Ishitushizya 5 - ULufingwi uLupwa

Ikalaata na Hagonzi aha MWENE uMulungu

¹ Ku nyoovhe iya kundiilo iya ula we átendiime pa shitengo isha vhumwene, nkalola ikalaata lye lisimviilwe muhati na munzi, lipinyiilwe ni vilemezanyo 7.

² Nkalola uhavhizya uwa maha, akukumusya kwi izwi ipiti akuti, “Wu naanu we ahondeeye kugubula ikalaata nu kuvunza ivilemezanyo vwakwe?”

³ Kutáali umuntu nuumo, ku mwanya, poosye pa nsi, poosye ku vhuzimu, we áhondeeye kugubula ikalaata ilyo, poosye kulyenya muhati.

⁴ Pe nkanda kukuuta nkaani, mwe pe ntahashilola ishipelwa naashimo she sháhondeeye kuligubula, poosye kulyenya muhati.

⁵ Pe wumo mu vhaala avhasongo ahambuuzya ahati, “Utakuutaje! Yeenya, iNsama iya mu nkolo iya Yuuda, mu mpaapo izya mwene uDaavhudi, ye yipoosite uvhulugu. Iyeene ye yihondeeye kuvunza ivilemezanyo ivwo 7, nu kugubula ikalaata ilyo.”

⁶ Pe nkalola aHagonzi aha MWENE uMulungu he háamile fwe havholiilwe, himiliiye pahati pa shitengo isha vhumwene ni vipelwa viila vine na vhasongo vhaala. Háamile ni mpembe 7 na minso 7, ge Mpepo 7 izya Mulungu zye ázisonteleziizye mu nsi yonti.

⁷ Hahinza kunyatula ikalaata liila ku nyoovhe iya kundiilo iya ula we átendiime pa shitengo isha vhumwene.

⁸ Lwe hanyatula ikalaata ilyo, ivipelwa viila vine pooka na vhasongo vhaala 24 vhahakupama pilongolela ilya Hagonzi aha MWENE uMulungu. Vhonti vháamile na mapango ni mbiga izya sahaabu zye zyízuuye ivwa kusuushizya vwe vikununshila. Ivwa kusuushizya ivwo zye mpuuto zya vhafinjile.

⁹ Vhahimba ulwimbo ulujeni vhahati, “Uhondeeye iwe kulinyatula ikalaata ilyo nu kuvunza ivilemezanyo vwakwe. Mwe pe wávholiilwe, na ku mavhanda gaaho uhamukalila uMulungu, avhantu kufuma mu nkolo zyonti na mu njango zyonti, havhili kufuma mu mpuga zyonti na mu nsi zyonti.

¹⁰ Uhavhinjizya mu vhumwene vhwaho nu kuvhavhiiha kuvha vhapuuti kwa Mulungu wiitu, vhoope vhaliyikonzya insi yonti.”

¹¹ Pe nkeenya, nkiivwa amazwi aga vhahavhizya avhinji vhe vháshizyunguluuye ishitengo isha vhumwene ni vipelwa vine na vhasongo vhaala 24. Uvhwinji vhwa vhahavhizya wáamile amashumi na mashumi.

¹² Vhahimba kwi izwi ipiti vhahati, “AHagonzi aha MWENE uMulungu he hávholiilwe hahondeeye kuposheela amaha amasisya nu vhudumbwe, nu vhushindamu uvhwa njeele na maha, nu mushinzi nu vhushindamu ni ntiimo!”

¹³ Pe nkiivwa ivipelwa vwonti vwe vili ku mwanya na vwe vili pa nsi na vwe vili ku vhuzimu na vwe vili mwa sumbi vikwimba. Vihatinji, “Uweene we atendiime pa shitengo isha vhumwene, na Hagonzi aha MWENE uMulungu, vhahondeeye kuposheela intiimo, nu mushinzi nu vhushindamu na maha gonti shiima shiima.”

¹⁴ Ivipelwa viila vine vihati, “Amina.” Vhoope avhasongo vhaala 24 vhahakupama nu kupuuta.