iMbombo izya Vhatumwa 28 - ULufingwi uLupwa

UPaavhuli ku Meliita

¹ Lwe twapokwa mwa sumbi, tuhamanyinsanya kuuti, insi inyuumu iyo vhakuti iMeliita. Insi iyo yáamile pahati pa sumbi.

² Avhahaaya avha pa Meliita vhahatwavwa nkaani. Vhahatupembela umwoto uwa kwota, mwe pe kwámile impepo, havhili imvula yihatimaga.

³ UPaavhuli ahateenya inkwi, ahazivhiiha mu mwoto. Kufumiilana ni ilunguula, injoha yihafuma mu nkwi izyo, yihamudiba uPaavhuli inyoovhe.

⁴ Avhahaaya avha mu nsi iyo, lwe vhayilola injoha yiila yikulembeela ku nyoovhe iya Paavhuli, vhahavhuuzanya vhahati, “Yikulolesya kuuti umuntu uno mugozi! She poosye aponile mwa sumbi, umulungu wiitu ‘uWa Nalyoli’ atamwitisile kuuti ajendeelele kulandila!”

⁵ Ileelo uPaavhuli ahayisanyantila injoha iyo mu mwoto, atávwalaaye naapamo.

⁶ Avhantu vhaala vhahasiivhaga kuuti uPaavhuli kwe avimbe, poosye kuuti kwe agalagaate pansi nu kufwa. Lwe vhenyeelezya ku havhaliilizyo ahatali, vhataalola ivhiivhi naalimo lye likumwaga, vhahagalulanya insiivho zyavho, vhahanda kuuti uPaavhuli wu mulungu.

UPaavhuli akumuponia utaata uwa mupiti uwa ku Meliita

⁷ Pe twámile ipo, páali pe papiipi na magunda aga mupiti uwa nsi iyo, ye yáamile pahati pa sumbi. Izina lyakwe umupiti uyo vhahatinji uPabuliyo. Ahatuposheela ahinza, tuhadiila insiku zitatu ku kwakwe.

⁸ Ahavhaliilizyo iho, utaata uwa Pabuliyo ákaasite pa shilili, mwe pe ávhinile inzegema nu kuhaalisya amavhanda. UPaavhuli ahinjila muhati mwe umuvhinu áamile. Ahamulaavhila kwa Mulungu, ahamuvhiishila inyoovhe pamwanya pa kwakwe, ahamuponia.

⁹ Lwe amuponia umuntu uyo, pe avhavhinu avhanji vhonti mu nkaaya iyo, vhahinza kwa Paavhuli, woope ahavhaponia.

¹⁰ Avhantu avha paala vhahatushindiha nkaani. Lwe tukuyisengaanya kwepa ni meeli iyinji, vhahatupashiilila ivintu vwonti vwe twásovheliilwe.

UPaavhuli akufiha ku nkaaya iya Luumi

¹¹ Lwe twamala ameezi gatatu mu nkaaya iyo, tuheepa ni meeli yimo iya mu nkaaya iya Alekizandiliya. Imeeli iyo yihagulililaga kuuti ahavhaliilizyo aha lupepu hasile. Izina lyakwe vhahatinji, aVhalungu vhe Mapasa.

¹² Pisinda, tuhafiha mu nkaaya iya Silakuusa. Tuhadiila insiku zitatu muumwo.

¹³ Kufuma ipo tuhazyunguula tuhafiha mu nkaaya iya Leegiyo. Lwe kwasha, inkungu yihavugula kufuma ku luvhazu ulwa kuntende. Inkungu iyo yihatwavwa, indaavhi yaakwe tuhafiha mu nkaaya iya Puteyooli.

¹⁴ Umwo tuhahomaana na vhamwitu, vhahatulambiilizya kuuti tutendame navho insiku 7. Isho, vwe twáfisile mu nkaaya iya Luumi.

¹⁵ Avhamwitu avha ku Luumi vhahiivwa kuuti tuli mwi idala kusogola ku kwavho. Pe vhahinza kutuposheela, vhamo vhahatuguliilila pa nsokooni ye vhahatinji iAapiyo, avhamwavho pe vhahatinji iNyumba Zitatu izya Vhajeni. Lwe uPaavhuli avhalola, ahamusalifwa uMulungu, ahagoma umwoyo.

¹⁶ Lwe twafiha mu nkaaya iya Luumi, uPaavhuli ahitishilwa kuuti atendamaje weeka, vhahavhiiha umusikaali uwa kumuguulila.

