iMbombo izya Vhatumwa 14 - ULufingwi uLupwa

Avha Paavhuli nu Balinaaba ku Ikooniya

¹ Lwe avha Paavhuli nu Balinaaba vhali mu Ikooniya, vhahinjila mwi isinagoogi inza vwe gáamile amaata gaavho. Vhahavhasambiilizya avhantu muumwo izya Yeesu ku vhudandamazu. AVhayuuda avhinji nkaani, pooka na vhantu avhinji vhe te Vhayuuda, vhahamwitiha uYeesu.

² Ileelo aVhayuuda vhamo vhahahaana kumwitiha uYeesu. Ivho vhahanda kuvhasonjeelezya vhe te Vhayuuda, kuuti vhavhaviitilwe avhiitisi.

³ Pe avha Paavhuli nu Balinaaba vhahatendama ku manda aminji pa Ikooniya, vhahavhavhuzyaga avhantu izya vhwila uvhwa Mwene uYeesu ku vhudandamazu, uku vhakumusuuvhila uweene. UMwene ahahomeshezyaga kuuti amazwi gaavho ga nalyoli, kwi idala ilya kuuvhapa amaha aga kuvhomba ivilolesyo ni zya kusukumizya ku vhwinji.

⁴ Pisinda, avhantu avha mu nkaaya yiila vhahatapunkana, vhamo vhahavha ku Vhayuuda vhe vhámuhaanile uYeesu, vhamo vhahavha ku vhatumwa.

⁵ Pe aVhayuuda na vhapiti vhaavho, pooka na vhantu vhe te Vhayuuda, vhahitinkana kuvhavhomba ahavhiivhi nu kuvhahoma na mavhwe avha Paavhuli nu Balinaaba.

⁶ Vhoope lwe vhaamanya ulwivwano ulwo, vhahashimbiilila mu nsi iya Likawooniya, umwo vhahasogola mu nkaaya iya Lisitila ni ya Deelibe, na mu nkaaya impalamani.

⁷ Ukwo vhahalumbililaga Izwi iLyinza.

Avha Paavhuli nu Balinaaba ku Lisitila

⁸ Mu Lisitila mwámile umuntu wumo we álemaaye ivinama. Umuntu uyo áamile wu ntendya kufuma kupaapwa kwakwe, atájenzite naalumo.

⁹ Lwe uPaavhuli akulumbiilila, umuntu uyo woope átendiime pepaala ahamutejelezyaga. UPaavhuli ahamutontomela, ahalola kuuti umuntu uyo ali nu lwitiho ulwa kupona.

¹⁰ UPaavhuli ahayanga kwi izwi ipiti ahati, “Yimiliila! Golooha!” Pe umuntu uyo ahimiilila naluvhiilo, ahanda kujenda wuuyo weeka.

¹¹ Avhantu avhinji vhávhungiine paala. Lwe vhaalola vwe uPaavhuli amuponia umuntu uyo, vhahanda kuzuma ahalanga mu njango yaavho iya Shilikawooniya. Vhahati, “Avhalungu vhatwishiiye ku shiholanyo isha vhantu!”

¹² Vhahaavhapa amazina aga vhalungu vhaavho. UBalinaaba vhahati wu Zeewu, uPaavhuli vhahaamupa izina ilya Heelime, mwe pe we ahayangaga nkaani.

¹³ Inyumba iya kupuutila iya Zeewu yáamile kunzi iya nkaaya. Pe umupuuti uwa Zeewu ahaleeta ivipambwi vwe vhátavhiiye amayembo ni nkambaku pa mulyango uwa nkaaya. Uweene pooka na vhanji, vhahanzaga kuvhadibila avha Paavhuli nu Balinaaba inkambaku izyo, kuuti zivhe mpuutile.

