Maliko 11 - ULufingwi uLupwa

UYeesu akwinjila mu Yelusaleemu nu ludovhelo

¹ Lwe uYeesu na vhasundikwa vhaakwe vhapalamila ku Yelusaleemu, papiipi nu lutala ulwa Besifaage nu lwa Besaniya, muntende mwi igamba ilya Mazayituuni, ahavhasonteelezya avhasundikwa vhaakwe vhavhili.

² Ahavhavhuuzya ahati, “Sogooli mu lutala lwe luli pilongolela lyinyu. Lwe mukwinjila mwenemwo vhweleele, kwe muyilole inyaana iya ndogomi ye yitahalimbilwa nu muntu naalumo, vhayikunjiliiye. Muyisatule, muyileete ipa.

³ Inga umuntu avhavhuziilizya ati, ‘Shooni she mukuvhomba vhwevhulo?’ Muhatinji, ‘UMwene uYeesu akuyanza, kwe ayigalusye shiniishi.’”

⁴ Vhahasogola, vhahayaaga inyaana iya ndogomi pa luvhazu pi idala ipiti, vhayikunjiliiye panzi pa nyumba, pe vhahayisatula.

⁵ Avhantu vhamo vhe vhímiliiye paala lwe vhakusatula, vhahavhavhuziilizya vhahati, “Shooni she mukuyisatula inyaana ino iya ndogomi?”

⁶ Vhahavhaamula inza vwe uYeesu ávhalajiziizye, vhoope vhahavhitishila.

⁷ Vhahamutwalila uYeesu inyaana yiila iya ndogomi, vhahaala amenda gaavho gamo pamwanya pa ndogomi iyo, pe uYeesu ahalimbila nu kutendama penepo.

⁸ Avhantu avhinji vhahaala amenda gaavho gamo mwi idala, vhamo amatundu ge vhátemile mu magunda.

⁹ Avhantu vhonti vhe vhálongoleeye na vhe vhahalandataga mwisinda mwa Yeesu, vhahavhilishilaga vhahatinji, “Ashindikwaje uMulungu! Alosiitwe we akwinza kwi izina ilya MWENE uMulungu!

¹⁰ Vhulosiitwe uvhumwene uvhwa taata wiitu uDaavhudi vhwe vhukwinza. Ashindikwaje uMulungu uMupiti uwa ku Mwanya!”

¹¹ UYeesu na vhasundikwa vhaakwe vhahafiha mu nkaaya iya Yelusaleemu, vhahinjila pa Nyumba iMfinjile. UYeesu ahenyeelezya ahinza mwonti, mwe háamile havhaliilizyo ha hamazuuvha, ahafuma pooka na vhasundikwa vhaakwe 12, vhahasogola ku Besaniya.

UYeesu akulitipa itiini

¹² Isiku ilya vhuvhili inzanshi, uYeesu na vhasundikwa vhaakwe vhahafuma ku Besaniya, inzala yihamuluma uYeesu.

¹³ Ahalilola ikwi ilya itiini ukutali, lilemvile amatundu aminji. Ahalipalamila, inga ayeenye inga lihomile amantonongwa. Lwe aafiha, ahaaga lili na ge matundu geeka, mwe pe hatáamile havhaliilizyo ha mantonongwa.

¹⁴ Pe ahalivhuuzya ikwi ilyo ahati, “Kufuma ileelo ili na shiima, umuntu atahagaaje amantonongwa kufuma muli iwe.” Avhasundikwa vhaakwe vhahiivwa vwe akuyanga.

UYeesu akuyizelufwa iNyumba iMfinjile

¹⁵ Vhahafiha mu Yelusaleemu, uYeesu ahinjila pa Nyumba iMfinjile. Ahanda kuvhashimbizya vhe vhahakazyaga nu kukala ivintu ipo. Ahazibenula imeeza izya vhe vhahatananiaga impiiya nu kuvibenula ivitengo ivwa vhe vhahakazyaga inkunda.

