iMbombo izya Vhatumwa 16 - ULufingwi uLupwa

UTiimoti akuvhalandata avha Paavhuli nu Siila

¹ Pisinda, uPaavhuli ahafiha ku Deelibe suuti, havhili ahafiha ku Lisitila. Ku Lisitila ukwo ahatendamaga nu mulandati wumo uwa Yeesu, we izina lyakwe vhahatinji uTiimoti. Unyina áamile Muyuuda, we ámwitisile uYeesu, ileelo uyise áamile Muyunaani.

² Avhiitisi avha ku Lisitila na ku Ikooniya vhahamuyanjilaga uTiimoti kuuti, áamile nu lujendo ulwinza.

³ UPaavhuli ahanzaga kuuti uTiimoti amulandate, ahamunyatula nu kumutahiili kuzya Vhayuuda vhe vhahatendamaga ukwo. Ahavhomba vhwevhulo, mwe pe aVhayuuda vhonti vhe vhahatendamaga ukwo vhámanyile kuuti uyise atáamile Muyuuda.

⁴ Pe uPaavhuli na vhamwavho vhahatuuha mu nkaaya izya kuula, vhahavhapanga avhiitisi indajizyo zye zyávhisiilwe na vhatumwa na vhasongo avha shivhanza ku Yelusaleemu kuuti vhazishindihaje.

⁵ Ivivhanza vihagomaga mu lwitiho na vhiitisi vhahonjelaga amanda gonti.

UPaavhuli akulola injozi iya pa minso amazelu

⁶ UMupepo uMufinjile ávhahaanile avha Paavhuli na vhamwavho kuuti, vhatahalumbiilile izwi ilya Mwene uYeesu mu shigavho isha nsi isha Aasiya. Pe vhahatuuha mu nsi iya Fuligiya, ni ya Galaatiya.

⁷ Lwe vhaafiha mu nshinji iya nsi iya Miisiya, vhahanzaga kwinjila mu shigavho isha nsi isha Bitiniya, ileelo uMupepo uwa Yeesu ahavhahaana.

⁸ Pe vhahatuuha mu Miisiya, vhahasogola mu nkaaya iya Tolowa.

⁹ Uvhusiku, uPaavhuli ahalola injozi iya pa minso amazelu. Mu njozi iyo, umuntu wumo uwa ku shigavho isha nsi isha Makedooniya áyimiliiye, ahalambilizyaga ahatinji, “Lamba ku Makedooniya, uyinze utwavwe.”

¹⁰ Lwe uPaavhuli aalola injozi iyo, tuhamanya kuuti uMulungu atwisite kuuti, tuvhalumbiilile avhantu ivho Izwi iLyinza. Pe tuhayisengaanya naluvhiilo kusogola ku Makedooniya.

ULiidiya akumwitiha uYeesu

¹¹ Pe tuhafuma ni meeli ku Tolowa, tuhafiha mu nsi inyuumu ye yili pahati pa sumbi ye vhakuti iSamotilaake. Indaavhi yaakwe tuhajendeelela kushuula, tuhafiha mu nkaaya iya Neyapooli.

¹² Ipo tuhayileha imeeli, tuheepa ulwa pansi, tuhafiha mu Fiilipi, inkaaya ye yákumusile nkaani mu wilaaya ye yili mu shigavho isha nsi isha Makedooniya. Mu nkaaya iyo aVhaluumi vhahatendamaga nu kukonzya. Tuhatendama umwo ku havhaliilizyo aha nsiku nyinsi.

¹³ Isiku ilya Sabaato tuhafuma kunzi ku nkaaya, tuhasogola pa luvhazu pi ijenje, twásuvhiiye kuuti tungapaaga apa kumupuutila uMulungu. Lwe twapaaga tuhatendama, tuhanda kuyanga na vhantanda vhe vhávhungiine penepo.

¹⁴ Mu vhe vhahatutejelezyaga, áliipo umwantanda wumo we vhahatinji uLiidiya, áali wa mu nkaaya iya Tiyatiila. Uyo atáali Muyuuda ileelo ahamunyilaga uMulungu. Ahavhombaga imbombo iya kukazya amenda aga muhoola uwa mafwomfwo. UMwene uYeesu ahawiigula umwoyo waakwe, ahagaposheela amazwi ge uPaavhuli ahayangaga.

¹⁵ Ahoozelwa uweene pooka na vhantu avha mu nyumba yaakwe, ahatulambiilizya kuuti tusogole ku kwakwe, ahati, “Inga mwandola kuuti nalyoli namwitiha uMwene uYeesu, mwinjile mu nyumba yaane, mutendame.” Pe ahatusinjiilizya kuuti, tusogole nawo.

Avha Paavhuli nu Siila vhakukungwa mu jeela

¹⁶ Isiku limo lwe tukusogola apa kumupuutila uMulungu, tuhahomaana nu mulindu wumo we áamile ni mpepo inkandamanu izya kulagulila. Umulindu uyo ahavhinjizizyaga avhapiti vhaakwe ilonka ipiti ku mbombo yaakwe iya kulagula.

¹⁷ Uweene ahanda kuvhalandata avha Paavhuli niiswe, ahahoolaga kwi izwi ipiti ahatinji, “Avhantu ivha vhavhomvi avha Mulungu uMupiti uwa ku Mwanya, vhakuvhalumbiilila imwe idala ilya vhuposhi!”

