iMbombo izya Vhatumwa 23 - ULufingwi uLupwa

¹ UPaavhuli ahavhatontomela avhantu ivho avha mu lukuvhato, ahavhavhuuzya ahati, “Vhamwitu, kufishila ileelo ili indi she ntendiime nu mwoyo umwinza pilongolela ilya Mulungu.”

² Lwe umupuuti umupiti uAnaniya ayiivwa izyo, ahavhalajizya vhe vhímiliiye papiipi nu Paavhuli kuuti vhamuhome kwi ilomu.

³ Pe uPaavhuli ahamuvhuuzya ahati, “Niiwe uMulungu alikuhoma, iwe we uli ngati luvhumba lwe vhasinguliiye intope inzelu! Uli ipa kundonga kulandatana ni ndajizyo, havhili weneewe ukuti inkomwe ishisita kulandata indajizyo!”

⁴ Avhantu vhe vhímiliiye papiipi nu Paavhuli vhahamuvhuuzya vhahati, “Utakulola insoni kumuliga umupuuti umupiti uwa Mulungu?”

⁵ UPaavhuli ahavhaamula ahati, “Vhamwitu, ntaamanyile kuuti, mupuuti umupiti, mwe pe yisimviilwe mu Vhusimbe uVhufinjile kuuti, ‘Utamuyanjilaje umupiti uwa vhantu vhaaho havhiivhi.’”

⁶ UPaavhuli ahamanya kuuti, mu lukuvhato muula muli aVhasadukaayi na Vhafalisaayi. Pe ahayanga kwi izwi ahati, “Vhamwitu, ine ne Mufalisaayi, havhili ne mwana wa Mufalisaayi. Ipa nkulongwa, mwe pe nkwitiha uvhwanalyoli uvhwa kuuti, avhafwe vhalizyuha.”

⁷ Lwe ayanga vhwevhulo, aVhafalisaayi na Vhasadukaayi vhahataliha kudalinkana, avhantu avha mu lukuvhato vhahatapunkana impuga zivhili.

⁸ Vhátapunkiine, mwe pe aVhasadukaayi vhahatinji avhafwe vhatangazyuha. Havhili vhatahitihaga kuuti, avhahavhizya vhaliipo, poosye kuuti impepo ziliipo. Ileelo aVhafalisaayi vhahitihaga kuuti vwonti ivwo vitatu viliipo.

⁹ Pe kuhavha amadali amapiti nkaani mu vhapiti avha lukuvhato. Avhasambiilizi vhamo avha ndajizyo aVhafalisaayi, vhahimiilila uku vhakudalinkana vhakuti, “Tutavhulola uvhunanzi kwa muntu uno. Pamo impepo, poosye uhavhizya, ayanzile nawo.”

¹⁰ Amadali lwe gonjela nkaani, umupiti wa vhasikaali ahoogopa kuuti vhangamunyonkolanya uPaavhuli. Pe ahavhavhuuzya avhasikaali vhaakwe kuuti vhinjile pahati pa Vhayuuda, inga vhamutuule uPaavhuli ku maha, vhamutwale mwi ilinga ilya vhasikaali.

¹¹ Isiku lyeliila uvhusiku, uMwene uYeesu ahimiilila papiipi nu Paavhuli, ahamuvhuuzya ahati, “Gomaaga umwoyo! Inza vwe wamfumwizya uvhwahoome pa Yelusaleemu ipa, yikwanzilwa umfumwizye shiniisho na ku Luumi kwope.”

Insiivho izya kumugoga uPaavhuli

¹² Inzanshi lwe kwasha, aVhayuuda vhahitinkana kukwilu, kuuti vhamugoje uPaavhuli. Vhahalapa kuuti, te vhalye poosye kumwela, ishisita kumugoga.

¹³ Avhantu vhe vhítinkiine kuvhomba izyo vháamile 40 nu kushila.

¹⁴ Pe vhahasogola ku vhapiti avha vhapuuti na ku vhasongo avha Vhayuuda, vhahavhavhuuzya vhahati, “Tulafile kuuti, te tulye poosye kumwela ishisita kumugoga uPaavhuli.

¹⁵ Ishi, imwe pooka na vha mu lukuvhato, musonteelezye intumi kwa mupiti uwa vhasikaali kuuti amuleete uPaavhuli. Muvhe fwe mukwanza kuhomeshezya inongwa zye mumulonjeleeye. Iswe kwe tumwuvhiilile mwi idala, nu kumugoga she ashiili kufiha papiipi niimwe.”

¹⁶ Ileelo umwipwa uwa Paavhuli ahiivwa inongwa izyo, ahasogola mwi ilinga ilya vhasikaali, ahamuvhuuzya uPaavhuli.

¹⁷ Pe uPaavhuli ahamwita umwimiilizi wumo uwa vhasikaali, ahamuvhuuzya ahati, “Mutwale umujaaha uno kwa mupiti wiinyu, ali ni izwi ilya kumuvhuuzya.”

