uLuuka 20 - ULufingwi uLupwa

Avhalongozi vhakwanza kumanya amaha aga Yeesu

¹ Isiku limo lwe uYeesu akuvhasambiilizya avhantu pa Nyumba iMfinjile nu kuvhalumbiilila Izwi iLyinza, avhapiti avha vhapuuti na vhasambiilizi avha ndajizyo na vhasongo vhahamusogolela.

² Vhahamuvhuziilizya vhahati, “Tuvhuuzye, ukuvhomba izi ku maha aga naanu? Havhili wu naanu we akupiiye amaha igo?”

³ Ahavhaamula ahati, “Niine imbavhuziilizye, mumbuuzye,

⁴ amaha aga Yoohani aga kwozya avhantu, gáfumile kwa Mulungu pamo ku vhantu?”

⁵ Pe vhahapanzanya vhuuvho vheeka vhahati, “Inga twati gáfumile kwa Mulungu, kwe ati, ‘Pe shooni she mutámwitisile?’

⁶ Poosye inga twati gáfumile ku vhantu, vhonti ivha kwe vhatuhome na mavhwe, mwe pe vhakwitiha kuuti uYoohani áamile mukuvhwi.”

⁷ Pe vhahamwamula vhahati, “Tutamanyile kwe gáfumile.”

⁸ Woope uYeesu ahavhavhuuzya ahati, “Niine, ntakuvhavhuuzya kuuti maha ga naanu ge nkuvhombela izi.”

Ishiholanyo isha vhalimi avhavhiivhi

⁹ Pe uYeesu ahanda kuvhavhuuzya avhantu ishiholanyo ishi, ahati, “Kwáli umuntu wumo, we álimile umugunda uwa mampensya. Ahavhavhiiha avhalimi avha kuguulila nu kulimiilila amampensya igo, ahanzaga kuuti inga gaagoma vhahinze vhagavhane nawo, pe ahashuula kusogola ku nsi iya kutali. Ukwo ahadiila insiku inyinji.

¹⁰ Lwe ahavhaliilizyo aha kuyevhila haafiha, ahamusonteelezya umuzya waakwe ku vhalimi ivho, inga vhaamupe amampensya gamo ge vháyevhiiye mu mugunda waakwe. Ileelo umuzya uyo lwe aafiha, avhalimi ivho vhahamuhoma nu kumushimbizya inyoovhe zyeka.

¹¹ “Umuhaata mugunda, ahamusonteelezya umuzya uwamwavho. Ileelo woope vhahamuhoma nu kumusuupizya, pe vhahamushimbizya inyoovhe zyeka.

¹² Ahamusonteelezya uwa vhutatu. Uyo woope vhahamuvwalazya, vhahamusumbila kunzi ku mugunda.

¹³ “Pisinda, umuhaata mugunda ahati, ‘Ishi kuuti mbombe ishooni? Ahavhaliilizyo iha, kwe imusonteelezye umwana waane unkundwa umwanaavuli! Pamo uyo we kwe vhamushindishe.’

¹⁴ Ileelo avhalimi ivho lwe vhamulola umwana uyo, vhahapanzanya vhahati, ‘Uno we mupwana waakwe. Ishi nzaaji tumugoje, inga umugunda uno wuvhe wiitu.’

¹⁵ Vhahamukwesela kunzi ku mugunda, vhahamugoga.” Pe uYeesu ahavhavhuziilizya ahati, “Ishi umuhaata mugunda ula alivhavhomba ishooni avhalimi ivho?

¹⁶ Aliyinza nu kuvhalovwa, nu mugunda uwo, aliivhapa avhalimi avhanji!” Avhantu lwe vhiivwa amazwi igo, vhahati, “Izyo zitahafumile inga hansi!”

¹⁷ Ileelo uYeesu ahavhazyamila, ahavhavhuziilizya ahati, “Ishi uVhusimbe uVhufinjile uvhu, kwe kuuti vhuli? ‘Ivhwe lye avhazenzi vhálihaanile, lye lyavha livhwe ipiti ilya pa shipembe isha nyumba.’

¹⁸ Umuntu wonti we agwila pi ivhwe ilyo, alivunzinkana. Havhili umuntu wonti we ivhwe ilyo lyamugwila, lilimuvinyulanya.”

¹⁹ Avhasambiilizi avha ndajizyo na vhapiti avha vhapuuti, vhahamanya kuuti ishiholanyo isho shihavhayangaga vhuuvho. Pe vhahanzaga kumulema pepaala, ileelo vhahoogopa impuga iya vhantu.

Kusonka umusonko kwa Kayisaali

²⁰ Pe avhapiti avha Vhayuuda, vhahavhanga vhakumwuvhiilila uYeesu. Vhahasonteelezya avhantu vhe vhahayivhiiha ngati vhagolosu, kuuti vhenyeelezye zye uYeesu akuyanga. Vhahavhomba isho inga vhapaaje apa kumulemela mu mazwi gaakwe wuuyo, inga vhamuleme nu kumutwala ku vhe vhakukonzya.

²¹ Pe avhantu ivho vhahamuvhuziilizya uYeesu vhahati, “We Musambiilizi, tumanyile kuuti ukuyanga nu kusambiilizya izya nalyoli. Havhili utakusaajila uvhupiti uvhwa muntu, ukusambiilizya idala ilya Mulungu mu vhwanalyoli.

²² Vhuli, indajizyo izya Moose zikutwitishila kusonka umusonko kwa Kayisaali?”

