iMbombo izya Vhatumwa 22 - ULufingwi uLupwa

¹ Ahati, “Mwe vhamwitu pooka na vhataata vhaane, tejeelezyi! Ishi nkuyanga izya kuyipoha pilongolela lyinyu.”

² Lwe vhiivwa uPaavhuli akuyanga ku njango yaavho iya Shihebuuli, vhahapuuma nkaani kuluusya ulwa kwanda. Woope ahajendeelela kuyanga kuuti,

³ “Ine ne Muyuuda, nápafwilwe mu Taaso, mu shigavho isha nsi isha Kiliikiya. Ileelo nkuliiye pa Yelusaleemu panaapa. UGamaliyeeli we ansambiliziizye indajizyo zyonti zye avhataata vhiitu vhátulesheeye. Nkayikungulaga kwa Mulungu ku mute wonti, inza imwe vwe mukuyikungula ileelo ili.

⁴ “Nkavhayimvwaga nu kuvhagoga avhalandati avha Idala ilya Mwene uYeesu, nkavhalemaga avhanaavuli na vhantanda nu kuvhakunga mu jeela.

⁵ Umupuuti umupiti pooka na vhasongo avhamwavho vhonti avha mu lukuvhato lwinyu ulwa vhalongozi, vhangahomeshezya kuuti zye nkuvhavhuuzya zya nalyoli. Avheene vhámpiiye avhakalaata, inga mbatwalile aVhayuuda avhamwitu vhe vhakutendama mu nkaaya iya Damaasiki. Nkasogola ukwo, inga mbakunje avhantu vhe vhakumulandata uMwene uYeesu, nu kuvhaleeta ku Yelusaleemu, inga vhaavhape isunde.

⁶ “Lwe indi mwi idala napalamila kufiha mu Damaasiki, ahavhaliilizyo aha vhushenzelo, naluvhiilo uvhuzelu uvhuhali kufuma ku mwanya vhuhahozya nkaani imbazu zyonti.

⁷ Nkagwa pansi, nkiivwa izwi likumbuziilizya likuti, ‘Saavhuli! Saavhuli! Shooni she ukunjimvwa?’

⁸ Nkavhuziilizya nkati, ‘We naanu iwe Mwene?’ Lyope lihanaamula lihati, ‘Ine ne Yeesu uwa ku Naazaleeti, ne iwe ukunjimvwa.’

⁹ Avhamwitu vhe twáli pooka navho vhávhuvhwenyi uvhuzelu vhuula, ileelo vhatályivuuye izwi ilya ula we ahayangaga niine.

¹⁰ Pe nkavhuziilizya nkati, ‘Inkonzye vhuli Mwene?’ Ahanaamula ahati, ‘Ishi yimiliila! Usogole mu Damaasiki, umwo muli umuntu we kuuti akuvhuuzye zyonti zye ukwanzilwa kuvhomba.’

¹¹ Kulandatana nu vhuhali uvhwa vhuzelu vhuula, aminso gatahalolaga. Pe avhamwitu vhahandema inyoovhe nu kundongola mu Damaasiki.

¹² “Mu nkaaya iyo mwámile umuntu wumo we izina lyakwe vhahatinji uAnaniya. Uweene ahamushindihaga uMulungu, havhili ázilemile nkaani indajizyo zyitu. AVhayuuda vhonti vhe vhahatendamaga umwo, vhahamuyanjilaga inyinza.

¹³ Ahinza ahimiilila pa luvhazu papiipi niine, ahambuuzya ahati, ‘Wamwitu Saavhuli, taliiha kulola havhili!’ Panaapo vhweleele nkataliha kulola.

¹⁴ “Pe ahambuuzya ahati, ‘UMulungu uwa vhataata vhiitu akusavhuuye iwe, inga umanye ulukasamo lwakwe nu kumulola uMuvhomvi waakwe uMugolosu nu kumwivwa lwe akuyanga wuuyo.

¹⁵ Kwe uvhe we hoome waakwe ku vhantu vhonti, kuvhavhuuzya ziila zye uzivhwenyi nu kuzyivwa.

