Maliko 2 - ULufingwi uLupwa

UYeesu ali na maha aga kuvhaswila avhantu uvhutalamalandu

¹ Lwe zyatuuha insiku nyinsi, uYeesu ahagaluha ku Kapelanawuumu na vhantu vhahiivwa kuuti ali pa nkaaya.

² Avhantu avhinji vhahiizula mu nyumba yonti na kunzi vhweleele, woope uYeesu ahalumbililaga izwi ilya Mulungu.

³ Pe vhahinza avhantu vhane, vhamusenziinye pi izagala umuntu we áhataliiye, vhahamutwalaga kwa Yeesu.

⁴ Mwe pe páali ivhungaana ilya vhantu, vhahapootwa apa kumwinjizya mu nyumba, vhahadovhola pamwanya pe uYeesu áamile. Pe vhahamwisya umuvhinu ula she ali pi izagala lyakwe.

⁵ Lwe uYeesu aalola ulwitiho lwavho, ahamuvhuuzya we áhataliiye uyo ahati, “We mwana waane, nakuswila uvhutalamalandu vhwaho.”

⁶ Ileelo avhasambiilizi avha ndajizyo izya Moose vhe vháliipo paala, vhahasiivha mu mooyo gaavho kuuti,

⁷ “Shooni she akumusaamula uMulungu? Ataliipo umuntu we angavhaswila avhantu uvhutalamalandu, nkandi we Mulungu weeka.”

⁸ Ileelo uYeesu ahamanya insiivho zyavho, pe ahavhapilila ahati, “Shooni she mukusiivha izyo mu mooyo giinyu?

⁹ Ishi lili kwoshi lye lipupuusu: kumuvhuuzya we ahataliiye kuuti, ‘Nakuswila uvhutalamalandu vhwaho,’ pamo kuuti, ‘Yimiliila, unyatule izagala lyaho, ujendaje’?

¹⁰ Ileelo ishi, nkwanza mumanye kuuti ne Mwana wa Aadamu indi na maha aga kuvhaswila avhantu uvhutalamalandu mu nsi.” Pe ahamuvhuuzya ula we áhataliiye ahati,

¹¹ “Yimiliila! Nyatuula izagala lyaho, vhwelaaga kuhaaya.”

¹² Pepaala ahimiilila, ahanyatula izagala lyakwe, aheepa she avhantu vhonti vhakumulola. Avhantu vhe vháliipo paala lwe vhaalola vhahasukumila nkaani, vhahamutiima uMulungu, vhahati, “Tutahalola naalumo amafindango inza iga!”

UYeesu akumwita uLaawi kuuti avhe musundikwa waakwe

¹³ UYeesu ahasogola havhili mu luvhazu mwa sumbi uwa Galilaaya. Ivhungaana ilya vhantu lihamulandata, woope ahataliha kuvhasambiilizya.

¹⁴ Lwe akujenda ahamulola umuntu wumo, we izina lyakwe vhahatinji uLaawi, umwana wa Alufaayo, atendiime apa kusonchezezya umusonko. UYeesu ahamuvhuuzya ahati, “Undandate! Uvhe we musundikwa waane.” Woope uLaawi ahimiilila nu kumulandata.

¹⁵ Pe uYeesu ahasogola kulya ishaakulya kwa Laawi. Vhoope avhasonchezya musonko na vhatalamalandu avhamwavho avhinji vhahatendama kulya ishaakulya pooka nu Yeesu na vhasundikwa vhaakwe, mwe pe vháali vhinji vhe vhahamulandataga.

¹⁶ Avhasambiilizi avha ndajizyo izya Moose vhe vháali Vhafalisaayi, lwe vhaalola uYeesu akulya na vhantu vhaala, vhahavhakwinkwina avhasundikwa vhaakwe vhahati, “Shooni she akulya na vhasonchezya musonko na vhatalamalandu?”

¹⁷ Lwe uYeesu ayiivwa amazwi igo, ahavhaamula ahati, “Avhapuuma vhatakumwanza umuganga, nkandi vhe vhavhinile vhe vhakumwanza. Ine ntinzile kuvhiita avhagolosu, nkandi kuvhiita avhatalamalandu, inga vhapindushe.”

Vhakumuvhuziilizya uYeesu izya kuyiima kulya

¹⁸ Ahavhaliilizyo haala avhasundikwa vha Yoohani na Vhafalisaayi vháamile na maata aga kuyiima kulya ishaakulya. Isiku limo, avhantu vhahinza kumuvhuziilizya uYeesu vhahati, “Shooni she avhasundikwa avha Yoohani na vha Vhafalisaayi vhakuyiima kulya, ileelo avhaaho haa?”

¹⁹ UYeesu ahavhaamula ahati, “Vhe vhalanjiliilwe pa winga, vhatakwanzilwa kuyiima, lwe we akwimala ali pooka navho,

²⁰ nkandi insiku zye vhalivheefwezya we akwimala pe vhaliyiima kulya.

²¹ “Ataliipo umuntu we akugambiha ishigamba ishipwa pa mwenda umukaali, mwe pe ishigamba ishipwa shikuzepulanya nu kunanganya nkaani umwenda umukaali.

²² Havhili, ataliipo umuntu we akuvhiiha idivaayi impwa mu mafuuku amakaali aga makwembe. Inga avhomba vhwevhulo, idivaayi iyo yikupunsya amafuuku nu kwitiha, goope amafuuku gakunanjiha. Idivaayi impwa yikwanzilwa kuyivhiiha mu mafuuku amapwa.”

UYeesu wu Mwene uwa Sabaato

²³ Isiku limo ilya Sabaato, uYeesu na vhasundikwa vhaakwe vhahatuuhaga mu magunda aga ngana. Avhasundikwa vhaakwe vhahanda kuvwanula amatwe aga ngana.

²⁴ AVhafalisaayi vhamo vhahamuvhuziilizya uYeesu vhahati, “Indajizyo izya Moose zitakwitishila kuvhomba imbombo pi isiku ilya Sabaato! Shooni she avheene avhasundikwa vhaaho vhakuvhomba?”

²⁵ UYeesu ahavhaamula ahati, “Mutahavhaazya mu Vhusimbe uVhufinjile vwe uDaavhudi ávhomvile, lwe inzala yamuluma pooka na vhamwavho?

²⁶ Áyinjiiye mwi Iheema ilya Mulungu ahavhaliilizyo he uAbiyataali áali mupuuti umupiti uwa Vhayuuda nu kunyatula amakaati ge gáamile mafinjile. Indajizyo izya Moose zitahitishilaga avhantu avhanji kulya amakaati igo, nkandi vhe vhapuuti vheeka, ileelo uDaavhudi ahalya ahaavhapa na vhamwavho.”

²⁷ Ahonjezya ahati, “Isiku ilya Sabaato lyávhisiilwe kumwavwa umuntu, umuntu atápeziilwe kuyivhombela iSabaato.

²⁸ Mumanye kuuti ne Mwana wa Aadamu indi na maha poosye ni Sabaato.”