²³ Ileelo uYeesu ahamanya ishifumbo shaavho, ahavhavhuuzya ahati,

²⁴ “Ndanji insavhaazya iya dinaali.” Lwe ayilola ahavhavhuziilizya ahati, “Ishiholanyo ishi nu vhusimbe vhwe vhuli pa nsavhaazya ino vwa naanu?” Vhahamwamula vhahati, “Vwa Kayisaali.”

²⁵ Pe uYeesu ahavhavhuuzya ahati, “Ishi, ivwa Kayisaali, mumupanje uKayisaali, vwope ivwa Mulungu mumupanje uMulungu.”

²⁶ Avhantu ivho vhahasukumila nkaani vwe uYeesu áyamuuye, vhahapuuma mwaa. Vhahapootwa apa kwandila kumulonjeelela, kuzya mazwi ge áyanzile pilongolela pa vhantu.

Kuzyuha ukwa vhafwe

²⁷ Pisinda, aVhasadukaayi vhamo, vhe vhahasambilizyaga kuuti avhafwe te vhahazyushe, vhahasogola kwa Yeesu. Vhahamuvhuziilizya vhahati,

²⁸ “Musambiilizi, uMoose átusimbiiye indajizyo kuuti, inga umwanaavuli aafwa, amuleha umushi waakwe ishisita umwana, yikwanzilwa kuuti umunine waakwe amupwane umuziishe uyo, inga amupaapile avhaana umuyazi.

²⁹ Ishi, kwáli avhanaavuli 7 vhe vháamile uyise wooka. Uwa kwanda ahanyatula umwantanda, ileelo ahafwa ishisita kuleha umwana.

³⁰ Uwa vhuvhili, ahamupwana umuziishe uyo, ileelo woope ahafwa ishisita kuleha umwana.

³¹ Pisinda, uwa vhutatu, ahamupwana, ileelo woope ahafwa. Yihavha shiniisho ku vhonti 7. Avhaana vhonti ivha vhe vháali uyise wooka vhátendiime nu mwantanda uyo, ileelo vhonti vhahafwa ishisita kuleha umwana.

³² Pisinda, umwantanda uyo woope ahafwa.

³³ Ishi, inga kuzyuha ukwa vhafwe kuliipo, isiku ilya kuzyuha umwantanda uyo aliivha mushi wa naanu? Tukuvhuziilizya isho, mwe pe átendiime na vhonti 7.”

³⁴ UYeesu ahavhavhuuzya ahati, “Avhantu avha havhaliilizyo iha, vhakwimala nu kwimalwa.

³⁵ Ileelo avhantu vhe uMulungu akulola kuuti vhakwanzilwa kuvhazyusya nu kutendama mu nsi impwa, ivho te vhahiimale, poosye kwimalwa havhili.

³⁶ Pooka niizyo te vhahaafwe havhili, mwe pe vhaliivha inza avhahavhizya. Vhakuvha vhaana vha Mulungu, mwe pe vhazyusile.

³⁷ “Woope uMoose áyanzile kuuti avhafwe vhalizyuha. Áyanzile izyo mu Vhusimbe uVhufinjile pa shipindi she shihaahaga, áyanzile átili uMWENE uMulungu, ‘wu Mulungu uwa Aabulahamu nu Yisaaka nu Yaakobu.’

³⁸ Uweene te wu Mulungu uwa vhafwe, wu Mulungu uwa vhalanzi. Kwe kuuti ku kwakwe avhantu vhonti vhalanzi.”

³⁹ Pe avhasambiilizi vhamo avha ndajizyo vhahati, “Musambiilizi, wayanga zya muumwo!”

⁴⁰ Kwandila ipo, vhatahasheela kumuvhuziilizya.

UChilisiti Mwana wa Daavhudi

⁴¹ Pe uYeesu ahavhavhuziilizya ahati, “Avhantu vhakuti, uChilisiti Mwana wa mwene uDaavhudi inza vhuli?

⁴² Nkuvhavhuziilizya isho, mwe pe uDaavhudi wuuyo, ásimvile mwi ikalaata ilya Zabuuli, átili, ‘UMWENE uMulungu ámuvhuziizye uMwene waane átili, “Tendaama ku luvhazu lwane ulwa kundiilo pa vhushindamu uvhupiti nkaani,

⁴³ kufishila pe navhavhiiha avhalugu vhaaho pansi pa vinama vwaho.”’

⁴⁴ Inga uDaavhudi wuuyo átili uChilisiti wu Mwene waakwe, pe woope uChilisiti angavha mwana waakwe inza vhuli?”

UYeesu akuvhasoha avhasundikwa vhaakwe izya vhasambiilizi avha ndajizyo izya Moose

⁴⁵ Lwe avhantu vhonti vhakumutejeelezya uYeesu, uweene ahavhavhuuzya avhasundikwa vhaakwe ahati,

⁴⁶ “Muvhe minso na vhasambiilizi avha ndajizyo, vhe vhakusungwa kutandaala vhazwaye inkanzu, inga avhantu vhavhalamuhaje ku mushinzi mu madala. Lwe vhali mu masinagoogi, vhakusungwa kutendama mu vitengo ivwa pilongolela. Mwope mu mulyo vhakutendama mu vitengo ivwa vhapiti.

⁴⁷ Avhantu ivha vhakuvhafwula ivintu avhaziishe! Ku shifumbo shaavho, vhakupuuta impuuto intali, inga avhantu vhatinji vhagolosu. Kuli izyo, uMulungu aliivhapa isunde ipiti!”