uLuuka 7 - ULufingwi uLupwa

Ulwitiho ulwa mupiti uwa vhasikaali

¹ UYeesu lwe aamala kuvhavhuuzya avhantu vhonti amazwi gonti igo, ahasogola mu nkaaya iya Kapelanawuumu.

² Mu nkaaya iyo, mwámile umupiti uwa mpuga iya vhasikaali 100 avha Shiluumi. Umupiti uyo áamile nu muvhomvi we ámukunzite nkaani. Umuvhomvi uyo áali muvhinu, ápalamiiye kufwa.

³ Umupiti uyo, lwe ayiivwa inongwa izya Yeesu, ahavhasonteelezya avhasongo vhamo avha Vhayuuda, kuuti vhasogole vhamulaavhe uYeesu, ayinze amuponie umuvhomvi waakwe.

⁴ Avhasongo ivho, lwe vhaafiha kwa Yeesu, vhahamulambiilizya nkaani vhahati, “Umuntu uno ahondeeye kuuti umutuule,

⁵ mwe pe avhakunzite avhantu vhiitu, havhili we atuzenjeeye isinagoogi.”

⁶ Pe uYeesu ahasogola pooka na vhasongo ivho kuhaaya kwa mupiti uyo. Lwe vhapalamila kufiha, umupiti uyo ahavhasonteelezya avhamanyani vhaakwe, kuuti vhamuvhuuzye uYeesu vhati, “We Mwene, utahayitamwe kwinza, ntahondeeye kuuti iwe uyinjile mu nyumba yaane.

⁷ Mbwenyi kuuti ntahondeeye poosye nu kwinza ku kwaho. Ileelo yanga lye lizwi vhweleele, umuvhomvi waane kwe apone.

⁸ Nkuyanga vhwevhulo, mwe pe niine vhweleele indi pansi pa vhapiti vhaane, havhili indi na vhasikaali vhe vhali pansi yaane. Inga namuvhuuzya wumo nati, ‘Usogole ukutunga,’ naluvhiilo akusogola. Inga namuvhuuzya uwamwavho nati, ‘Luvhiilo!’ Woope akwinza. Woope umuzya waane, inga namuvhuuzya nati, ‘Vhomba uti,’ akuvhomba vhwevhulo.”

⁹ Lwe uYeesu ayiivwa izyo, ahasukumila nkaani. Ahagalunkana aheenya ivhungaana ilya vhantu vhonti vhe vhahamulandataga, ahavhavhuuzya ahati, “Nkuvhavhuuzya kuuti, poosye mu Vhaisilayeeli vhonti, ntamuvhwenyi umuntu we ali nu lwitiho ulupiti inza ulu!”

¹⁰ Pe avhantu ivho vhe umupiti ávhasonteleziizye, vhahagaluha kuhaaya, vhahaaga umuzya aponile.

UYeesu akumuzyusya umwana uwa mwantanda umuziishe

¹¹ Pisinda, uYeesu ahasogola mu nkaaya iya Naayini, áamile pooka na vhasundikwa vhaakwe, ni ivhungaana ipiti ilya vhantu.

¹² Lwe apalamila pa mulyango uwa kwinjiilila mu nkaaya iyo, ahahomaana na vhantu vhe vhavhusiizye ishaala isha mujaaha vhakufuma panzi. Umujaaha uyo áamile mwana imozi uwa mwantanda umuziishe. Umwantanda uyo álongoziinye ni ivhungaana ilya vhantu avhinji avha mu nkaaya iyo.

¹³ UMwene uYeesu lwe amulola umuziishe uyo, ahamufwila uvhwila, ahamuvhuuzya ahati, “Puuma, utakuutaje.”

¹⁴ Pe ahayipalamila imbogooso mwe ishaala sháamile, ahayipalamansya. Avhantu vhe vhávhusiizye, vhahimiilila. Ahati, “We mujaaha, nkukuvhuuzya kuuti, vhuuha!”

¹⁵ Ula we áfuuye, ahadaamula, ahatendama, ahanda kuyanga. Pe uYeesu ahaamupa unyina umwana uyo.

¹⁶ Avhantu vhonti, ilyoga lihavhalema! Vhahanda kumutiima uMulungu, vhahati, “Umukuvhwi umupiti afumiiye muli iswe! UMulungu ayinzile kuvhaavwa avhantu vhaakwe!”

¹⁷ Inongwa izyo zye uYeesu ávhomvile, zihakumuha nkaani mu shigavho isha nsi isha Yudeeya shonti, na mu nsi izinji izya papiipi.

