Ishitushizya 10 - ULufingwi uLupwa

Uhavhizya ni ikalaata ilinsi

¹ Pe nkalola uhavhizya uwamwavho uwa maha, akwiha kufuma ku mwanya. Ázwaye ivhingo, havhili igombogombo lyáli pi itwe lyakwe pamwanya, ku minso gaakwe áamile inza izuvha, ivinama vwakwe vwáli ngati mpanda izya mwoto.

² Ku nyoovhe yaakwe álemile ikalaata ilinsi lye lyágubuliilwe. Woope ahahanya ishinama shaakwe isha kundiilo mwa sumbi, shoope isha kumongo ahahanya pa nsi inyuumu.

³ Ahahoola kwi izwi ipiti, ngati nsama vwe yikumoota. Lwe ahoola, amazwi 7 aga kujilima gahivwiha.

⁴ Amazwi 7 aga kujilima lwe givwiha, náyisengiinye kusimba, ileelo nkiivwa izwi kufuma ku mwanya likuti, “Galemezanye amazwi igo ge gáyanziilwe ku mazwi 7 aga kujilima, utahagasimbe.”

⁵ Woope uhavhizya ula we námuvhwenyi ahanyile mwa sumbi na pa nsi inyuumu, ahavhuusya inyoovhe yaakwe iya kundiilo kumwanya.

⁶ Ahalapa kwa Mulungu uweene we mulanzi shiima shiima, we ahapela ku mwanya na vwe vili kuukwo ni nsi na vwe vili muumwo nu sumbi na vwe vili muumwo. Ahati, “Te pahaavhe havhili, lwe izi zyatuuha.

⁷ Ileelo mu manda igo lwe uhavhizya uwa 7 apalamila kuhoma isaji lyakwe, uluvhaatiho ulwa vhuzigizigi ulwa Mulungu lulilunjiha. Lulilunjiha inza vwe ávhalumbiliiye avhavhomvi vhaakwe avhakuvhwi.”

⁸ Pe izwi liila lye nályivuuye kufuma ku mwanya lihayanga niine havhili lihati, “Sogoola ulinyatule ikalaata liila lye ligubuliilwe ku nyoovhe iya havhizya ula, we ahanyile mwa sumbi na pa nsi inyuumu.”

⁹ Pe nkasogola kwa havhizya ula nkamuvhuuzya kuuti, ampe ikalaata ilinsi ilyo. Ahambuuzya ahati, “Linyatule ulye, inga waalya kwe livhe linonu inza uvhwushi mwi ilomu, ileelo muhati yaaho kwe livhe lihali.”

¹⁰ Nkalinyatula ikalaata ilinsi ilyo lye lyámile ku nyoovhe iya havhizya ula, nkaalilya. Lyope lihanona inza uvhwushi mwi ilomu lyane, ileelo lwe nalimila lihavha lihali muhati yaane.

¹¹ Pe vhahambuuzya vhahati, “Ukwanzilwa kufumwa uvhukuvhwi ku mpuga inyinji na ku nsi inyinji na ku njango inyinji na ku vhamwene avhinji.”