¹⁶ Ishi, ukuhavhiilila ishooni? Lyitishe izina lyakwe! Yimiliila! Uyoozelwe, uvhutalamalandu vhwaho vhwepe.’”

¹⁷ UPaavhuli ahajendeelela kuyanga kuuti, “Pisinda, nkagaluha ku Yelusaleemu. Lwe nkumupuuta uMulungu pa Nyumba iMfinjile, nkalola injozi iya pa minso amazelu.

¹⁸ Mu njozi iyo, nkalola uMwene uYeesu akumbuuzya akuti, ‘Luvhiilo yeepa mu Yelusaleemu! Avhantu ivha te vhavhwitishe uvhwahoome vhwaho, vhwe ukuvhavhuuzya izyane.’

¹⁹ Nkati, ‘We Mwene, avheene vhamanyile kuuti ine nkatuuhaga mu masinagoogi, nkavhahomaga nu kuvhakunga mu jeela vhaala vhe vhakukwitiha!

²⁰ Poosye lwe vhakumugoga uhoome waaho uSiteefani, náliipo pepaala. Nítinkiine navho kuuti vhamugoje, havhili amakooti gaavho vhe vhahamugogaga neene násenguuye.’

²¹ UMwene ahanaamula ahati, ‘Sogoola! Kuuti nkusonteelezye ukutali, ku vhantu vhe te Vhayuuda.’”

UPaavhuli akuyimanyisya kuuti woope Muluumi

²² Avhantu vhahamutejelezyaga uPaavhuli, ileelo lwe ayanga izyo, pe vhahanda kuzuma ahalanga kuuti, “Mugoji! Umuntu uno akwanzilwa kufwa!”

²³ Vhahajendeelela kuzuma ahalanga nu kuvhuusya amenda gaavho nu kunyampa ulusuuto kumwanya kulolesya kuuti vhavisiitwe.

²⁴ Pe umupiti uwa vhasikaali ahavhalajizya avhasikaali kuuti vhamwinjizye uPaavhuli mwi ilinga ilya vhasikaali. Ahati vhamuvhuziilizye uku vhakumuhoma ni ndiisa, inga amanye she shátwaliiye aVhayuuda kumuzumila ahalanga.

²⁵ Lwe avhasikaali vhamukunga uPaavhuli kuuti vhamuhome ni ndiisa, ahamuvhuziilizya umwimiilizi waavho we áyimiliiye pepaala, ahati, “Vhuli, mukwitishilwa ni ndajizyo kumuhoma ni ndiisa uMuluumi, we ashiili kulongwa kuuti munanzi?”

²⁶ Umwimiilizi ula lwe ayiivwa izyo, ahasogola ahamuvhuuzya umupiti waavho ahati, “Ukwanza kuhonzya vhuli? Umuntu uyo Muluumi!”

²⁷ Pe umupiti waavho ahasogola kwa Paavhuli, ahamuvhuziilizya ahati, “Mbuuzya! Iwe we Muluumi?” UPaavhuli ahaamula ahati, “Eena! Ine ne Muluumi.”

²⁸ Umupiti uyo ahamuvhuuzya ahati, “Ine nkavhwaga uvhuhaaya uvhwa kuvha ne Muluumi ku mpiiya inyinji.” UPaavhuli ahati, “Ileelo ine ne Muluumi uwa kupaapwa!”

²⁹ Avhasikaali vhaala vhe vhahasiivhaga kumuvhuziilizya, vhahamuleha uPaavhuli, vhaheepa naluvhiilo. Umupiti waavho woope lwe aamanya kuuti uPaavhuli Muluumi, ahoogopa, mwe pe ámukunzile na manyoloolo.

UPaavhuli pilongolela ilya lukuvhato ulwa vhalongozi

³⁰ Lwe kwasha, umupiti uwa vhasikaali ahanzaga kumanya kuuti shooni she aVhayuuda vhámulonjeleeye uPaavhuli, pe ahamusatula. Ahalajizya kuuti avhapiti avha vhapuuti pooka nu lukuvhato lwonti vhavhungaane. Pe ahamuleeta uPaavhuli, ahamwimiilisya pilongolela lyavho.