iMbombo izya Vhatumwa 24 - ULufingwi uLupwa

Vhakumulonjeelela uPaavhuli kwa mupiti uwa shigavho isha nsi

¹ Lwe insiku zisaano zyatuuha kufuma pe uPaavhuli áfisile mu nkaaya iya Kayisaaliya, umupuuti umupiti uAnaniya woope ahafiha. Áali pooka na vhasongo vhamo avha Vhayuuda, nu muntu wumo uwa kuvhayanjila mu malandu gaavho, we izina lyakwe vhahatinji uTelituulo. Lwe vhaafiha, vhahasogola kumuvhuuzya umupiti uwa shigavho isha nsi uFeeliki amalandu ge vhahamulonjelelaga uPaavhuli.

² Lwe vhamwita uPaavhuli, uTelituulo ahanda kumulonjeelela. Ahati, “We Feeliki uwa mushinzi nkaani, uvhushindamu vhwaho uvhwa njeele uvhwa kulola ukutali vhwinza, mwe pe tuli nu vhutehamu insiku zyonti izi. Havhili vhwefwizye imbiivhi zyonti mu nsi ino.

³ Tukuziposheela zyonti izi ahavhaliilizyo honti ku luseshelo. Havhili tukukusalifwa nkaani ponti paala na kwi idala lyonti.

⁴ Ishi ntakwanza kuuti nkutamwe ku havhaliilizyo ahatali, nalamba ku vhwila vhwaho kuuti utejeelezye ku vhujimbiilizu amazwi giitu amansi iga.

⁵ “Umuntu uno tuvhwenyi kuuti mutamwe nkaani. Akuleeta uvhusambusu mu Vhayuuda avha nsi zyonti. Uweene mupiti uwa shipuuto isha Vhanaazaleeti she te sha muumwo.

⁶ Havhili aalinzile kuyihandamania poosye ni Nyumba iMfinjile. Pe twamulema, inga tumulonje kulandatana ni ndajizyo zyitu.

⁷ Ileelo umupiti uwa vhasikaali uLuusiya ahatwinjiilila, ahamufwula ku maha mu nyoovhe zyitu.

⁸ Ahavhalajizya vhe vhakumulonjeelela kuuti, vhinze vhamulonjeelele ku kwaho. Iwe weneewe inga wamuvhuziilizya, pe kwe umanye zyonti, muli izyo zye tukumulonjeelela ku kwaho.”

⁹ AVhayuuda vhoope vhahahomeelezya vhahati, zyonti zye ayanga, zya nalyoli.

UPaavhuli akuyanga izya kuyipoha kwa Feeliki

¹⁰ Pe umupiti uwa shigavho isha nsi ahamusonta uPaavhuli kuuti woope ayanje. Pe uPaavhuli ahati, “Ine imanyile kuuti, iwe we mulonzi mu nsi ino ku maaha aminji, ilyo lye likumbiiha kuuti njanje izya kuyipoha pilongolela lyaho ku luseshelo.

¹¹ Weneewe ungahomeshezya ahinza kuuti, zitatuusile insiku 12 kufuma pe naasogooye kupuuta ku Yelusaleemu.

¹² AVhayuuda vhataanaazile nkudalinkana nu muntu wonti. Havhili vhataanaazile nkusonzya ivho pa Nyumba iMfinjile, poosye mu masinagoogi gaavho, poosye apanji ponti mu nkaaya iyo.

¹³ Izi zye vhakundonjeelela, vhatangahomeshezya kuli iwe kuuti zya nalyoli.

¹⁴ “Ileelo lye nkwitiha pilongolela lyaho, lye lino ilya kumupuuta uMulungu uwa vhataata vhiitu nu kulilandata Idala ilya Mwene uYeesu, pooka nu kuuti avheene vhakuti shipuuto she te sha muumwo. Havhili nkuzyitiha zyonti zye zisimviilwe mu makalaata aga ndajizyo izya Moose na mu makalaata aga vhakuvhwi.

¹⁵ Ine nkwitiha uvhwanalyoli kuuti, uMulungu alivhazyusya avhantu vhonti, avhagolosu na vhe te vhagolosu, inza vhoope vwe vhakwitiha.

¹⁶ Kuli izyo, nkuyikungula kuvha nu mwoyo umuzelu insiku zyonti, inga ntahaavhe nu lukwinkwino pilongolela ilya Mulungu na pilongolela ilya vhantu.

¹⁷ “Néefile amaaha aminji, ishi naagalusile ku Yelusaleemu, inga mbaleetele ivwa kuvhaavwa avhantu avha mu nsi yiitu vhe vhasovheliilwe, nu kufumwa impuutile kwa Mulungu.

¹⁸ Lwe avhantu ivha vhakunaaga nkufumwa impuutile izyo mu Nyumba iMfinjile, naapezile mbomvile ishipuuto isha kuyizelufwa. Ntaalesite ivho naalimo, poosye kuvhungaaniha ivhungaana ilya vhantu.

¹⁹ Ileelo kuli aVhayuuda vhamo vhe vhaafumile ku Aasiya, ivho vhe vhahondeeye kundonjeelela pilongolela lyaho inga vhali nu vhulonjeelezi vhwonti.

²⁰ Poosye, vhe vhaliipo ipa vhayanje vhuuvho uvhuvhiivhi vhwe vhaavhuvhwenyi ku kwane, lwe nayangaga izya kuyipoha pa lukuvhato lwavho ulupiti.

²¹ Vhanga pamo vhaavhwenyi kuuti havhiivhi izwi lye naayanzile kuuti, ‘Ine nkulongwa pilongolela lyinyu ileelo ili, mwe pe nkuhomeelezya kuuti avhafwe vhalizyuha!’”

²² Pe uFeeliki, we ámanyile ahinza Idala ilya Mwene uYeesu, ahavhavhuuzya ahati, “Kuuti naamule amalandu giinyu lwe uLuusiya umupiti uwa vhasikaali ayinza.”

²³ Pe uFeeliki ahamulajizya umwimiilizi uwa vhasikaali kuuti, vhamugulilaje uPaavhuli, ileelo vhamupanje uvhusatushe, kuuti vhatavhadindaje avhajenzi vhaakwe lwe vhakwinza kuumupa vwe akwanza.

UPaavhuli pilongolela ilya mupiti uwa shigavho isha nsi

²⁴ Lwe zyatuuha insiku nyinsi, uFeeliki ahinza pooka nu mushi waakwe uDulaasila, we áamile Muyuuda, ahalajizya kuuti vhamuleete uPaavhuli. Lwe ayinza, ahamutejeelezya lwe akuyanga izya kumwitiha uChilisiti uYeesu.

²⁵ Ileelo lwe uPaavhuli akujendeelela kuyanga izya vhugolosu nu kuyikonzya ni zya isiku ilya vhulonzi vhwe vhukwinza, uFeeliki ahoogopa, ahati, “Ishi sogolaaga, kwe nkwite havhili inga navha na havhaliilizyo.”

²⁶ Pooka niizyo, uFeeliki ahasuvhilaga kuuti uPaavhuli kwe aamupe impiiya. Pe ahamwitaga ulwinji nu kuyanga nawo.

²⁷ Lwe amaaha gavhili gatuuha, uPolikiyo uFeesito ahapwanila kukonzya pa Feeliki. Ileelo uFeeliki ahamuleha uPaavhuli mu jeela, mwe pe ahanzaga kuvhahondezya aVhayuuda.