uLuuka 4 - ULufingwi uLupwa

UYeesu akulingwa nu Mukwalanzi

¹ Lwe uYeesu ayoozelwa, aheepa pi ijenje uYoolodaani she ayizuuye uMupepo uMufinjile. UMupepo uMufinjile ahamulongola kusogola mu luugwa.

² Ukwo ahalingwa nu Mukwalanzi insiku 40. Insiku zyonti izyo, atáliiye naashimo. Lwe zyasila, inzala yihamuluma.

³ Pe uMukwalanzi ahamuvhuuzya ahati, “Inga iwe we Mwana wa Mulungu, livhuuzye ivhwe ili ligalunkane livhe likaati.”

⁴ UYeesu ahamwamula ahati, “Yisimviilwe mu Vhusimbe uVhufinjile kuuti, ‘Umuntu atangalandila kwe ku shaakulya sheeka vhweleele.’”

⁵ Pe uMukwalanzi ahamutwala uYeesu pamo pe páali pamwanya nkaani, ahamulanga uvhumwene uvhwa mu nsi zyonti ku havhaliilizyo hansi.

⁶ Ahamuvhuuzya ahati, “Kwe nkupe amaha aga kukonzya uvhumwene uvhu vhwonti nu vhushindamu vhwakwe, mwe pe vwonti vwane. Ine nkuumupa umuntu wonti ku lukasamo lwane.

⁷ Inga wampuuta, vwonti kwe vivhe vwaho.”

⁸ UYeesu ahamwamula ahati, “Yisimviilwe mu Vhusimbe uVhufinjile kuuti, ‘Umupuutaje uMWENE waaho uMulungu weeka, havhili umuvhombelaje wuuyo weeka vhweleele.’”

⁹ Pe uMukwalanzi ahamutwala uYeesu ku Yelusaleemu, ahamuvhiiha pamwanya nkaani pa Nyumba iMfinjile. Ahamuvhuuzya ahati, “Inga iwe we Mwana wa Mulungu, yisumbe pansi,

¹⁰ mwe pe yisimviilwe mu Vhusimbe uVhufinjile kuuti, ‘UMulungu kwe avhalajizye avhahavhizya vhaakwe kuuti vhakuguulile.’

¹¹ Havhili kuuti, ‘Vhakutone mu nyoovhe zyavho inga utahabumile ishinama pi ivhwe nu kuvwalala.’”

¹² UYeesu ahamwamula ahati, “Yisimviilwe havhili mu Vhusimbe uVhufinjile kuuti, ‘Utamulingaje uMWENE waaho uMulungu.’”

¹³ Lwe uMukwalanzi aamala kumulinga uYeesu ku madala gonti, ahamuleha ku havhaliilizyo hamo.

UYeesu akutaliha imbombo iya kulumbiilila ku Galilaaya

¹⁴ Pe uYeesu ahagaluha mu shigavho isha nsi isha Galilaaya, she ayizuuye amaha aga Mupepo uMufinjile. Inongwa zyakwe zihakumuha mu nkaaya zyonti impalamani.

¹⁵ Ahasambilizyaga mu masinagoogi gaavho, avhantu vhonti vhe vhahamutejelezyaga vhahamutiimaga.

Vhakumuhaana uYeesu ku mwavho

¹⁶ Isiku limo, uYeesu ahafiha mu Naazaleeti, inkaaya ye ákuliiye. Isiku ilya Sabaato ahinjila mwi isinagoogi, inza vwe gáamile amaata gaakwe. Ahimiilila inga avhaazye uVhusimbe uVhufinjile.

¹⁷ Wumo ahaamupa ikalaata ilya mukuvhwi uYisaayi, pe ahagubula pe pasimviilwe kuuti,

¹⁸ “UMupepo uwa MWENE uMulungu ali pooka niine, mwe pe uMulungu ansavhuuye kuvhalumbiilila avhapiina Izwi iLyinza. Ansonteleziizye kuvhakumusizya vhe vhakunziilwe, inongwa izya kusatulwa kwavho, na vhantonko kuuti vhatalishe kulola havhili. Ansonteleziizye kuvhapoha vhe vhakuyimvilwa,

¹⁹ nu kukumusya ahavhaliilizyo he uMWENE kwe ayinze kuvhaloota avhantu.”

²⁰ Lwe avhaazya, ahagubishila ikalaata liila, ahamugalusizya umuvhomvi uwa isinagoogi, ahatendama inga atalishe kusambiilizya. Avhantu vhonti vhe vháamile mu nyumba yiila, vhahamutontomela.

²¹ Pe ahataliha kuvhasambiilizya kuuti, “UVhusimbe uVhufinjile uvhu vhwe mwivwa nkuvhaazya, ileelo vhwalunjiha.”

²² Vhonti vhahamutiima nkaani, vhahasukumila ku mazwi aga vhuloote ge áyanzile, vhahati, “Uno te mwana wa Yoosefu?”

²³ UYeesu ahavhavhuuzya ahati, “Nalyoli kwe mumbuuzye ku miivhi kuuti, ‘Iwe muganga, yiponie weneewe!’ Kwe muti, ‘Imbombo zye twivuuye uvhomvile mu nkaaya iya Kapelanawuumu, ishi uzivhombe na pa nkaaya ipa pa mwinyu weneewe.’”

