Matayi 4 - ULufingwi uLupwa

UYeesu akulingwa nu Mukwalanzi

¹ Pe uMupepo uMufinjile ahamulongola uYeesu kusogola mu luugwa, inga uMukwalanzi amulinje.

² UYeesu ahamala insiku 40 uvhusiku nu musanya she akuyiima kulya. Pisinda, inzala yihamuluma.

³ Pe uMukwalanzi ahinza kumulinga, ahamuvhuuzya ahati, “Inga we Mwana wa Mulungu, gavhuuzye amavhwe iga gagalunkane gavhe makaati.”

⁴ UYeesu ahamwamula ahati, “Yisimviilwe mu Vhusimbe uVhufinjile kuuti, ‘Umuntu atangalandila kwe ku shaakulya sheeka vhweleele, nkandi akulandila kwi izwi lye likufuma kwa Mulungu.’”

⁵ Pe uMukwalanzi ahamutwala uYeesu pa nkaaya imfinjile iya Yelusaleemu, ahamuvhiiha pamwanya nkaani pa Nyumba iMfinjile.

⁶ Ahamuvhuuzya ahati, “Inga iwe we Mwana wa Mulungu, yisumbe pansi, mwe pe yisimviilwe mu Vhusimbe uVhufinjile kuuti, ‘UMulungu kwe avhalajizye avhahavhizya vhaakwe, kuuti vhakutone mu nyoovhe zyavho, inga utahabumile ishinama pi ivhwe nu kuvwalala.’”

⁷ UYeesu woope ahamuvhuuzya ahati, “Yisimviilwe havhili mu Vhusimbe uVhufinjile kuuti, ‘Utamulingaje uMWENE waaho uMulungu.’”

⁸ Pe uMukwalanzi ahamutwala uYeesu pi igamba pamwanya nkaani, ahamulanga uvhumwene vhwonti uvhwa mu nsi zyonti pooka nu vhushindamu vhwakwe,

⁹ ahamuvhuuzya ahati, “Kwe nkupe vwonti ivi, inga wansugamilila nu kumpuuta.”

¹⁰ UYeesu woope ahamwamula ahati, “Yeepa ipa, we Seetano! Yisimviilwe mu Vhusimbe uVhufinjile kuuti, ‘Umupuutaje uMWENE waaho uMulungu weeka, havhili, umuvhombelaje wuuyo weeka vhweleele.’”

¹¹ Pe uMukwalanzi ahamuleha uYeesu pepaala, naluvhiilo avhahavhizya avha Mulungu vhahinza kumuvhombela.

UYeesu akutaliha imbombo iya kulumbiilila ku Galilaaya

¹² Pe lwe uYeesu ayiivwa kuuti uYoohani uMwozyi vhamukunzile mu jeela, aheepa mu Yudeeya, ahasogola mu shigavho isha nsi isha Galilaaya.

¹³ Lwe uYeesu ali mu Galilaaya, aheepa mu nkaaya iya Naazaleeti, ahasogola kutendama mu nkaaya iya Kapelanawuumu. IKapelanawuumu nkaaya ye yili mu luvhazu mwa sumbi uwa Galilaaya, ku luvhazu ulwa nsi iya Zaabulooni ni ya Naafutaali.

¹⁴ Zyávhombesile vhwevhulo, inga izwi lilunjishe lye uMulungu áyanzile kwi idala ilya mukuvhwi uYisaayi kuuti,

¹⁵ “Insi iya Zaabulooni ni ya Naafutaali, zili mwi idala ilya kusogola kwa sumbi, kwi isyila ilya ijenje uYoolodaani. Zili mu Galilaaya muula mwe vhakutendama vhe te Vhayuuda.

¹⁶ Avhantu vhaala vhe vhakutendama mu shiisi, vhavhulola uvhuzelu uvhupiti. Vhoope vhe vhakutendama mu shiisi isha vhufwe, uvhuzelu vhwavhahozezya.”

¹⁷ Kufuma ahavhaliilizyo iho, uYeesu ahataliha kukumusya kuuti, “Mupindushe uvhutalamalandu vhwinyu, mwe pe uvhumwene uvhwa Mulungu vhupalamiiye!”

UYeesu akuvhasaavhula avhasundikwa avha kwanda

¹⁸ Lwe uYeesu akujenda mu luvhazu mwa sumbi uwa Galilaaya, ahavhalola avhavuvhi avha nswi vhavhili, uSiimoni we izina ilyamwavho vhahatinji uPeeteli nu munine waakwe uAndeleeya. Vhahasumbilaga inyeelo zyavho mwa sumbi.

¹⁹ UYeesu ahavhavhuuzya ahati, “Mundandate! Niine kwe mbavhiishe kuvha mwe vhavuvhi vha vhantu.”

²⁰ Pepaala, vhahazileha inyeelo zyavho, vhahamulandata.

²¹ Lwe uYeesu asogola pilongolela, ahavhalola avhanine avhamwavho vhavhili, uYaakobu nu munine waakwe uYoohani, avhaana vha Zebedaayi. Vháali mwi ivhooti pooka nu taata waavho uZebedaayi, vhahalinganyaaga inyeelo zyavho. UYeesu ahavhiita vhoope,

²² pepaala vhahalileha ivhooti nu taata waavho, vhahamulandata uYeesu.

UYeesu akusambiilizya avhantu nu kuvhaponia avhavhinu

²³ UYeesu ahazyunguulaga mu shigavho isha nsi shonti isha Galilaaya. Ahinjilaga mu masinagoogi gaavho, umwo ahasambilizyaga avhantu nu kukumusya Izwi iLyinza ilya vhumwene uvhwa Mulungu nu kuvhaponia amavhinu gonti nu vhuyeyevhazu uvhwa mavhiila mu mavhiila.

²⁴ Pe inongwa zyakwe zihakumuha nkaani mu nsi yonti iya Siiliya. Avhantu vhahavhatwalaga avhavhinu na vha ntamwo izya mavhiila mu mavhiila vhonti. Muli ivho, vháliipo avha mpepo inkandamanu na vhe vháali ni shinzilisi na vhe vháhataliiye. Woope ahavhaponiaga vhonti.

²⁵ Pe ivhungaana ipiti ilya vhantu lihamulandata kufuma mu ntala izya mu Galilaaya ni zya mu Dekapooli ni zya mu Yelusaleemu ni zinji izya mu nsi iya Vhayuuda ni zya mwi isyila ilya ijenje uYoolodaani.