iMbombo izya Vhatumwa 6 - ULufingwi uLupwa

Vhakuvhasevha avhatuuli 7 avha vhatumwa

¹ Insiku izyo, uvhwinji uvhwa vhalandati avha Yeesu vhuhonjelaga nkaani. Muli ivho, vháliipo aVhayuuda vhe vhahayangaga injango iya Shiyunaani, na vhe vhahayangaga injango iya Shiyalaamu. Isiku limo kuhafumila kuyivhuna. AVhayuuda vhe vhahayangaga iShiyunaani vhahayivhunaga kuuti avhaziishe vhaavho vhahavhaluvwaga kuvhagavhila ivwakulya insiku zyonti.

² Pe avhatumwa vhaala 12 vhahavhavhungaaniha avhalandati vhonti, vhahavhavhuuzya vhahati, “Te hinza kuuti iswe tuleshe kusambiilizya izwi ilya Mulungu, inga tuvhagavhilaje avhantu ivwakulya.

³ Ishi vhamwitu, kuli imwe musevhe avhantu 7 vhe muhomesheziizye kuuti vhali nu lujendo ulwinza, havhili vhizuuye uMupepo uMufinjile nu kuvha nu vhushindamu uvhwa njeele nkaani. Ivho vhe tuvhavhiishe mu mbombo ino iya kugavhanya ivwakulya,

⁴ niiswe tujendeelele kumulaavha uMulungu, nu kusambiilizya avhantu izwi lyakwe.”

⁵ Izwi ilyo lihahondela nkaani pilongolela lyavho. Pe vhahamusevha uSiteefani, umuntu we áyizuuye ulwitiho nu Mupepo uMufinjile. Havhili vhahamusevha uFiilipo nu Pulokolo nu Nikanooli nu Tiimoni nu Palimeena nu Nikolaawo uwa ku Antiyookiya, we atáamile Muyuuda, ileelo áyinjiiye mu shipuuto isha Vhuyuuda.

⁶ Vhahavhavhiiha pilongolela ilya vhatumwa. Pe avhatumwa ivho vhahavhapuutila, nu kuvhavhiishila inyoovhe pamwanya yaavho kuvhaloota.

⁷ Izwi ilya Mulungu lihajendeelela kukumuha mu vhantu, avhalandati avha Yeesu vhahonjelaga kuvha avhinji mu Yelusaleemu, na vhapuuti avhinji vhoope vhahamwitihaga uYeesu.

Vhakumulema uSiteefani

⁸ UMulungu ámupiiye uSiteefani uvhwila na maha aminji, ahavhombaga izya kusukumizya ni vilolesyo ivipiti ku vhantu.

⁹ Ileelo aVhayuuda vhamo vhahalinga kudalinkana nu Siteefani. Ivho vháfumile mwi isinagoogi lye vhahatinji ilya Vhantu aVhasatushe. Vhamo muli ivho vháfumile mu nkaaya iya Kileene ni ya Alekizandiliya, vhamo vháfumile mu shigavho isha nsi isha Kiliikiya ni sha Aasiya.

¹⁰ Ileelo ahavhapootaga, mwe pe ahayangaga amazwi aga vhushindamu uvhwa njeele ku maha aga Mupepo uMufinjile.

¹¹ Pe vhahavhavhiiha avhantu vhamo, inga vhayanje ilenga kuuti, “Twivuuye uSiteefani akuyanga amazwi aga kumusaamula uMoose nu Mulungu!”

¹² AVhayuuda ivho, vhahavhaviisya nkaani avhasongo vhaavho na vhasambiilizi avha ndajizyo izya Moose, pooka na vhantu avhanji. Pe vhahamulema uSiteefani, vhahamutwala pa lukuvhato ulupiti ulwa vhalongozi avha Vhayuuda.

¹³ Vhahavhaleeta avhahoome avha ilenga pa lukuvhato ulwo, pe avhahoome ivho vhahati, “Umuntu uno, atakuleha kuyanga amazwi aga kuliga iNyumba iMfinjile ni ndajizyo izya Moose!

¹⁴ Twaamwivuuye akuyanga kuuti, uYeesu uwa ku Naazaleeti aliyinanganya iNyumba iMfinjile ino, havhili aligalulanya amaata ge uMoose átulesheeye.”

¹⁵ Avhantu vhonti vhe vhátendiime mu lukuvhato ulwo, vhahamutontomela uSiteefani ku minso, vhahalola ku minso gaakwe kwavha ngati wu havhizya.