²⁴ Ahajendeelela kuyanga, ahati, “Nalyoli nkuvhavhuuzya kuuti, ataliipo umukuvhwi we vhakumwitiha ku mwavho.

²⁵ Ahavhaliilizyo aha mukuvhwi uEeliya, imvula yitátoonyile amaaha gatatu na meezi 6, inzala impiti yihagwa mu nsi yonti iya Isilayeeli. Nalyoli nkuvhavhuuzya kuuti, ahavhaliilizyo iho vháliipo avhaziishe avhinji mu nsi iyo.

²⁶ Ileelo uMulungu atámusonteleziizye uEeliya kwa muziishe inga wooka muli ivho avha mu Isilayeeli, ámusonteleziizye kwa muziishe uwa mu nkaaya iya Seleeputa, mu nsi iya Siidoni.

²⁷ Havhili ahavhaliilizyo aha mukuvhwi uEelisha, vháliipo avhantu avhinji avha mpungo iya mambombo mu nsi iya Isilayeeli. Ileelo atáliipo inga wooka we ázelufile, nkandi we Nahamaani weeka umuhaaya uwa mu shigavho isha nsi isha Siiliya.”

²⁸ Avhantu vhonti vhe vháamile mwi isinagoogi, lwe vhiivwa amazwi igo, vhahaviitwa nkaani.

²⁹ Pe vhahimiilila, vhahamufumwa uYeesu mu nkaaya yaavho ye yáamile pi igamba pamwanya. Vhahanzaga kumubunshiilila kwi ipalaazya, inga agwe pansi, afwe.

³⁰ Ileelo uweene ahatuuha pahati yaavho, aheepa.

UYeesu akushimbizya impepo inkandamanu

³¹ Pisinda, uYeesu ahasogola mu nkaaya iya Kapelanawuumu ye yáamile mu shigavho isha nsi isha Galilaaya. Isiku ilya Sabaato, ahinjila mwi isinagoogi, ahanda kuvhasambiilizya avhantu.

³² Avhantu vhahasukumila nkaani insambiilizyo zyakwe, mwe pe zyámile na maha.

³³ Mwi isinagoogi ilyo, mwáli umuntu wumo we álemwilwe ni mpepo inkandamanu, ahahoola kwi izwi ipiti, ahati,

³⁴ “Shooni she ukutwinjiilila, iwe Yeesu wa ku Naazaleeti? Uyinzile kutulovwa? Imanyile kuuti iwe we Mufinjile uwa Mulungu!”

³⁵ UYeesu ahayipilila impepo yiila ahati, “Ahalanga! Fuma mwa muntu uno!” Impepo iyo yihamugwisya umuntu uyo pilongolela lyavho, yihafuma ishisita kumuvwalazya.

³⁶ Avhantu vhonti vhahasukumila nkaani, vhahapanzanyaaga vheeka vhahatinji, “Izi zya kusukumizya nkaani! Umuntu uno akuzipilila impepo inkandamanu ku maha, zyope zikufuma!”

³⁷ Inongwa izya mbombo izya Yeesu zihakumuha mu nsi iyo yonti.

UYeesu akuvhaponia avhavhinu avhinji

³⁸ UYeesu ahafuma mwi isinagoogi, ahasogola mu nyumba iya muntu wumo we vhahatinji uSiimoni. Lwe aafiha, ahaaga unyinavwala uwa Siimoni avhinile nkaani inzegema, pe vhahamulaavha uYeesu kuuti amuponie.

³⁹ Pe ahimiilila papiipi nu muvhinu, ahayipilila inzegema iyo. Panaapo inzegema yihapona, woope ahavhuuha, ahataliha kuvhavhombela.

⁴⁰ Lwe izuvha lyaswa, avhantu vhonti vhe vháamile na vhavhinu avha mpungo izya mavhiila mu mavhiila, vhahavhatwala avhavhinu ivho kwa Yeesu. Uweene ahavhalemaga vhonti, kuvhaponia.

⁴¹ Havhili, ahazyefwaga impepo inkandamanu inyinji, zyope zihazumaga ahalanga zihatinji, “Iwe we Mwana wa Mulungu!” Ileelo ahazihaanaga kuuti zitamutahaje, mwe pe zyámumanyile kuuti wu Chilisiti.

⁴² Indaavhi yaakwe lwe kwasha, uYeesu aheepa mu nkaaya yiila, ahasogola pamo pe patáali avhantu. Ivhungaana ilya vhantu lihanda kumulondola, lihafiha pe áamile. Lwe lyamulola, lihalinga kumudinda kuuti ataheepe mu nkaaya yaavho.

⁴³ Ileelo uweene ahalivhuuzya ahati, “Nkwanzilwa kulumbiilila Izwi iLyinza ilya vhumwene uvhwa Mulungu na mu nkaaya izinji mwope, mwe pe vhansonteleziizye kuvhomba vhwevhulo.”

⁴⁴ Pe aheepa ipo, ahajendeelela kukumusya Izwi ilyo mu masinagoogi aga mu nsi yiila.