¹⁸ Pe umwimiilizi ula ahamutwala kwa mupiti waakwe, ahamuvhuuzya ahati, “UPaavhuli umukungwa aniisite, andaavile kuuti, inkuleetele umujaaha uno, ali ni izwi ilya kukuvhuuzya.”

¹⁹ Umupiti uyo, ahamulema umujaaha ula inyoovhe, ahasogola nawo kukwilu, ahamuvhuziilizya ahati, “Uli na nongwa vhuli zye ukwanza kumbuuzya?”

²⁰ Umujaaha uyo ahamwamula ahati, “AVhayuuda vhitinkiine kuuti vhakulaavhe umuleete uPaavhuli indaavhi pilongolela pa lukuvhato. Vhitinkiine kukuhopenkanya kuuti, vhakwanza kuhomeshezya amazwi ge vhamulonjeleeye.

²¹ Ileelo iwe utahavhitishile, mwe pe kuli aVhayuuda 40 nu kushila, vhe vhakwanza kumwuvhiilila uPaavhuli mwi idala. Vhalafile kuuti te vhalye, poosye kumwela, ishisita kumugoga. Ishi, vhayisengiinye, vhaguliliiye kwitishila kwaho zye vhakulaavha.”

²² Umupiti uwa vhasikaali ahamuvhuuzya umujaaha ula ahati, “Sogoola, ileelo utahamuvhuuzye umuntu nuumo kuuti umbuziizye inongwa izi.”

Vhakumutwala uPaavhuli kwa Feeliki umupiti uwa shigavho isha nsi

²³ Pe umupiti uwa vhasikaali ahavhiita avhimiilizi vhavhili avha vhasikaali. Ahavhavhuuzya ahati, “Muyisengaanye kwepa ileelo mu saala taatu uvhusiku kusogola mu nkaaya iya Kayisaaliya. Muvhe pooka na vhasikaali 200 avha kujenda ulwa pansi, avhamwavho 70 avha kulimbila imfwalaasi, avhamwavho 200 avha kulema impalala.

²⁴ Havhili, musengaanye imfwalaasi zimo zye kwe zimulimbizye uPaavhuli, mumufisye ahinza kwa mupiti uwa shigavho isha nsi uFeeliki.”

²⁵ Pe umupiti uwa vhasikaali ahasimba ukalaata. Ahati,

²⁶ “Ukalaata uno nsimvile ne neene ne Kilavhudiyo uLuusiya. Nkukulamuha iwe uwa mushinzi nkaani, mupiti wa shigavho isha nsi Feeliki.

²⁷ AVhayuuda vhámulemile umuntu uno, vhahanzaga kumugoga. Ileelo nkasogola na vhasikaali vhaane, nkamupoha, mwe pe námanyile kuuti Muluumi.

²⁸ Nkanzaga kumanya zye aVhayuuda vhámulonjeleeye, pe nkamutwala pilongolela pa lukuvhato ulwa vhalongozi vhaavho.

²⁹ Nkamanya kuuti, vhakumulonjeelela kuzya ndajizyo zyavho. Ileelo ntálivhwenyi ivhiivhi naalimo ilya kuuti vhangamukunga poosye kumugoga.

³⁰ Lwe umwipwa uwa Paavhuli ambuuzya kuuti kuli aVhayuuda vhe vhali ni nsiivho imbiivhi izya kumugoga, pe nkati, avhasikaali vhamuleete ku kwaho. Havhili nkavhalajizya avhalonjeelezi vhaakwe kuuti vhamulonjeelele ku kwaho.”

³¹ Pe avhasikaali vhahamunyatula uPaavhuli inza vwe umupiti waavho ávhalajiziizye, vhahamutwala mu nkaaya iya Antipaatili uvhusiku.

³² Lwe kwasha, avhasikaali vhe vhahajendaga ulwa pansi, vhahagaluha mwi ilinga lyavho, vhahavhaleha avhamwavho vhe vhahalimbilaga imfwalaasi vhakusogola pooka nu Paavhuli.

³³ Lwe vhaafiha ku Kayisaaliya, vhahaamupa ukalaata umupiti uwa shigavho isha nsi, nu kumuvhiiha uPaavhuli mu nyoovhe zyakwe.

³⁴ UFeeliki lwe avhaazya ukalaata ula, ahavhavhuziilizya ahati, “Umuntu uno afumile shigavho vhuli isha nsi?” Vhahamuvhuuzya kuuti uPaavhuli wa mu Kiliikiya.

³⁵ Pe ahati, “Kwe ntejeelezye amalandu gaaho inga vhaafiha vhe vhakulonjeleeye.” Ahalajizya kuuti vhamuguulile uPaavhuli mu nyumba iya kukonzezya iya Heelodi.