Maliko 8 - ULufingwi uLupwa

UYeesu akuvhaliisya avhantu 4,000

¹ Insiku zyeziila, ivhungaana ipiti nkaani lihavhungaana havhili. Pisinda, avhantu vhaala vhahasililwa ishaakulya. Pe uYeesu ahavhiita avhasundikwa vhaakwe, ahavhavhuuzya ahati,

² “Nkuvhafwila uvhwila avhantu ivha, mwe pe tutendiime navho insiku zitatu, she vhatali ni shaakulya.

³ Inga navhalaga kuuti vhasogole mu nkaaya zyavho ni nzala, kwe vhazilishe mwi idala, havhili vhamo vhafumile ukutali.”

⁴ Avhasundikwa vhaakwe vhahamwamula vhahati, “Ipa pe pi ilaala, naawumo umuntu we angashaaga ishaakulya isha kuvhakwila avhantu vhonti ivha.”

⁵ Ahavhavhuziilizya ahati, “Muli na makaati galinga?” Vhahati, “Tuli na makaati 7.”

⁶ Pe uYeesu ahavhalajizya avhantu kuuti vhatendame pansi. Ahanyatula amakaati igo 7, ahamusalifwa uMulungu, ahamensulanya, ahaavhapa avhasundikwa vhaakwe, vhoope vhahavhagavhila avhantu.

⁷ Inswi zyope zyámile nyinsi vhweleele, ahamulaavha uMulungu kuuti aloote, pe ahati, “Muuvhape avhantu.”

⁸ Avhantu vhahalya, vhahiikuta. Pe avhasundikwa vhaakwe vhahavhungaaniha ivwalila, vihiizula ivitundu 7.

⁹ Avhantu vhe vháliiye ishaakulya isho, vháamile 4,000 ishi. Pe uYeesu ahavhalaga.

¹⁰ Ahalimbila mwi ivhooti pooka na vhasundikwa vhaakwe, vhahasogola ku luvhazu ulwa Dalimanuuta.

AVhafalisaayi vhakwanza ishilolesyo

¹¹ AVhafalisaayi vhahiivwa kuuti uYeesu aafiha, vhahasogola ku kwakwe, vhahataliha kudalinkana nu kumulinga. Vhahanzaga avhalolesye ishilolesyo isha kuhomeshezya kuuti afumile kwa Mulungu.

¹² UYeesu ahaswimiililwa nkaani mu mwoyo waakwe, ahati, “Shooni she avhantu avha havhaliilizyo iha vhakwanza ishilolesyo? Nalyoli nkuvhavhuuzya kuuti, avhantu ivha te mbalolesye ishilolesyo naashimo.”

¹³ Pe uYeesu ahavhaleha aVhafalisaayi, ahinjila havhili mwi ivhooti, ahalamba kwi isyila ilya sumbi.

Umulembo uwa kuluzizya uwa Vhafalisaayi nu wa mwene uHeelodi

¹⁴ Avhasundikwa vháluviilwe kupaya amakaati, ileelo vháali ni ikaati lyoka vhweleele mwi ivhooti.

¹⁵ Lwe vhaakulamba usumbi, pe uYeesu ahavhasoha ahati, “Muvhanje minso nu mulembo uwa kuluzizya uwa Vhafalisaayi nu wa Heelodi.”

¹⁶ Avhasundikwa vhaakwe vhahanda kupanzanya vhuuvho vheeka kuuti, “Ayanga vhwevhulo, mwe pe tutali na makaati.”

¹⁷ UYeesu ahamanya zye vhakupanzanya, ahavhavhuuzya ahati, “Shooni she mukupanzanya kuuti mutali na makaati? Vhuli, mushiili kumanyinsanya nu kuzyaganya? Vhuli, amooyo giinyu magomu?

¹⁸ Muli na minso, ileelo shooni she mutakulola? Muli na makutwi, ileelo shooni she mutakwivwa? Mutakukumbuha

¹⁹ vwe naamensuliinye amakaati gasaano, nu kuuvhapa avhantu vhaala 5,000? Vhuli, mwaasevile ivwalila ivitundu vilinga?” Avhasundikwa vhaakwe vhahamwamula vhahati, “Twásevile ivitundu 12.”

²⁰ Pe ahavhavhuziilizya havhili ahati, “Na makaati gaala 7 ge vháliiye avhantu 4,000, mwásevile ivwalila ivitundu vilinga?” Avhasundikwa vhahati, “Twásevile ivitundu 7.”

