Matayi 2 - ULufingwi uLupwa

Avhamanyinsanyi avha nzota vhakusogola kumusugamilila uYeesu

¹ UYeesu ápafwilwe mu nkaaya iya Betelehemu, mu shigavho isha nsi isha Yudeeya, ahavhaliilizyo he umwene uHeelodi ahakonzyaga. Lwe apaapwa, mu nkaaya iya Yelusaleemu kuhafumila avhamanyinsanyi vhamo avha nzota vhe vháfumile kuvhutukulo.

² Vhahavhuziilizya vhahati, “Ali kwoshi we apafwilwe, uMwene uwa Vhayuuda? Tukuvhuziilizya isho, mwe pe tuluvhwenyi uluzota kufuma kuvhutukulo lwe lukulolesya kuuti apafwilwe. Ye nongwa twinzile kumusugamilila.”

³ Lwe umwene uHeelodi ayiivwa inongwa izyo, zihamutamwa mu mwoyo waakwe pooka na vhantu vhonti avha mu Yelusaleemu.

⁴ Pe ahavhavhungaaniha avhapiti vhonti avha vhapuuti na vhasambiilizi avha ndajizyo izya Moose, ahavhavhuziilizya ahati, “Amwe uChilisiti akwanzilwa kupaapwa kwoshi?”

⁵ Vhoope vhahamwamula vhahati, “Akwanzilwa kupaapwa mu nkaaya iya Betelehemu, mu shigavho isha nsi isha Yudeeya. Yeenya, izi zye umukuvhwi ásimvile kuuti,

⁶ ‘Niimwe mwe vhantu avha mu nkaaya iya Betelehemu, iya mu shigavho isha nsi isha Yudeeya, te mwe vhakuvhasuufwa inga hansi, mu vhulongozi uvhwa nsi iya Yuuda! Yeenya, muli imwe aliifuma umulongozi we alivhadiimaga avhantu vhaane aVhaisilayeeli.’”

⁷ Pe uHeelodi lwe aamanya izyo, ahavhiita avhamanyinsanyi avha nzota vhaala kukwilu inga vhamuvhuuzye uvhwanalyoli ahavhaliilizyo he vháluvhwenyi uluzota luula.

⁸ Pe ahavhasonteelezya mu Betelehemu, ahavhavhuuzya ahati, “Sogooli mupenze ahinza, mumanye kwe umwana uyo ali. Inga mwamwaga, mwinze mumbuuzye naluvhiilo, inga niine insogole imusugamilile.”

⁹ Lwe avhamanyinsanyi avha nzota ivho vhiivwa amazwi aga mwene, vhaheepa. Uluzota luula lwe vháluvhwenyi kuvhutukulo, luhavhanga luvhalongoleeye kwe vhakusogola, luhimiilila pamwanya pe umwana ula áamile.

¹⁰ Lwe vhalulola uluzota ulwo, vhahaseshela nkaani.

¹¹ Pe vhahinjila mu nyumba, vhahamulola umwana ali nu nyina uMaliiya, vhahamusugamilila nu kumupuuta. Vhahasatula vwe vhápinyile, vhahamufumwizya ivipeelwa ivwa sahaabu ni vwa kusuushizya na mafuta ge gakununshila.

¹² Lwe zyavha vhwevhulo, uMulungu ahavhasoha mu njozi, kuuti vhatahinze vhagalushe havhili kwa Heelodi. Pe vhahavhwela mu nkaaya yaavho kutuushila idala ilinji.

Kushimbiilila mu nsi iya Miisili

¹³ Lwe avhamanyinsanyi avha nzota vheepa, uhavhizya uwa MWENE uMulungu ahamuloleshela uYoosefu mu njozi, ahamuvhuuzya ahati, “Vhuuha, umunyatule umwana nu nyina, mushimbiilile mu nsi iya Miisili, mwe pe uHeelodi kwe amulondole umwana uyo, inga amugoje. Mutendame ukwo, kufishila ahavhaliilizyo he ndiyinza imbavhuuzye kuuti mugalushe.”

¹⁴ Pe uYoosefu ahadaamula, ahamunyatula umushi nu mwana uvhusiku, naluvhiilo ahashimbiilila ku Miisili.

¹⁵ Ahatendama ukwo kufishila lwe uHeelodi aafwa. Zyávhombesile isho, inga lilunjishe izwi lye uMWENE uMulungu áyanzile kwi idala ilya mukuvhwi kuuti, “Námwisite uMwana waane kufuma ku Miisili.”

UHeelodi akugoga avhaana ku Betelehemu

¹⁶ Lwe uHeelodi aamanya kuuti, avhamanyinsanyi avha nzota vhaala vhamuleganya, ahaviitwa nkaani. Pe ahavhalajizya avhasikaali kuuti, vhavhagoje avhaana avhanaavuli vhonti avha ku Betelehemu pooka na vha mu ntala izinji zye zili mu luvhazu, kwandila avhacheeche kufishila avha maaha gavhili. Ávhomvile vhwevhulo kulandatana na vwe áhomesheziizye kufuma ku vhamanyinsanyi avha nzota, ahavhaliilizyo he uluzota lwátalisile kuloleha.

¹⁷ Isho vwe lyálunjisile izwi lye umukuvhwi uYelemiya áyanzile kuuti,

¹⁸ “Izwi ilya nkuuta impiti na maloosyo amamwamu lihivwiha mu nkaaya iya Laama. ULaaheli ahavhalosezyaga avhaana vhaakwe, havhili, atahanzaga kuuti vhamusuvhaalizye, mwe pe avhaana vhaakwe vháfuuye vhonti.”

Kugaluha kufuma mu nsi iya Miisili

¹⁹ Lwe uHeelodi aafwa, uhavhizya uwa MWENE uMulungu ahamuloleshela uYoosefu mu njozi havhili ku Miisili.

²⁰ Ahamuvhuuzya ahati, “Vhuuha, umunyatule umwana nu nyina, ugalushe mu nsi iya Isilayeeli, mwe pe vhaala vhe vhalondolaga kumugoga umwana uyo, vhafuuye.”

²¹ Pe uYoosefu ahavhuuha, ahamunyatula umwana nu nyina, vhahagaluha mu nsi iya Isilayeeli.

²² Ileelo lwe uYoosefu ayiivwa kuuti, uAlikelaawo akukonzya ku Yudeeya, kwe uyise uHeelodi ahakonzyaga, ahoogopa kusogola. Lwe uMulungu amusoha mu njozi, aheepa nu kusogola mu shigavho isha nsi isha Galilaaya.

²³ Ahafiha nu kutendama mu nkaaya iya Naazaleeti, inga izwi lilunjishe lye avhakuvhwi vháyanzile kuuti, “Vhalimwita vhaliiti, Munaazaleeti.”