¹⁸ Ahavhombaga vhwevhulo insiku inyinji. Ileelo isiku limo, uPaavhuli ahaviitwa nkaani, ahamushevhela nu kuyivhuuzya impepo iyo kuuti, “Nkukulajizya kwi izina ilya Yeesu Chilisiti kuuti, fuma mwa mulindu uno!” Naluvhiilo impepo yiheepa.

¹⁹ Avhapiti avha mulindu uyo, lwe vhaalola kuuti idala lye vhahasuvhilaga kulyajila ilonka lyananjiha, vhahavhalema avha Paavhuli nu Siila, vhahavhadendemulila pa nsokooni, pilongolela ilya vhapiti.

²⁰ Vhahavhalonjeelela vhahati, “Avhantu ivha Vhayuuda. Vhakuleeta ivho mu nkaaya yiitu ino,

²¹ vhakusambiilizya amaata, ge iswe swe Vhaluumi tutakwitishilwa kugiitiha poosye kugalandata.”

²² Ivhungaana ilya vhantu lihavha pooka nu kuvhavhuushila avha Paavhuli nu Siila. Pe avhapiti vhahavhazuula amenda, vhahalajizya kuuti vhahomwe ni ndiisa.

²³ Lwe vhaahomwa nkaani, vhahavhakunga mu jeela. Pe avhapiti vhahamulajizya umuguulizi uwa jeela kuuti avhagulilaje ahinza.

²⁴ Kufumiilana ni ndajizyo izyo, umuguulizi uyo ahavhavhiiha kwi iziiho nu kuvhakunga ivinama vwavho ni ipampa.

²⁵ Lwe yaafiha pa vhusiku pahati, avha Paavhuli nu Siila vhahamulaavhaga uMulungu, nu kwimba inyimbo izya kumutiima. Vhoope avhakungwa avhamwavho vhahatejelezyaga.

²⁶ Naluvhiilo kuhavha ishisumbi ishipiti, shihayinzaanya ulwalo ulwa jeela. Amalyango gonti gahiiguha na manyoloolo ge vhávhakunjiiye avhakungwa gahasatuha.

²⁷ Umuguulizi ahavhuuha. Lwe aalola kuuti amalyango gigusile, ahasiivha kuuti avhakungwa vhonti vhashimbiiye. Ahakuula ipanga lyakwe inga ayigoje.

²⁸ Ileelo uPaavhuli ahamuvhilishila kwi izwi ipiti, ahati, “Utahayigoje! Swenti tuliipo umu.”

²⁹ Umuguulizi ula ahalajizya kuuti vhaleete inyaale. Lwe vhamuleetela, ahinjila naluvhiilo muhati, ahayisumba pa vinama ivwa vha Paavhuli nu Siila uku akutetema.

³⁰ Ahavhafumwa kunzi, ahavhavhuziilizya ahati, “Mwe vhamwene! Inkonzye vhuli, inga mbwaje uvhuposhi?”

³¹ Vhahamwamula vhahati, “Umwitishe uMwene uYeesu, niiwe kwe upokwe pooka na vhantu avha mu nyumba yaaho.”

³² Vhahamusambiilizya izwi ilya Mwene pooka na vhantu vhonti avha mu nyumba yaakwe.

³³ Ahavhaliilizyo hehaala aha vhusiku, ahavhanyatula, ahavhoozya amalonda gaavho, pe uweene na vha mu nyumba yaakwe vhahoozelwa ishisita kuhaavha.

³⁴ Pe ahavhanyatula avha Paavhuli nu Siila, ahasogola navho ku kwakwe, ahaavhapa ishaakulya. Uweene pooka na vhantu vhonti avha mu nyumba yaakwe vhahaseshela nkaani, mwe pe vhámwitisile uMulungu.

³⁵ Lwe kwasha, avhapiti avha nkaaya vhahavhasonteelezya avhapiti avha vhasikaali kwa muguulizi uwa jeela, vhahati, “Vhasatule avhantu ivho.”

³⁶ Umuguulizi uyo ahamuvhuuzya uPaavhuli ahati, “Avhapiti avha nkaaya vhafumwizye indajizyo kuuti mbasatule, ishi fumi kunzi, uMulungu avhateteesye.”

³⁷ Ileelo uPaavhuli ahavhavhuuzya avhapiti avha vhasikaali ahati, “Vhaatuhomile nkaani pilongolela pa vhantu nu kutukunga mu jeela ishisita kutuvhuziilizya, niiswe swe Vhaluumi. Ishi shooni she vhakwanza kutusatula kukwilu? Zitangavha vhwevhulo haa! Vhinze vhuuvho vhatufumwe.”

³⁸ Avhapiti avha vhasikaali vhahavhavhuuzya izyo avhapiti avha nkaaya. Vhoope lwe vhiivwa kuuti avha Paavhuli nu Siila Vhaluumi, vhahoogopa nkaani.

³⁹ Vhahinza kuvhalambiilizya, vhahavhafumwa mu jeela, vhahavhalaavha kuuti, vheepe mu nkaaya yiila.

⁴⁰ Avha Paavhuli nu Siila, lwe vhaafuma mu jeela, vhahasogola kwa Liidiya. Vhahahomaana na vhamwavho, vhahavhasuvhaalizya, pe vhaheepa.