Matayi 15 - ULufingwi uLupwa

UYeesu akuhaana insambiilizyo izya Vhafalisaayi

¹ Pisinda, aVhafalisaayi vhamo na vhasambiilizi avha ndajizyo izya Moose vhahinza kufuma ku Yelusaleemu. Vhahasogola kwa Yeesu, vhahamuvhuziilizya vhahati,

² “Shooni she avhasundikwa vhaaho vhakushilanya amaata aga vhataata vhiitu? Vhakulya ishaakulya ishisita kugeeza mu nyoovhe zyavho!”

³ UYeesu woope ahavhavhuziilizya ahati, “Shooni she niimwe mukushilanya ululajizyo ulwa Mulungu kuzya kulandata amaata giinyu?

⁴ Yeenya, uMulungu átili, ‘Umushindihaje utaata waaho nu maayi waaho.’ Havhili, ‘Wonti we akumuliga uyise, poosye unyina, yikwanzilwa vhamugogaje.’

⁵ Ileelo imwe mukuti umuntu akwitishilwa kumuvhuuzya uyise poosye unyina kuuti, ‘Ivintu vwe naamile imbapanje, mfumwizye kwa Mulungu.’

⁶ Kwe kuuti, mukuti umuntu atakwanzilwa kumwavwa uyise poosye unyina. Ukwo kwe kulisuufwa izwi ilya Mulungu kwi idala ilya kulandata amaata giinyu.

⁷ Mwe vhashifumbo imwe! Umukuvhwi uYisaayi áyanzile zya nalyoli lwe akukuvhwa ku zyinyu kuuti,

⁸ ‘Avhantu ivha vhakunshindiha pe pi ilomu vhweleele, ileelo amooyo gaavho gali ukutali niine.

⁹ Kunyila kwavho kwa vhweleele, mwe pe vhakusambiilizya indajizyo izya vhantu, vhakuleha izyane.’”

She shikumuhombezya umuntu

¹⁰ Pe uYeesu ahalyita ivhungaana ilya vhantu, ahalivhuuzya ahati, “Mutejeelezye nu kumanyinsanya zye nkuvhavhuuzya!

¹¹ She shikumwinjila umuntu mwi ilomu, te she shikumuhombezya, nkandi she shikufuma mwi ilomu she shikumuhombezya.”

¹² Pe avhasundikwa vhaakwe vhahasogola kwa Yeesu, vhahamuvhuziilizya vhahati, “Umanyile kuuti aVhafalisaayi lwe vhiivwa amazwi gaala ge waayanzile, vhaavisiitwe nkaani?”

¹³ UYeesu ahaamula ahati, “UTaata waane uwa ku mwanya alivhalovwa avhasambiilizi vhonti vhe vhakusambiilizya zye uweene atálajiziizye, inza vwe umuntu akunyunkulanya imbeyu zye uweene atávhwaye.

¹⁴ Muvhaleshe, mwe pe ivho vhalongozi avhantonko! Inga untonko akumulongola untonko uwamwavho, vhonti vhavhili vhakugwila mwi ilivha!”

¹⁵ Ileelo uPeeteli ahayanga ahati, “Tulondovholele ishiholanyo she waavhavhuziizye aVhafalisaayi.”

¹⁶ UYeesu ahati, “Vhuli, niimwe muli she mutakumanyinsanya?

¹⁷ Mutamanyile kuuti she shikumwinjila umuntu mwi ilomu, shikwinjila muhati yaakwe, havhili pisinda shikufuma kunzi nu kusumbwa ku shikwilo?

¹⁸ Ileelo vwonti vwe vikufuma mwi ilomu ilya muntu, vikufuma mu mwoyo waakwe, ivwo vwe vikumuhombezya umuntu.

¹⁹ Nkuyanga vhwevhulo, mwe pe mu mwoyo uwa muntu, mwe mukufuma insiivho imbiivhi nu vhugozi nu vhuvhembu nu vhulugusu nu vhwivha nu vhwahoome uvhwa ilenga ni ndigo.

²⁰ Zyonti izyo, zye zikumuhombezya umuntu. Ileelo kulya ishisita kugeeza mu nyoovhe kutangamuhombezya umuntu.”