¹⁶ Ahavhahaana vhonti kwinjizya ivintu ivwa kukazya pa Nyumba iMfinjile.

¹⁷ Ahataliha kusambiilizya, ahati, “Yisimviilwe mu Vhusimbe uVhufinjile kuuti, ‘INyumba yaane yiliivha Nyumba iya kupuutila avhantu avha nsi zyonti.’ Ileelo imwe muyivhiisile kuvha ‘lishembo ilya vhapumula vintu.’”

¹⁸ Avhapiti avha vhapuuti na vhasambiilizi avha ndajizyo izya Moose vhahazyivwa zye avhomba, vhahanda kulondola idala ilya kumugoga. Ileelo vhógofile kumulema, mwe pe ivhungaana ilya vhantu lihasukumilaga insambiilizyo zyakwe.

¹⁹ Lwe haafiha ahavhaliilizyo aha hamazuuvha, uYeesu na vhasundikwa vhaakwe vhaheepa mu nkaaya muula.

UYeesu akusambiilizya izya kuvhaswila avhanji

²⁰ Indaavhi yaakwe inzanshi, lwe vhakutuuha vhahalilola itiini liila lyumile lyonti na mazi vhweleele.

²¹ UPeeteli ahakumbuha izya itiini liila, ahati, “Musambiilizi, yeenya itiini lye waalitifile lyumile!”

²² UYeesu ahamwamula ahati, “Mumwitihaje uMulungu.

²³ Nalyoli nkuvhavhuuzya kuuti, umuntu wonti inga alivhuuzya igamba ili ati, ‘Kumpuuha ipa, uyisumbe mwa sumbi muula,’ inga atali na maganigani mu mwoyo waakwe, ileelo akwitiha kuuti nalyoli zye akulaavha zikuvhombeha, zilivhombeha.

²⁴ Kuli izyo, nkuvhavhuuzya kuuti, vwonti vwe mukulaavha lwe mukupuuta, nalyoli mwitihaje kuuti mwaposheela, uMulungu kwe avhapanje.

²⁵ Lwe mukwimiilila kupuuta, inga umuntu wonti avhavhombeeye ivhiivhi mumuswilaje, inga uTaata wiitu uwa ku mwanya avhaswilaje niimwe uvhupuvi vhwinyu.”

²⁶ Ileelo inga mutakuvhaswila avhanji, woope uTaata wiitu uwa ku mwanya atangavhaswila niimwe uvhupuvi vhwinyu.

Avhalongozi vhakwanza kumanya amaha aga Yeesu

²⁷ Vhahafiha ku Yelusaleemu havhili, uYeesu ahajendaga pa Nyumba iMfinjile. Avhapiti avha vhapuuti na vhasambiilizi avha ndajizyo na vhasongo vhahamusogolela.

²⁸ Vhahamuvhuziilizya vhahati, “Tuvhuuzye, ukuvhomba izi ku maha aga naanu? Havhili, wu naanu we akupiiye amaha igo?”

²⁹ UYeesu ahavhaamula ahati, “Niine imbavhuziilizye lyoka, inga mwanaamula pe kwe mbavhuuzye kuuti maha vhuli ge nkuvhombela izi.

³⁰ Vhuli, amaha aga Yoohani aga kwozya avhantu, gáfumile kwa Mulungu, pamo ku vhantu? Munaamule.”

³¹ Pe vhahapanzanya vhuuvho vheeka vhahati, “Inga twati gáfumile kwa Mulungu, kwe ati, ‘Pe shooni she mutámwitisile?’

³² Poosye inga twati gáfumile ku vhantu, avhantu kwe vhaviitwe.” Vhahoogopa, mwe pe avhantu vhonti vhámanyile kuuti uYoohani áamile mukuvhwi uwa nalyoli.

³³ Pe vhahamwamula vhahati, “Tutamanyile.” Woope uYeesu ahavhavhuuzya ahati, “Niine ntakuvhavhuuzya kuuti, maha ga naanu ge nkuvhombela izi.”