Ishitushizya 16 - ULufingwi uLupwa

Imbiga 7 zye zyizuuye uvhuhalazu uvhwa Mulungu

¹ Nkiivwa izwi ipiti kufuma aPafinjile apa Mulungu, likuvhavhuuzya avhahavhizya vhaala 7 likuti, “Sogooli, mwite imbiga izyo 7 izya vhuhalazu uvhwa Mulungu mu nsi.”

² Pe uhavhizya umutanzi ahasogola, ahiitila vwe vwáli mu luvhiga lwakwe pa nsi. Amapumba amavhiivhi havhili ge gakuvhavha nkaani, gahavhalema vhonti vhe vháamile ni shimanyilo isha shihanu shiila na vhaala vhe vhahashipuutaga ishiholanyo shaakwe.

³ Pe uhavhizya uwa vhuvhili ahiitila vwe vwáli mu luvhiga lwakwe mwa sumbi. Woope usumbi ahavha mavhanda geeka ngati mavhanda ga muntu we afuuye, ni vipelwa vwonti vwe vipuuma mwa sumbi vihafwa.

⁴ Pe uhavhizya uwa vhutatu ahiitila vwe vwáli mu luvhiga lwakwe mu majenje na mu viduda ivwa minzi, vwope vihagalunkana kuvha mavhanda.

⁵ Pe nkiivwa uhavhizya umwimiilizi uwa minzi akuti, “We Mufinjile, we uliipo na we wáliipo! Iwe we mugolosu, mwe pe walonga izi.

⁶ Mwe pe avhantu ivho vhíisite amavhanda aga vhafinjile na vhakuvhwi, niiwe waavhapa amavhanda vhamwele. Vhahondeeye izyo!”

⁷ Pe nkiivwa izwi kufuma pa shifinjilo likuti, “Mwe muumwo, MWENE Mulungu uwa Maha Gonti! Uvhulonzi vhwaho vhwa nalyoli, havhili vhugolosu!”

⁸ Pe uhavhizya uwa vhune ahiitila vwe vwáli mu luvhiga lwakwe kwi izuvha. Izuvha lihapeelwa amaha aga kuvhoosha avhantu ku mwoto waakwe.

⁹ Pe avhantu vhahapwa havhiivhi nkaani. Vhahamuliga uMulungu, uweene we ali na maha ku mfwa izyo. Ileelo vhatápindusile nu kumushindiha uMulungu.

¹⁰ Pe uhavhizya uwa vhusaano ahiitila vwe vwáli mu luvhiga lwakwe pa shinamwene ishipiti isha shihanu shiila. Ishiisi shihagwa ku vhumwene vhwakwe, avhantu vhahalumanya imili zyavho kuzya vhuvhaavi vhwavho.

¹¹ Vhahamuliga uMulungu uwa ku mwanya kuzya vhuvhaavi vhwavho na mapumba gaavho. Ileelo vhatápindusile ku lujendo lwavho uluvhiivhi.

¹² Pe uhavhizya uwa 6 ahiitila vwe vwáli mu luvhiga lwakwe mwi ijenje ipiti lye vhakuti uEefulaati. Aminzi gaakwe gahuuma, inga idala ilya vhamwene vhe vhakufuma kuvhutukulo lipelwe.

¹³ Pe nkalola impepo inkandamanu zitatu zye zili ngati vhe vhachuula. Impepo izyo zikufuma mwi ilomu ilya iyoha ilyo na mwi ilomu ilya shihanu shiila ishitanzi na mwi ilomu ilya shihanu shiila isha vhuvhili she mukuvhwi uwa ilenga.

¹⁴ Izyo zye mpepo izya gaseetano zye zikuvhomba ivilolesyo. Zye zila zye zikusogola ku vhamwene avha nsi zyonti kuvhavhungaaniha pooka kuzya vhulugu, isiku liila ipiti lye uMulungu uwa Maha Gonti alivhalonga avhantu vhonti.

¹⁵ UYeesu ahayanga ahati, “Yeenyi, ine nkwinza kwi idala ilya kwitushizya inza umwivha! Alosiitwe umuntu we ali minso nu kuzwala amenda gaakwe, inga atahinze asogole ishitali ukwo nu kulola insoni apazelu.”

¹⁶ Pe impepo izyo zihavhavhungaaniha avhamwene ivho na vhasikaali vhaavho pa vhuyo, pe ku Shihebuuli vhakuti Helimagedooni.

¹⁷ Pe uhavhizya uwa 7 ahiitila vwe vwáli mu luvhiga lwakwe mu mwanya. Izwi ipiti lihivwiha kufuma ku shitengo isha vhumwene, mu Nyumba iMfinjile, lihati, “Uvhusililishilo vhwafiha!”

¹⁸ Kuhavha ulumesyo ni izwi lye likujilima ni shisumbi ishipiti she shitahavha naalumo kufuma pe uMulungu ámupezile umuntu.

¹⁹ UMulungu atáyiluviilwe iBabeeli, inkaaya impiti. Áyimwensiizye ulupindi ulwa divaayi inkali iya vhuhalazu vhwakwe uvhupiti. Pe inkaaya yiila impiti yihatapunkana imbazu zitatu, zyope inkaaya izya nsi zyonti zihananjinkana.

²⁰ Insi inyuumu izya pahati pa sumbi zyonti zihateega, goope amagamba gatálolesile havhili.

²¹ Imvula iya mavhwe amapiti yihavhatoonyela avhantu, amavhwe igo gáali nu vhumwamu uvhwa kiilo 50 ishi ivhwe lyoka. Vhoope avhantu vhahamuliga uMulungu kuzya mfwa iya mvula iyo iya mavhwe. Mwe muumwo, imfwa iya mvula iyo iya mavhwe yáali mpiti nkaani.