UYoohani uMwozyi akuvhatuma avhasundikwa vhaakwe kwa Yeesu

¹⁸ Avhasundikwa avha Yoohani uMwozyi, vhahamuvhuuzya uYoohani inongwa zyonti zye uYeesu ahavhombaga.

¹⁹ Pe uYoohani ahavhiita vhavhili mu vhasundikwa vhaakwe, ahavhasonteelezya kwa Mwene uYeesu kuvhuziilizya kuuti, “Vhuli, iwe we we Chilisiti we avhakuvhwi vhátili aliyinza, pamo tuguliilile uwunji?”

²⁰ Pe vhavhili ivho lwe vhaafiha kwa Yeesu, vhahamuvhuuzya vhahati, “UYoohani uMwozyi atusonteleziizye ku kwaho, kuuti tukuvhuziilizye kuuti, ‘Vhuli, iwe we we Chilisiti we avhakuvhwi vhátili aliyinza, pamo tuguliilile uwunji?’”

²¹ Ahavhaliilizyo hanaaho, uYeesu ahavhaponiaga avhantu avhinji amavhinu gaavho, ahavhaponiaga avha ntamwo na vha mpepo imbiivhi. Havhili ahavhaponiaga avhantonko avhinji.

²² Pe uYeesu ahavhaamula ahati, “Sogooli mumuvhuuzye uYoohani zyonti zye mukuzilola, nu kuzyivwa. Avhantonko vhakulola havhili, na vhantendya vhakujenda na vha mambombo vhakuzelupa. Havhili vhoope avhakuutwi vhakwivwa, na vhafwe vhakuzyuha na vhapiina vhakulumbiililwa Izwi iLyinza.

²³ Alosiitwe umuntu we akuniitiha ine ishisita amaganigani!”

²⁴ Lwe avhasundikwa avha Yoohani vheepa, uYeesu ahanda kulivhuuzya ivhungaana ilya vhantu vhaala izya Yoohani uMwozyi. Ahati, “Mwásogooye kwenya ishooni kwi ilaala? Mwásogooye kwenya isole lye inkungu yikuliyinzaanya?

²⁵ Inga te she shiyo, pe mwásogooye kwenya ishooni? Mwásogooye kumwenya umuntu we ázwaye amenda aga nsavho? Mumanye kuuti, avhantu vhe vhakuzwala amenda aga nsavho, nu kulya ivwakulya ivwa nsavho vhakutendama mu nyumba izya shimwene!

²⁶ Ishi, pe mwásogooye kwenya ishooni? Vhuli, mwásogooye kumwenya umukuvhwi? Nalyoli mwe muumwo! Nkuvhavhuuzya kuuti, uweene mupiti kuluusya umukuvhwi.

²⁷ Uweene we ásimviliilwe mu Vhusimbe uVhufinjile kuuti, ‘Yeenya, ndimusonteelezya umuvhomvi waane, akulongolele kulingaanya idala lye ulituuha.’”

²⁸ UYeesu ahati, “Nkuvhavhuuzya kuuti, ku vhantu vhonti, atahafumila naalumo we mupiti kumuluusya uYoohani uMwozyi. Ileelo umuntu we munsi nkaani mu vhumwene uvhwa Mulungu, we mupiti kuluusya uYoohani.”

²⁹ Avhantu vhonti, pooka na vhasonchezya musonko, lwe vhiivwa amazwi igo aga Yeesu, vhahiitiha kuuti uMulungu wa nalyoli. Ivho vhonti vhózeliilwe nu Yoohani.

³⁰ Ileelo aVhafalisaayi na vhasambiilizi avha ndajizyo vháhaanile ulukasamo ulwa Mulungu ku kwavho, mwe pe vhatózeliilwe nu Yoohani.

³¹ Pe uYeesu ahajendeelela kuyanga ahati, “Imbaholanye ni shooni avhantu avha havhaliilizyo iha? Vhaholiine nu naanu?

³² Vhali inza avhaana vhe vhatendiime kupukuta pa nsokooni, vhamo vhakuvhavhilishila avhamwavho vhakuti, ‘Twávhahomeeye ilonji, ileelo mutímvile! Havhili twávhateleleeye inyimbo izya vhuswimiilizu, ileelo mutálosiizye!’

³³ “Nkuvhaholanya vhwevhulo, mwe pe uYoohani uMwozyi áyinzile, atahalyanga ikaati, poosye kumwela idivaayi, imwe muhati, ‘Ali ni mpepo inkandamanu!’