²¹ UYeesu ahati, “Mushiili kuzyaganya?”

UYeesu akumuponia untonko uwa ku Betisaayida

²² UYeesu na vhasundikwa vhaakwe vhahafiha mu nkaaya iya Betisaayida. Avhantu vhamo vhahamuleetela untonko, vhahamulambiilizya kuuti amuleme inga amuponie.

²³ UYeesu ahamulema inyoovhe untonko ula, ahasogola nawo kunzi ku nkaaya. Ahamuswilila amati mu minso, nu kumuvhiishila inyoovhe, pe ahamuvhuziilizya ahati, “Ukulola ishooni?”

²⁴ Untonko ahatalanganya, ahati, “Nkulola avhantu, ileelo ngati makwi ge gakujenda.”

²⁵ Ahamuvhiishila inyoovhe havhili ku minso, woope ahatontomela, aminso gahiima minza vhweleele, ahalola vwonti ahinza.

²⁶ UYeesu ahamuvhuuzya umuntu ula ahati, “Vhwelaaga kuhaaya, ileelo utahatuushe mu lutala.”

UPeeteli akuhomeshezya kuuti uYeesu wu Chilisiti

²⁷ UYeesu na vhasundikwa vhaakwe vhaheepa paala, vhahasogola mu ntala zye zili papiipi ni nkaaya iya Kayisaaliya mu Fiilipi. Lwe vhali mwi idala, uYeesu ahavhavhuziilizya avhasundikwa vhaakwe ahati, “Avhantu vhakuti ine ne naanu?”

²⁸ Avheene vhahamwamula vhahati, “Vhamo vhakuti we Yoohani uMwozyi, avhamwavho vhakuti we mukuvhwi uEeliya. Havhili avhamwavho vhakuti we wooka mu vhakuvhwi.”

²⁹ Ahavhavhuziilizya ahati, “Ileelo imwe mukuti ine ne naanu?” UPeeteli ahamwamula ahati, “Iwe we we Chilisiti!”

³⁰ UYeesu ahavhasoha avhasundikwa vhaakwe kuuti vhatahamuvhuuzye naawumo inongwa zyakwe kuuti wu Chilisiti.

UYeesu akuyanga izya kufwa nu kuzyuha kwakwe

³¹ UYeesu ahataliha kuvhasambiilizya avhasundikwa vhaakwe kuuti, “Ne Mwana wa Aadamu nkwanzilwa kuyimba nkaani nu kuhaanwa na vhasongo na vhapiti avha vhapuuti na vhasambiilizi avha ndajizyo, havhili kwe vhangoje. Ileelo isiku ilya vhutatu uMulungu alinzyusya.”

³² Lwe ayanga apazelu izya mayimba gaakwe, uPeeteli ahasaavhuha nawo ku luvhazu, ahataliha kumupilila.

³³ UYeesu ahagalunkana, ahavheenya avhasundikwa vhaakwe, ahamupilila uPeeteli, ahati, “Galuuha mwisinda iwe Seetano, mwe pe zye ukusiivha te zya Mulungu, ukusiivha izya vhantu.”

³⁴ Pe uYeesu ahiita ivhungaana ilya vhantu pooka na vhasundikwa vhaakwe ahati, “Umuntu wonti we akwanza kundandata ine, yikwanzilwa ayihaane wuuyo weeka, ayikungulaje kundandata insiku zyonti, poosye nu kufwa.

³⁵ Umuntu wonti we akwanza kuvhupoha uvhulanzi vhwakwe, alivhulovwa. Ileelo umuntu wonti we akuvhulovwa uvhulanzi vhwakwe ku zyane na kuzya Izwi iLyinza, alivhupoha.

³⁶ Ishi umuntu angalyaga lilonka vhuli, inga avhiiha insi yonti yavha yaakwe, ileelo avhuteezya uvhulanzi vhwakwe?

³⁷ Poosye umuntu angaafumwa shintu vhuli, kuvhutavhula uvhulanzi vhwakwe?

³⁸ Umuntu wonti we akundolela insoni ine na mazwi gaane ku vhavhembu na vhatalamalandu avha havhaliilizyo iha, niine ne Mwana wa Aadamu, ndimuhaana lwe nkwinza havhili nu vhushindamu uvhwa Taata waane, pooka na vhahavhizya avhafinjile.”