iMbombo izya Vhatumwa 25 - ULufingwi uLupwa

UPaavhuli akupilula amalandu kwa Kayisaali

¹ Lwe uFeesito ayinjila kukonzya mu shigavho isha nsi isha Yudeeya, isiku ilya vhutatu, ahasogola ku Yelusaleemu kufuma ku Kayisaaliya.

² Ukwo, avhapiti avha vhapuuti pooka na vhapiti avhanji avha Vhayuuda, vhahasogola ku kwakwe. Vhahamumanyisya zyonti zye vhahamulonjelelaga uPaavhuli. Vhahamulambiilizya

³ uFeesito kuuti avhaavwe, amugalusye uPaavhuli ku Yelusaleemu, mwe pe vhívwine kuuti vhamwuvhiilile mwi idala nu kumugoga.

⁴ Ileelo uFeesito ahavhaamula ahati, “Avhasikaali vhakumuguulila uPaavhuli ku Kayisaaliya, niine neneene kwe ngalushe kunuukwo shiniishi vhweleele.

⁵ Ishi muleshe avhapiti vhiinyu vhamo insogole pooka navho kunuukwo, vhasogole vhamulonjeelele, inga wuliipo umulandu we atazile.”

⁶ Lwe uFeesito adiila ku vhantu ivho insiku 8 pamo 10 ishi, ahagaluha havhili ku Kayisaaliya. Lwe kwasha, ahatendama pa shitengo shaakwe she akutendamila lwe akulonga amalandu, ahalajizya kuuti vhamuleete uPaavhuli muhati mwemuula.

⁷ Lwe uPaavhuli aafiha paala, ahavhaaga aVhayuuda vhe vhínzile kufuma ku Yelusaleemu. Vhahamuvhungatila, vhahamulonjeelela kuuti atazile amalandu amapiti aminji ge vhahapotwaga poosye nu kugahomeshezya.

⁸ Pe uPaavhuli ahayanga izya kuyipoha ahati, “Ntapuvile naashimo ku ndajizyo izya Vhayuuda, poosye kuzya Nyumba iMfinjile, poosye ku ndajizyo izya Kayisaali.”

⁹ Ileelo uFeesito ahanzaga kuvhahondezya aVhayuuda. Pe ahamuvhuziilizya uPaavhuli ahati, “Vhuli, ukwanza kusogola ku Yelusaleemu, kuuti ulongwe ukwo pilongolela lyane ku vhulonjeelezi uvhu?”

¹⁰ UPaavhuli ahamwamula ahati, “Nimiliiye pilongolela ilya mulonzi uwa ndajizyo we avhisiilwe nu Kayisaali, ipo pe nkwanzilwa kulongwa. Shitaliipo naashimo she inanzile ku Vhayuuda, inza vwe weneewe umanyile ahinza.

¹¹ Ishi inga ntazile umulandu wonti we nkwanzilwa kungoga, ntakuhaana kuuti vhangoje. Ileelo inga vhutaliipo uvhwanalyoli mu vhulonjeelezi vhwonti vhwe aVhayuuda ivha vhakundonjeelela, ataliipo umuntu nuumo we angandema nu kuntwala ku kwavho. Ine nkulaavha kuuti amalandu gaane gavhale galongwe kwa Kayisaali!”

¹² Pe uFeesito ahapanzanya na vhatuuli vhaakwe. Lwe vhapanzanya, ahamwamula uPaavhuli ahati, “Walaavha kuuti amalandu gaaho galongwe kwa Kayisaali, ishi kuuti usogole ulongwe kwa Kayisaali!”

UFeesito akulaavha impanzyo kwa mwene uAgiliipa

¹³ Lwe zyatuuha insiku nyinsi, umwene uAgiliipa pooka nu muzuuna waakwe umwantanda uBeleniike vhahafiha ku Kayisaaliya, kumulamuha uFeesito.

¹⁴ Vhahadiila ukwo insiku inyinji. Mu nsiku izyo, uFeesito ahamuvhuuzya umwene inongwa izya Paavhuli kuuti, “Ipa pali umuntu wumo we uFeeliki aamulesile akunziilwe mu jeela.

