mu vhapiti avha isinagoogi. Ahasugamila pilongolela pa Yeesu, ahamulambiilizya kuuti asogole ku kwakwe,

⁴² mwe pe umwana waakwe imozi uwa maaha 12, ávhinile nkaani, ásyaye hansi kufwa. Pe uYeesu ahanda kusogola kwa Yaayili. Lwe ali mwi idala, avhantu avhinji vháamile pooka nawo, vhahamuviganyaaga nkaani.

⁴³ Páamile umwantanda wumo pi ivhungaana liila, we áamile nu vhuvhinu uvhwa shamwiho ku havhaliilizyo aha maaha 12. Havhili ámazile ivintu vwakwe vwonti ku vhaganga, ileelo nuumo we ámuponiizye.

⁴⁴ Pe umwantanda uyo ahasogola kwisinda kwa Yeesu, ahapalamansya ikoopi ilya mwenda waakwe, panaapo ahapona uvhuvhinu vhwakwe.

⁴⁵ UYeesu ahavhuziilizya ahati, “Wu naanu we ampalamansya?” Avhantu vhonti vhahahaana. Pe uPeeteli ahamuvhuuzya uYeesu ahati, “We Mwene, avhantu ivhungaana ipiti vhakuzyunguluuye, vhakukuviganya!”

⁴⁶ Ileelo uYeesu ahati, “Aliipo umuntu we ampalamansya, mwe pe nkuyilola kuuti amaha aga kuponia ganeepa.”

⁴⁷ Umwantanda uyo lwe aalola kuuti atangayizyiha, ahasogola kwa Yeesu uku akutetema. Ahamusugamilila, ahamuvhuuzya pilongolela pa vhantu vhonti zye zyámuvhiisile kuuti amupalamansye, na vwe áponile naluvhiilo.

⁴⁸ UYeesu ahamuvhuuzya ahati, “We mwana waane, waapona, mwe pe waniitiha, sogolaaga, uMulungu akuteteesye!”

⁴⁹ UYeesu lwe akuyanga izyo, ahinza umuntu wumo kufuma kuhaaya kwa Yaayili, ahati, “Yaayili, leha kumutamwa uMusambiilizi, umwana waaho afuuye.”

⁵⁰ Ileelo uYeesu lwe ayiivwa izyo, ahamuvhuuzya uYaayili ahati, “Utogopaje, jendeleela kwitiha. Umwana waaho kwe apone.”

⁵¹ UYeesu lwe aafiha kwa Yaayili, ahavhahaana avhantu avhanji kwinjila pooka nawo mwe ishaala sháamile, nkandi we Peeteli nu Yoohani nu Yaakobu nu yise nu maayi uwa mulindu.

⁵² Avhantu vhonti vhe vháamile ipo, vhahakuutaga nu kuloosya kuzya mwana uyo. UYeesu ahavhavhuuzya ahati, “Leshi kukuuta! Umulindu uno atafuuye, akaasite tulo!”

⁵³ Avheene vhahanda kumuseha, mwe pe vhámanyile kuuti umulindu uyo afuuye.

⁵⁴ UYeesu ahamulema inyoovhe, ahamuvhilishila kwi izwi ahati, “Mwana waane, damuuha!”

⁵⁵ Ahavhaliilizyo hanaaho, umulindu uyo, ahazyuha, ahavhuuha. UYeesu ahavhavhuuzya kuuti vhaamupe ishaakulya.

⁵⁶ Avhapaafi vhaakwe vhahasukumila nkaani, ileelo uYeesu ahavhalajizya kuuti vhatahamuvhuuzye umuntu nuumo zye zifumiiye.