Ishitushizya 6 - ULufingwi uLupwa

AHagonzi aha MWENE uMulungu ni vilemezanyo

¹ Pe nkalola aHagonzi aha MWENE uMulungu hahavunza ishilemezanyo shooka. Nkiivwa ishipelwa shooka mu viila vine shikuyanga fwe lizwi lye likujilima likuti, “Luvhiilo!”

² Nkalola imfwalaasi inzelu, nu weene we áyilimbiiye áali nu vhwele, ahapeelwa ishipambwi isha kukonzezya, pe ahafuma ku mwanya she akupoota uvhulugu, havhili inga ajendeelele kupoota.

³ Pe lwe aHagonzi aha MWENE uMulungu havunza ishilemezanyo isha vhuvhili, nkiivwa ishipelwa isha vhuvhili shikuti, “Luvhiilo!”

⁴ Yihafuma imfwalaasi inshemamu, nu weene we áyilimbiiye ahapeelwa amaha aga kwefwa uvhutehamu mu nsi, inga avhantu vhagogane, woope ahapeelwa ipanga ipiti.

⁵ Pe lwe aHagonzi aha MWENE uMulungu havunza ishilemezanyo isha vhutatu, nkiivwa ishipelwa isha vhutatu shikuti, “Luvhiilo!” Nkalola imfwalaasi inyiilu, nu weene we áyilimbiiye áali ni shipimilo mu nyoovhe zyakwe.

⁶ Nkiivwa fwe lizwi pahati iya vipelwa viila vine, likuti, “Ishiivho shooka isha ngana ku dinaali yooka, ni vwivho vitatu ivwa shayiili ku dinaali yooka, ileelo utahananganye amafuta, poosye idivaayi.”

⁷ Pe lwe aHagonzi aha MWENE uMulungu havunza ishilemezanyo isha vhune, nkiivwa ishipelwa isha vhune shikuti, “Luvhiilo!”

⁸ Nkalola imfwalaasi imvuutu nu weene we áyilimbiiye izina lyakwe wu Vhufwe, havhili woope uVhuzimu ahalandatana nawo. Vhoope vhahapeelwa amaha ku shigavho shooka pa vigavho vine ivwa vhantu, inga vhavhagoje kwi ipanga na ku nzala na ku vhuvhinu na ku vihanu ivihali ivwa mu nsi.

⁹ Pe lwe aHagonzi aha MWENE uMulungu havunza ishilemezanyo isha vhusaano, nkalola impepo izya vhantu zili pansi pa shifinjilo. Avhantu ivho vhe vhávholiilwe kuzya kulyitiha izwi ilya Mulungu na kuzya vhwahoome vhwe vhahafumwaga.

¹⁰ Vhahakuuta kwi izwi ipiti, kuuti, “We MWENE Mulungu uwa Maha Gonti, Mufinjile nu Wa Nalyoli, kuuti uhaavhe kufishila lyeli, kuvhalonga nu kuvhalanduzya avhantu vhonti avha pa nsi, kuzya kwita amavhanda giitu?”

¹¹ Pe vhonti vhahapeelwa amenda amazelu. Havhili vhahavhavhuuzya kuuti, vhaguliilile ku havhaliilizyo hansi, kufishila uvhwinji uvhwa vhavhomvi avhamwavho na vhajenzi vhaavho pe vhwalunjiha. Ivho vhe avhalugu avha Mulungu avha pa nsi vhalivhagoga inza vheene vwe vhávhagozile.

¹² Pe lwe aHagonzi aha MWENE uMulungu havunza ishilemezanyo isha 6, nkiivwa ishisumbi ishipiti. Izuvha lihavha lyilu ngati ligunila lye litaviilwe ni isinka, umwezi wonti wuhashemama inza amavhanda.

¹³ Inzota zihagwa pansi, ngati mavhula vwe gakupulula imbula lwe inkungu impiti yavugula.

¹⁴ Imwanya yiheepa, inza vwe italataasi likuzingwa, amagamba gonti ni nsi inyuumu izya pahati pa sumbi viheepa pa vhutendamo vhwavho.

¹⁵ Pe avhamwene avha mu nsi na vhapiti vha vhasikaali na vhapiti avhamwavho na vhadumbwe na vha maha na vhazya vhonti na vhe te vhazya vhonti, vhahazyihama mu mashembo na pansi mu mavhwe aga magamba.

¹⁶ Ivho vhonti vhahagavhuuzya amagamba na mavhwe kuuti, “Tubongoshele, mutuzyishe, atahatulole uMulungu uweene we atendiime pa shitengo isha vhumwene. Havhili mutuzyishe kufuma ku mulaha uwa Hagonzi aha MWENE uMulungu.

¹⁷ Mwe pe isiku ipiti ilya mulaha waavho lifisile. Wu naanu we angimiilila?”