Maliko 7 - ULufingwi uLupwa

UYeesu akuhaana insambiilizyo izya Vhafalisaayi

¹ Pe aVhafalisaayi na vhasambiilizi avha ndajizyo izya Moose vhahafuma ku Yelusaleemu, vhoope vhahavhungaana kwilongolela kwa Yeesu.

² Vhahavhalola avhasundikwa vhaakwe vhamo vhakulya ni nyoovhe inkandamanu, mwe pe vhatágeezile inza avheene.

³ AVhafalisaayi na Vhayuuda vhonti vhatahalyanga ishaakulya inga vhatágeezile mu nyoovhe, mwe pe vhálemile amaata aga vhataata vhaavho avha hali.

⁴ Havhili inga vhaafuma ku nsokooni, inga vhatayizelufwizye, vhatahalyanga. Kwámile ni zinji inyinji izya kulandata, inza kwozya impindi ni nsonta ni viliilo ivwa kuteleshela.

⁵ Pe avheene vhahamuvhuziilizya vhahati, “Shooni she avhasundikwa vhaaho vhatakulandata indajizyo izya vhataata vhiitu avha hali? Shooni she vhakulya ni nyoovhe inkandamanu?”

⁶ UYeesu ahavhavhuuzya ahati, “Mwe vhashifumbo imwe! Umukuvhwi uYisaayi áyanzile zya nalyoli lwe akukuvhwa ku zyinyu, inza vwe yisimviilwe mu Vhusimbe uVhufinjile kuuti, ‘Avhantu ivha vhakunshindiha pe pi ilomu vhweleele, ileelo amooyo gaavho gali ukutali niine.

⁷ Kunyila kwavho kwa vhweleele, mwe pe vhakusambiilizya indajizyo izya vhantu.’

⁸ Imwe mulesile indajizyo izya Mulungu, mulemile amaata aga vhantu.

⁹ Imwe mumanyile kupingaaniha indajizyo izya Mulungu, inga mulandataje amaata giinyu.

¹⁰ UMoose átili, ‘Umushindihaje utaata waaho nu maayi waaho.’ Havhili, ‘Wonti we akumuliga uyise, poosye unyina, yikwanzilwa vhamugogaje.’

¹¹ Ileelo imwe mukuti umuntu akwitishilwa kumuvhuuzya uyise poosye unyina kuuti, ‘Ivintu vwe naamile imbapanje, vili Kolibaani,’

¹² pe mutakumwitishila havhili kuvhaavwa avhapaafi vhaakwe.

¹³ Ukwo kwe kulisuufwa izwi ilya Mulungu kwi idala ilya kulandata amaata giinyu ge mukuposhelezanya, havhili mukuvhomba inyinji zye ziholiine niizyo.”

She shikumuhombezya umuntu

¹⁴ UYeesu ahalyita havhili ivhungaana ilya vhantu, ahalivhuuzya ahati, “Mwenti mutejeelezye nu kumanyinsanya zye nkuvhavhuuzya.

¹⁵ She shikumwinjila umuntu, te she shikumuhombezya, nkandi vwe vikumufuma, vwe vikumuhombezya umuntu.

¹⁶ Umuntu we ali na makutwi, atejeelezye.”

¹⁷ Ahalileha ivhungaana ahinjila mu nyumba pooka na vhasundikwa. Avhasundikwa vhahamuvhuziilizya kuuti avhalondovholele amiivhi gaala.

¹⁸ Woope ahati, “Vhuli, niimwe muli she mutakumanyinsanya? Mutamanyile kuuti she shikumwinjila umuntu kufuma kunzi shitangamuhombezya?

¹⁹ Yeenya, shitakumwinjila mu mwoyo, shikumwinjila mu lwanda, nu kusogola ku shikwilo.” Kuyanga vhwevhulo ahavhitishila ivwakulya vwonti.

²⁰ Ahonjezya kuyanga ahati, “Vwe vikufuma kwa muntu vwe vikumuhombezya.

²¹ Yeenya, muhati mu mwoyo wa muntu mwe mukufuma insiivho imbiivhi nu vhulugusu nu vhwivha nu vhugozi

²² nu vhuvhembu ni mpapilo nu vhuvhiivhi nu kuhopenkanya nu vhumalaaya nu mwone nu musaamu na mabaado nu vhupukupuuku.

²³ Imbiivhi zyonti izi zikufuma mwa muntu, havhili zye zikumuhombezya.”

Ulwitiho ulwa mwantanda uMuyunaani

²⁴ UYeesu aheepa ahasogola mu nkaaya iya Tiilo, ahinjila kukwilu mu nyumba yimo. Atahanzaga umuntu inga wooka amanye mwe ali, ileelo ahapootwa kuyizyiha.

²⁵ Áliipo umwantanda wumo we umwana waakwe umulindu áamile ni mpepo inkandamanu. Umwantanda uyo ázyivuuye inongwa izya Yeesu, ahinza ahamusugamilila uYeesu.

²⁶ Umwantanda ula atáamile Muyuuda, áamile Muyunaani, áamile muhaaya uwa ku Silofoyiniike. Ahamulaavha uYeesu amwefwe impepo inkandamanu umwana waakwe.

²⁷ UYeesu ahati, “Leha avhaana vhiikute suuti, te hinza kunyatula ishaakulya isha vhaana nu kuzisumbila imbwa.”

²⁸ Umwantanda uyo ahamwamula ahati, “Mwe muumwo Mwene, ileelo zyope imbwa zye zili pansi pa meeza, zikulya utulagala, lwe avhaana vhakulya.”

²⁹ UYeesu ahati, “Mwe pe waamula ahinza, vhwelaaga kuhaaya. Ukwaga umwana waaho impepo yeefile.”

³⁰ Lwe aafiha kuhaaya, ahaaga umwana waakwe akaasite pa shitala aponile, impepo yeefile.

UYeesu akumuponia we wu shinuunu havhili wu kuutwi

³¹ Pe uYeesu aheepa ku Tiilo, ahatuuha ku Siidoni, ahashila usumbi uwa Galilaaya ahajendeelela nu kufiha mu nsi iya Dekapooli.

³² Lwe aafiha kuula vhahamuleetela ukuutwi we áamile wu shinuunu, vhahamulambiilizya kuuti amuponie.

³³ UYeesu ahamwefwa pe páali impuga, ahiima nawo kukwilu. Ahaswila amati mu nsamba izya nyoovhe zyakwe nu kumulema ulumili lwakwe, ahinjizya insamba izya nyoovhe mu makutwi gaakwe.

³⁴ Aheenya kumwanya, ahiima nu vhuvhaavi mu mwoyo waakwe ahati, “Efaata,” kwe kuuti, “Yiguuha.”

³⁵ Pepaala, amakutwi gahiiguha, ulumili lwe lwágomile luhatonta, ahanda kuyanga ahinza.

³⁶ UYeesu ahavhahaana kuuti vhatahamuvhuuzye naawumo zye zyavhombwa, ileelo vwe ahavhahaanaga vwe vhoope vhahajendelelaga kuzikumusya nkaani.

³⁷ Avhantu vhonti vhahasukumila nkaani, vhahati, “Atuvhombela zyonti ahinza, avhatuula avhakuutwi kwivwa na vhashinuunu kuyanga.”