¹⁴ Ileelo avhatumwa ivho uBalinaaba nu Paavhuli lwe vhiivwa izyo, vhahazepulanya amenda gaavho kulolesya kuuti vhiliilwe. Vhahashimbila, vhahinjila mwi ivhungaana ilya vhantu. Vhahazuma ahalanga,

¹⁵ vhahati, “Mwe vhantu! Shooni she mukuvhomba izi? Niiswe swe vhantu inza imwe! Tukuvhalumbiilila Izwi iLyinza, inga mupindushe nu kuzileha izya shaaha izi, havhili mumulandate uMulungu uMulanzi. Uweene we ahapela imwanya ni nsi nu sumbi, na vwonti vwe vili muumwo.

¹⁶ Amanda aga hali, uMulungu ávhalesile avhantu vhonti vhe te Vhayuuda, kuuti vhajendelelaje mu zye vhakwanza vhuuvho.

¹⁷ Ileelo atahaleha kulolesya kuuti ali pooka navho, mwe pe ahavhavhombelaga inyinza. Ahavhapanga imwe imvula ni viyavho ku havhaliilizyo he hahondeeye, havhili, ahavhapanga ishaakulya isha kuvhakwila nu kugiizuzya amooyo giinyu uluseshelo.”

¹⁸ Avha Paavhuli nu Balinaaba vhahavhadinda avhantu kuvhadibila impuutile. Ileelo shitáali shitonsu kuvhahaana poosye ku mazwi igo.

¹⁹ Pisinda, aVhayuuda vhamo vhahinza kufuma ku Antiyookiya na ku Ikooniya. Vhahasonzya ivhungaana ilya vhantu, vhahamuhoma uPaavhuli na mavhwe. Vhahamudendemula, vhahamutwala panzi pa nkaaya, mwe pe vhahasiivhaga kuuti aafwa.

²⁰ Ileelo avhalandati avha Yeesu vhahamuzyunguula, woope ahavhuuha, ahagaluha mu nkaaya. Indaavhi yaakwe, aheepa penepo, ahasogola pooka nu Balinaaba ku nkaaya iya Deelibe.

Avha Paavhuli nu Balinaaba vhakugaluha ku Antiyookiya iya ku Siiliya

²¹ Avha Paavhuli nu Balinaaba, lwe vhali mu Deelibe, vhahalumbililaga avhantu Izwi iLyinza, avhinji vhahavha vhalandati avha Yeesu. Pisinda, vhahagaluha mu Lisitila na mu Ikooniya na mu Antiyookiya.

²² Umwo mwonti vhahavhagomwaga avhalandati amooyo nu kuvhasoha kuuti vhasimpaje mu lwitiho. Vhahavhavhuzyaga kuuti, “Tukwanzilwa kutuushila amayimba aminji, kwinjila mu vhumwene uvhwa Mulungu.”

²³ Avha Paavhuli nu Balinaaba vhahasavhulaga avhasongo mu vivhanza vwonti. Vhahalaavhaga nu kuyiima kulya ishaakulya, pe vhahavhavhiihaga kwa Mwene uYeesu we vhámwitisile.

²⁴ Pisinda, avha Paavhuli nu Balinaaba vhahatuuha mu nsi iya Pisidiya, vhahinjila mu wilaaya iya Pamufiiliya.

²⁵ Vhahafiha mu nkaaya iya Peelige. Vhahasambiilizya izwi ilya Mulungu umwo, pe vhahasogola mu nkaaya iya Ataaliya.

²⁶ Kufuma ipo, vhahasogola ni meeli ku Antiyookiya iya Siiliya. Ipo pe ishivhanza shávhalavhiiye uvhwila uvhwa Mulungu ku mbombo ye vhápezile vhayimala.

²⁷ Lwe vhaafiha pa Antiyookiya, vhahavhavhungaaniha avhantu avha mu shivhanza. Vhahavhavhuuzya zyonti zye uMulungu ávhomvile kutuushila ku kwavho nu kuuti avhalolesiizye vhe te Vhayuuda, idala ilya kumwitiha uYeesu.

²⁸ Vhahatendama amanda aminji pa Antiyookiya pooka na vhalandati avha Yeesu.