³⁴ Niine ne Mwana wa Aadamu ninzile, nkulya nu kumwela. Imwe mukuti, uno mupafu, havhili wu shimwela! Havhili mukuti, mumanyani uwa vhasonchezya musonko na vhatalamalandu avhanji!

³⁵ Ileelo uvhushindamu uvhwa njeele, vhukuloleha kuuti vhwa nalyoli kwi idala lye vhakulandila vhaala vhonti vhe vhakuvhulandata.”

UYeesu akumuswila umwantanda umutalamalandu

³⁶ Isiku limo, uMufalisaayi wumo we vhahatinji uSiimoni ámulanjiiye uYeesu kulya ishaakulya ku kwakwe. Pe uYeesu ahinjila mu nyumba muula, ahatendama kulya ishaakulya.

³⁷ Mu nkaaya iyo, mwámile umwantanda wumo we áamile mutalamalandu nkaani. Umwantanda uyo, lwe ayiivwa kuuti uYeesu ali kulya mu nyumba mwa Mufalisaayi, ahinza na mafuta ge gakununshila. Amafuta igo gáamile mu nsupa ye vhagombeeye ivhwe ilya nsavho nkaani lye vhahatinji ialabaasita.

³⁸ Ahimiilila kwisinda kwa Yeesu, papiipi ni vinama vwakwe. Ahanda kukuuta, na mansozi gaakwe gahazwilaga pa vinama ivwa Yeesu. Pe ahavha akumusyumula ni nsisi zyakwe uku akumufipa mu vinama vwakwe, nu kuvipahazya amafuta igo ge gakununshila.

³⁹ Pe uMufalisaayi ula lwe aalola izyo, ahasiivha mu mwoyo waakwe ahati, “Umuntu uno, inga nalyoli aamile mukuvhwi, nkandi amanyile kuuti umwantanda uno we akumupalamansya ali vhulivhuli, nkandi amanyile kuuti uno mutalamalandu!”

⁴⁰ UYeesu ahamuvhuuzya ahati, “We Siimoni, indi ni izwi limo ilya kukuvhuuzya.” Woope ahamwamula ahati, “Mbuuzya we Musambiilizi.” Pe uYeesu ahayanga ku shiholanyo ahati,

⁴¹ “Páali umuntu wumo we ahapavhilaga impiiya. Isiku limo, avhantu vhavhili vhahapavha ku kwakwe, wooka ahapavha idinaali 500, uwamwavho ahapavha idinaali 50 vhweleele.

⁴² Lwe vhonti vhavhili vhapootwa kumulipa, ahavhaswila. Vhuli, kuli ivho vhavhili, ali kwoshi we ámukunzite nkaani ula we ahapavhilaga?”

⁴³ USiimoni ahamwamula ahati, “Nkusiivha kuuti we wula we aswililiilwe idinaali inyinji.” UYeesu ahamuvhuuzya ahati, “Waamula mwe muumwo.”

⁴⁴ Pe uYeesu ahagalunkana aheenya kwa mwantanda ula, ahamuvhuuzya uSiimoni ahati, “Ukumulola umwantanda uno? Ninjiiye mu nyumba yaaho, utampiiye aminzi aga kugeeza mu vinama vwane. Ileelo uweene anoozya ivinama vwane na mansozi gaakwe, nu kunsyumula ni nsisi zyakwe.

⁴⁵ Iwe utamfipile inga hansi, ileelo uweene, kufuma ahavhaliilizyo he ninjiiye umu, atalesile kumfipa mu vinama vwane.

⁴⁶ Havhili iwe utampahaziizye amafuta pi itwe lyane, ileelo uweene ampahaziizye ivinama vwane amafuta ge gakununshila!

⁴⁷ Kuli izyo, nalyoli nkukuvhuuzya kuuti, aswililiilwe uvhutalamalandu vhwakwe uvhwinji, pe akulolesya ishikunzi shaakwe ishipiti. Ileelo wonti we akuswilwa hansi, akuvha ni shikunzi ishinsi.”

⁴⁸ Pe uYeesu ahamuvhuuzya umwantanda uyo ahati, “Waswilwa uvhutalamalandu vhwaho.”

⁴⁹ Ileelo vhaala vhe vhátendiime pooka nawo pa shaakulya, vhahanda kusiivha mu mooyo gaavho kuuti, “Wu naanu uno, we akuswila nu vhutalamalandu?”

⁵⁰ Pe uYeesu ahamuvhuuzya umwantanda uyo ahati, “Waapokwa, mwe pe waniitiha, sogolaaga, uMulungu akuteteesye.”