¹⁷ Lwe twamala insiku zitatu, uPaavhuli ahavhiita avhapiti avha Vhayuuda avha paala. Lwe vhavhungaana, ahavhavhuuzya ahati, “Mwe vhamwitu, pooka nu kuuti ntávhomvile ivhiivhi naalimo ku vhajenzi vhiitu, poosye kuzya maata ge avhataata vhiitu vhátulesheeye, aVhayuuda vhándemile mu Yelusaleemu nu kumbiiha mu nyoovhe izya Vhaluumi.

¹⁸ AVhaluumi ivho lwe vhambuziilizya ahinza, vhahanza kunsatula, mwe pe vhatahalola ivhiivhi naalimo lye návhomvile, lye nkanzilwaga kufwa.

¹⁹ Ileelo aVhayuuda vhamo vhahahaana kuuti nsatulwe. Pe nkapootwa ilya kuvhomba, nkalaavha kuuti umulandu waane wulongwe nu Kayisaali, pooka nu kuuti ntáali naalimo ilya kuvhalonjeelela aVhayuuda avhamwitu.

²⁰ Pe ishi, naavhalambiliziizye kuuti mwinze tulolane nu kuyanga niimwe. Nkunziilwe na manyoloolo iga, kuzya lusuuvhilo luula lwe aVhaisilayeeli vhonti vhakulusuuvhila.”

²¹ Pe avhapiti ivho, vhahamwamula uPaavhuli vhahati, “Iswe tutali nu kalaata we tuposheleeye kufuma ku Yudeeya we akupanga inongwa zyaho. Havhili ataliipo uwamwitu nuumo we ayinzile ipa kufuma ukwo, nu kuyanga imbiivhi zimo ku zyaho.

²² Ileelo tukwanza kwivwa kuli iwe zye ukusiivha, mwe pe kuzya mpuga ye ukuyilandata, tumanyile kuuti yikuyangwa havhiivhi kwonti.”

²³ Pe vhahitinkana nu Paavhuli isiku ilya kuvhungaana mu nyumba ye ahatendamaga. Isiku ilyo lwe lyafiha, aVhayuuda vhahavhungaana ku vhwinji kuluusya isiku ilya pisinda. UPaavhuli ahavhapanjila inongwa inyinji kufuma inzanshi kufishila hamazuuvha. Ahavhalumbililaga inongwa izya vhumwene uvhwa Mulungu. Ahavhasinjilizyaga kuuti vhoope vhamwitishe uYeesu, ahavhombaga vhwevhulo kwi idala ilya kuvhalolesya amazwi ge gakupanga inongwa zyakwe mu ndajizyo izya Moose, na mu makalaata aga vhakuvhwi.

²⁴ Vhamo vhahiitiha kuuti amazwi ge uPaavhuli akuyanga ga nalyoli, ileelo vhamo vhatahiitiha.

²⁵ Lwe aVhayuuda vhaaga vhatakwivwana vhuuvho vheeka ku mazwi ge uPaavhuli ahayangaga, vhaheepa. Lwe vhashiili kwepa, uPaavhuli ahavhavhuuzya ahati, “UMupepo uMufinjile áyanzile izya nalyoli, kuvhavhuuzya avhataata vhiinyu kutuushila kwa mukuvhwi uYisaayi kuuti,

²⁶ ‘Sogoola ku vhantu ivha, uvhavhuuzye uti, “Nalyoli muliyivwaga, ileelo te muhamanyinsanyaaje. Havhili nalyoli muliyenyaaga, ileelo te muhazisinkamizyaje.

²⁷ Avhantu ivha amooyo gaavho magomu, na makutwi gaavho gatakwivwa, na minso gaavho vhasinziliiye. Inga te she shiyo, aminso gaavho, nkandi gakulola, na makutwi gaavho, nkandi gakwivwa, havhili, nkandi vhakumanyinsanya ku nsiivho zyavho, pe vhapindushe inga mbaposhe.”’”

²⁸ UPaavhuli ahajendeelela kuyanga, ahati, “Ishi, mumanye ahinza kuuti, uvhuposhi uvhu vhwe vhufumile kwa Mulungu, avhutwaye na ku vhantu avha nsi izinji, vhoope kwe vhavhuposheele.”

²⁹ Lwe uPaavhuli aamala kuyanga amazwi igo, aVhayuuda vhaala vhaheepa uku vhakudalinkana nkaani vhuuvho vheeka.

³⁰ UPaavhuli ahatendama amaaha gavhili mu nyumba ye álemeziizye wuuyo. Ahavhaliilizyo iho, vhonti vhe vhahinzaga, ahavhaposheelaga muumwo,

³¹ nu kuvhakumusizya izya vhumwene uvhwa Mulungu ni zya Mwene uYeesu Chilisiti ku vhudandamazu, ishisita umuntu kumudinda.