iMbombo izya Vhatumwa 15 - ULufingwi uLupwa

Ulukuvhato ulwa vhatumwa na vhasongo ku Yelusaleemu

¹ Lwe avha Paavhuli nu Balinaaba vhali ku Antiyookiya, avhantu vhamo vhahafuma ku Yudeeya, vhahasogola kuukwo. Vhahanda kuvhasambiilizya avhiitisi kuuti, “Inga mutakuyitahiili kulandata amiiho ge uMoose átulesheeye, mutangaapokwa.”

² Avha Paavhuli nu Balinaaba lwe vhiivwa izwi ilyo, vhahatumvanya nu kuvhuzilizanya navho nkaani. Pisinda, avhantu avha shivhanza isha ku Antiyookiya vhahalajizya kuuti, avha Paavhuli nu Balinaaba pooka na vhiitisi vhamo vhasogole ku Yelusaleemu, kuvhavhuziilizya avhatumwa na vhasongo avha shivhanza izwi ilyo.

³ Pe avhantu ivho avha shivhanza isha ku Antiyookiya vhahamusonteelezya uPaavhuli na vhamwavho. Vhoope vhahatuuha mu nsi iya Foyiniikesi ni ya Samaliya. Umwo vhahavhavhuzyaga avhiitisi vwe vhoope vhe te Vhayuuda vhámwitisile uYeesu. Avhiitisi vhonti lwe vhiivwa inongwa izyo, vhahaseshela nkaani.

⁴ UPaavhuli na vhamwavho vhahafiha ku Yelusaleemu. Ukwo avhatumwa na vhasongo na vhantu avha shivhanza vhahavhaposheela ahinza. Avha Paavhuli nu Balinaaba vhahavhavhuuzya zyonti zye uMulungu ávhomvile kutuushila ku kwavho.

⁵ Ileelo avhiitisi vhamo avha mpuga iya Vhafalisaayi vhahimiilila, vhahati, “Vhoope vhe te Vhayuuda vhakwanzilwa kuyitahiili, nu kuzilema indajizyo zyonti izya Moose.”

⁶ Pe avhatumwa na vhasongo vhahavhungaana kwenyeelezya ahinza amazwi igo.

⁷ Lwe vhapanzanya ku havhaliilizyo ahatali, uPeeteli ahimiilila, ahati, “Vhamwitu, imwe mumanyile kuuti kufuma ku vhwandilo, uMulungu ánsavhuuye kufuma muli imwe, kuuti ndumbiilile Izwi iLyinza ku vhe te Vhayuuda, inga vhalyivwe nu kulyitiha.

⁸ UMulungu we amanyile amooyo aga vhantu, ahalolesya kuuti avhitisile, mwe pe vhoope ahaavhapa uMupepo uMufinjile inza iswe.

⁹ UMulungu atásavhuliinye inga hansi, ku kwitu na ku kwavho, ahazelufwa amooyo gaavho kwi idala ilya kumwitiha uYeesu.

¹⁰ Ileelo imwe mukuvhavhegazya avhalandati umuligo, we avhataata vhiitu niiswe tutávhweziizye kuwuvhegala. Isho kwe kumulinga uMulungu!

¹¹ Vhayaaya, tukwitiha kuuti iswe na vheene tukupokwa ku vhwila uvhwa Mwene wiitu uYeesu Chilisiti.”

¹² Pe impuga yonti yihavha mwaa, yihavhatejeelezya avha Paavhuli nu Balinaaba lwe vhakuvhavhuuzya vwe uMulungu ávhomvile ivilolesyo ni zya kusukumizya kutuushila ku kwavho ku vhantu vhe te Vhayuuda.

¹³ Lwe vhaamala kuyanga, uYaakobu ahati, “Mwe vhamwitu, tejeelezyi!

¹⁴ USiimoni atuvhuuzya vwe uMulungu ávhasajiiye avhantu vhe te Vhayuuda kwisinda ukwo, ávhasavhuuye vhamo vhavhe vhantu vhaakwe.

¹⁵ Inongwa izyo zikuvhalilana na mazwi ge gasimviilwe mu makalaata aga vhakuvhwi kuuti,

¹⁶ ‘UMWENE uMulungu akuyanga kuuti, “Lwe zyatuuha izi, pe ndigaluha. Ndiyizenga havhili inyumba iya Daavhudi ye yiguuye, ndigazenga shipwa amapagala gaakwe. Havhili ndiyimiiliha,

¹⁷ inga avhantu avhanji vhonti, vhaala vhe te Vhayuuda, vhe mbiisite kuuti vhavhe vhaane, vhamulondole uMWENE uMulungu.” Izi zye akuyanga uMWENE, we ávhiisile inongwa izi,’

¹⁸ inongwa zye zyámanyisile kufuma hali.”

¹⁹ UYaakobu ahajendeelela kuyanga kuuti, “Ishi, nkusiivha kuuti tutahavhayimvwe avhantu vhe te Vhayuuda vhe vhakumwitiha uMulungu.