Ulwitiho ulwa mwantanda uMukananaayo

²¹ UYeesu aheepa paala, ahasogola mu nkaaya iya Tiilo ni ya Siidoni.

²² Yeenya, umwantanda wumo uMukananaayo we ahatendamaga ukwo, ahinza kwa Yeesu, ahavhilishila ahati, “We Mwene, Mwana wa Daavhudi, umfwile uvhwila! Umwana waane umulindu alemwilwe nkaani ni mpepo inkandamanu.”

²³ Ileelo uYeesu atahamwamula naashimo. Pe avhasundikwa vhaakwe vhahinza nu kumulaavha kuuti, “Muvhuuzye umwantanda uno ayeepe, mwe pe akutuzumila ahalanga mwisinda.”

²⁴ Ahaamula ahati, “UMulungu ahansonteelezya ku nongwa iya Vhaisilayeeli, mwe pe vhali ngati ngʼonzi zye ziteezile.”

²⁵ Umwantanda uyo ahinza, ahamusugamilila uYeesu, ahamulaavha ahati, “We Mwene, ntuula!”

²⁶ UYeesu ahamwamula ahati, “Te hinza kunyatula ishaakulya isha vhaana nu kuzisumbila imbwa.”

²⁷ Umwantanda uyo ahati, “Mwe muumwo Mwene, ileelo zyope imbwa zikulya utulagala twe tukulagala pansi kufuma pa meeza izya vhamwene vhaavho.”

²⁸ UYeesu ahamwamula ahati, “We mwantanda weewe! Uli nu lwitiho ulupiti nkaani! Yivhombeshe kuli iwe inza vwe ukwanza.” Ahavhaliilizyo hanaaho, umulindu ula ahapona.

UYeesu akuvhaponia avhavhinu

²⁹ Lwe uYeesu ayeepa paala, ahasogola ku luvhazu ulwa sumbi uwa Galilaaya. Ahazuvha pi igamba nu kutendama puupo.

³⁰ Avhantu ivhungaana ipiti vhahasogola kwa Yeesu, vhahavhatwala ku kwakwe avhantendya na vhantonko na vhalemazu na vhashinuunu na vhavhinu avhanji avhinji. Avhantu ivho vhahavhavhiiha avhavhinu pilongolela pa Yeesu, woope ahavhaponia.

³¹ Avhantu ivho vhahasukumila nkaani lwe vhaalola avhashinuunu vhakuyanga, na vhalemazu na vhantendya vhakujenda na vhantonko vhakulola. Vhahamutiima uMulungu uwa Vhaisilayeeli.

UYeesu akuvhaliisya avhantu 4,000

³² Pe uYeesu ahavhiita avhasundikwa vhaakwe, ahavhavhuuzya ahati, “Nkuvhafwila uvhwila avhantu ivha, mwe pe tutendiime navho insiku zitatu, she vhatali ni shaakulya. Ntakwanza imbalaje kuuti vhasogole mu nkaaya zyavho ni nzala, vhatahinze vhazilishe mwi idala.”

³³ Avhasundikwa vhaakwe vhahamuvhuziilizya vhahati, “Ivhungaana ili lipiti nkaani, kwe tushaaje kwoshi pi ilaala ipa ishaakulya isha kuvhakwila vhonti ivha?”

³⁴ UYeesu ahavhavhuziilizya ahati, “Muli na makaati galinga?” Vhahati, “Tuli na makaati 7 nu tuswi tunsi.”

³⁵ Pe uYeesu ahalilajizya ivhungaana ilya vhantu kuuti litendame pansi.

³⁶ Ahanyatula amakaati igo 7 nu tuswi utwo, ahamusalifwa uMulungu, ahamensulanya, ahaavhapa avhasundikwa vhaakwe, vhoope vhahavhagavhila avhantu.

³⁷ Avhantu vhonti vhahalya, vhahiikuta. Pe avhasundikwa vhaakwe vhahavhungaaniha ivwalila, vihiizula ivitundu 7.

³⁸ Avhantu vhe vháliiye ishaakulya isho, vháamile avhanaavuli 4,000 ishi ishisita kuvhaazya avhantanda na vhaana.

³⁹ Lwe alilaga ivhungaana ilya vhantu, uYeesu ahinjila mwi ivhooti, ahasogola mu lutala ulwa Magadaani.