¹⁵ Ahavhaliilizyo he naasogooye ku Yelusaleemu, avhapiti avha vhapuuti na vhasongo avha Vhayuuda vhaambuziizye inongwa zye vhamulonjeleeye uPaavhuli nu kundaavha kuuti imulonje kuuti atazile amalandu.

¹⁶ “Ileelo ine naavhamuuye naatili, iswe swe Vhaluumi tutakwitishila kuuti umuntu asundwe, she ashiili kuhomaana na vhe vhakumulonjeelela nu kuyanga izya kuyipoha.

¹⁷ Pe nkagaluha ipa pooka na vhaala vhe vhamulonjelelaga uPaavhuli. Lwe twafiha, ntaahaavile kulonzya. Lwe kwasha, nkatendama pa shitengo shaane isha kulonjela amalandu, nkalajizya nkati vhamuleete uPaavhuli.

¹⁸ Lwe vhamuleeta, vhaala vhe vhamulonjelelaga, vhahimiilila nu kwanda kumulonjeelela. Ileelo amalandu ge vhamulonjelelaga gataamile mavhiivhi nkaani, inza vwe naasivhiliiye.

¹⁹ Vhaamile vhakudalinkana nawo vhweleele inongwa izya kumupuuta uMulungu waavho, ni zya muntu wumo we izina lyakwe wu Yeesu. Umuntu uno áfuuye, ileelo uPaavhuli ahayangaga kuuti mulanzi.

²⁰ Inongwa izyo ntaamanyile vwe ingazihomeshezya. Pe nkamuvhuziilizya uPaavhuli inga angasungwa kusogola ku Yelusaleemu, inga alongwe amalandu igo kunuukwo.

²¹ Ileelo uPaavhuli ahapilula amalandu, ahalaavha kuuti vhamuguulile mu jeela kufishila pe namutwala kwa mupiti uKayisaali, inga amulonje. Pe nkalajizya kuuti vhamuguulile mu jeela kufishila pe nalyaga idala ilya kumutwala ku kwakwe.”

²² Pe uAgiliipa ahamuvhuuzya uFeesito ahati, “Nkulola hinza kuuti imutejeelezye neneene umuntu uyo.” UFeesito ahamwamula ahati, “Ulimutejeelezya indaavhi.”

UPaavhuli pilongolela ilya mwene uAgiliipa

²³ Lwe kwasha, uAgiliipa pooka nu Beleniike vhahinza ku vhushindamu uvhupiti nkaani. Vhahinjila pe avhantu vhahavhungaanaga, vhálongoziinye na vhapiti avha vhasikaali, na vhapiti avha mu nkaaya. UFeesito ahalajizya kuuti, vhamuleete uPaavhuli muhati.

²⁴ Pe uFeesito ahanda kuyanga, ahati, “Mwene Agiliipa, niimwe mwenti mwe muli pooka niiswe ipa! Umuntu uno we mukumulola pilongolela ipa, aVhayuuda vhonti vhaamulonjeleeye pilongolela lyane ku Yelusaleemu ukwo niipa, uku vhakuzuma ahalanga kuuti atakwanzilwa kulandila.

²⁵ Ileelo ine ntaawuvhwenyi umulandu wonti we yikwanzilwa kuumupa isunde ilya kumugoga. Ishi, mwe pe uweene andaavile kuuti amalandu gaakwe galongwe nu mupiti uKayisaali, pe namuuye kumutwala ku Luumi.

²⁶ Ileelo ine ntali ni izwi naalimo ilya kuhomeshezya inongwa izya Paavhuli lye ingamusimbila uKayisaali. Ye nongwa imuleesite pilongolela lyinyu, inkaani pilongolela lyaho mwene Agiliipa, kuuti inga lwe twamala kumuvhuziilizya, pe imbe ni izwi ilya kusimba.

²⁷ Navhomba vhwevhulo, mwe pe nkulola zya vhuvhwelevhwele kumutwala umukungwa kwa Kayisaali ishisita kusimba amalandu ge vhamulonjeleeye.”