²⁰ Tuvhasimbile ukalaata kuuti, vhatalyanje ivwakulya vwe vhafumwizye ku viholanyo, vhafupuhaje mu vhulugusu, vhatalyanje inyama zye vhabuzite, poosye amavhanda.

²¹ Nkusiivha vhwevhulo, mwe pe kufuma hali, indajizyo izya Moose vhakuzikumusyaga mu nkaaya zyonti, kwi idala ilya kuvhaazya mu masinagoogi gonti insiku zyonti izya Sabaato.”

Ukalaata ku vhiitisi vhe te Vhayuuda

²² Pe avhatumwa na vhasongo ni shivhanza shonti isha pa Yelusaleemu, vhahaamula kuvhasaavhula avhantu vhamo muli vhuuvho nu kuvhasonteelezya kuuti, vhasogole pooka nu Paavhuli nu Balinaaba ku Antiyookiya. Vhahamusaavhula uYuuda we vhahatinji uBalisaaba nu Siila, vhavhili ivho, vhahavhalongozyaga avhamwavho. Vhahavhasonteelezya nu kalaata we akuti,

²³ “Iswe swe vhatumwa pooka na vhasongo, iswe swe vhamwinyu, tukuvhalamuha imwe vhamwitu mwe te mwe Vhayuuda mwe muli mu nkaaya iya Antiyookiya na mu shigavho isha nsi isha Siiliya ni sha Kiliikiya.

²⁴ Twivuuye kuuti avhantu vhamo kufuma ku kwitu vhavhavhuziizye inongwa izya kuvhavwalanganya nu kuvhapuvwa amooyo giinyu, ileelo te sweswe twaavhasonteleziizye.

²⁵ Ishi twitinkiine pooka, kuuti tusaavhule avhantu vhamo vhe tuvhasonteelezye kuli imwe. Tukwanza vhinze pooka na vhankundwa vhiitu avha Balinaaba nu Paavhuli,

²⁶ vhe vhitisile kufwa kuzya izina ilya Mwene wiitu uYeesu Chilisiti.

²⁷ Pe twavhasonteelezya avha Yuuda nu Siila kuli imwe, kwe vhavhavhuuzye vhuuvho zyonti zye tuvhasimbiiye.

²⁸ Yihondeeye kwa Mupepo uMufinjile na kuli iswe kuuti, tutahavhavhegazye amaligo aminji, nkandi zye ndajizyo izi zye zikwanzilwa kuzilandata:

²⁹ Mutalyanje ivwakulya vwe vhafumwizye ku viholanyo ni nyama zye vhabuzite na mavhanda, havhili mufupuhaje mu vhulugusu. Inga mukuyidinda niizyo, pe mukuvhomba ahinza. Muvhalamushe.”

³⁰ Pe lwe avhatumwa na vhasongo vhavhalaga, vhahasogola ku Antiyookiya. Lwe vhaafiha, vhahavhavhungaaniha avhantu avha mu shivhanza, vhahaavhapa ukalaata ula.

³¹ Lwe vhavhavhaazizya ukalaata uyo, avhantu vhahaseshela nkaani, mwe pe áali ni nongwa izya kusuvhaalizya.

³² Avha Yuuda nu Siila vhoope vháamile vhakuvhwi, vhahayanga na vhamwavho ku havhaliilizyo ahatali, vhahavhasuvhaalizya nu kuvhagomwa.

³³ Lwe vhatendama ukwo ku havhaliilizyo hamo, avhamwavho avha ku Antiyookiya, vhahavhalaga, kuuti vhagalushe ku vhutehamu ku vhe vhávhasonteleziizye.

³⁴ Ileelo uSiila ahalola hinza kuuti uweene asyale kwekuula.

³⁵ Avha Paavhuli nu Balinaaba vhahasyala ku Antiyookiya, avheene pooka na vhamwavho avhinji, vhahasambilizyaga nu kulumbiilila izwi ilya Mwene uYeesu.

Avha Paavhuli nu Balinaaba vhakulehaana

³⁶ Lwe ahavhaliilizyo hamo hatuuha, uPaavhuli ahamuvhuuzya uBalinaaba ahati, “Tugalushe mu nkaaya ziila zye twálumbiliiye izwi ilya Mwene, tusogole tuvhavuule avhamwitu, tuvheenye vwe vhakujendeelela.”

³⁷ UBalinaaba ahanzaga vhasogole pooka nu Yoohani we vhahatinji uMaaliko.

³⁸ Ileelo uPaavhuli ahalola kuuti te hinza kuuti vhasogole pooka nu Maaliko, mwe pe uweene ávhalesile ku Pamufiiliya, atahajendeelela kuvhomba imbombo pooka navho.

³⁹ Pe vhahadalinkana nkaani nu kulehaana. UBalinaaba ahamunyatula uMaaliko, ahalimbila imeeli, ahasogola nawo ku Kiipulo.

⁴⁰ UPaavhuli ahamunyatula uSiila. Lwe avhamwavho vhamulaavhila uvhwila uvhwa Mwene uYeesu, aheepa nawo.

⁴¹ Ahatuuha mu shigavho isha nsi isha Siiliya ni sha Kiliikiya, kuvigomwa ivivhanza.