iMbombo izya Vhatumwa 12 - ULufingwi uLupwa

UHeelodi akushiyimvwa ishivhanza isha ku Yelusaleemu

¹ Mu manda igo, umwene uHeelodi ahavhalema avhantu vhamo avha mu shivhanza, inga avhavhombe havhiivhi.

² Ahamugoga ni ipanga uYaakobu, umunine uwa Yoohani.

³ Lwe aalola kuuti izyo zyavhahondezya aVhayuuda, ahamulema nu Peeteli. Háamile havhaliilizyo aha nsiku izya shikulukuulu isha makaati ge vhataluziizye.

⁴ Lwe amulema uPeeteli, ahamukunga mu jeela. Ahamutwala ku mpuga zine izya vhasikaali vhane vhane, kuuti vhaposhelezanyaaje kumuguulila. Ásiivile kuuti lwe ishikulukuulu shatuuha, pe amulonje uPeeteli pilongolela pa vhantu.

⁵ Amanda igo ge uPeeteli ákunziilwe mu jeela, avhantu avha mu shivhanza vhahayikungulaga nkaani kumulaavhila kwa Mulungu.

⁶ Uvhusiku, lwe lishiili isiku lye uHeelodi álivhiisile kumulonga uPeeteli, uPeeteli ákaasite mu jeela. Áamile pahati pa vhasikaali vhavhili, vhámukunzile inyoovhe zyakwe na manyoloolo gavhili. Pa mulyango uwa jeela páali avhasikaali avhamwavho vhe vhahamugulilaga.

⁷ Naluvhiilo ahafumila uhavhizya uwa MWENE uMulungu ahinjila pe uPeeteli áamile, uvhuzelu vhuhalama muhati muula. Uhavhizya uyo ahamuyinzaanya uPeeteli ku luvhazu kumudaamusya, ahamuvhuuzya ahati, “Vhuuha naluvhiilo!” Amanyoloolo ge vhámukunjiiye uPeeteli mu nyoovhe gahalagala pansi!

⁸ Pe uhavhizya uyo ahamuvhuuzya ahati, “Pinya ilamba lyaho, uzwale ni vilyatu.” UPeeteli lwe aamala kuvhomba vhwevhulo, uhavhizya ahamuvhuuzya ahati, “Zwala inkanzu yaaho, undandate!”

⁹ Pe uPeeteli ahamulandata uhavhizya, kusogola kunzi ku jeela. Atámanyile kuuti izyo zye uhavhizya ávhomvile zyámile zya nalyoli, ahasiivhaga kuuti yáamile njozi iya pa minso amazelu.

¹⁰ Vhahatuuha pa vhasikaali avha kwanda, na vha vhuvhili, vhahafiha ku mulyango uwa shijela uwa kufumila mu jeela, kwinjila mu nkaaya. Umulyango uwo wuhiiguha weeka, vhahafuma panzi. Lwe vhakujenda mwi idala, naluvhiilo uhavhizya ahamuleha uPeeteli.

¹¹ Pe uPeeteli ahamanya zye zifumiiye, ahati, “Ishi nalyoli naamanya kuuti uMWENE uMulungu andeteeye uhavhizya waakwe, kuuti amposhe mu nyoovhe izya Heelodi na mu mbiivhi zyonti zye aVhayuuda vhasuvhiiye kuzilola.”

¹² Lwe aamanya izyo, ahasogola ku nyumba iya Maliiya, umaayi uwa Yoohani we vhahatinji uMaaliko. Mu nyumba iyo vhávhungiine avhantu avhinji vhe vhahamulaavhaga uMulungu.

¹³ UPeeteli ahiiguzya umulyango uwa lupitu ulwa nyumba iyo. Umulindu wumo umuvhomvi, izina lyakwe vhahatinji uLooda, ahasogola pa mulyango kutejeelezya kuuti wu naanu.

¹⁴ Lwe ayiivwa kuuti lizwi lya Peeteli, ahagaluha ishisita kumwigulila, mwe pe áali nu luseshelo nkaani, ahashimbiilila mu nyumba. Ahavhavhuuzya avhamwavho ahati, “UPeeteli ayimiliiye pa mulyango!”

¹⁵ Avhamwavho vhahamuvhuuzya vhahati, “Uli ni shipena!” Ileelo uweene ahavhuyiizya kuyanga kuuti ayivuuye lizwi lya Peeteli, pe vhahamuvhuuzya vhahati, “Pamo uyo wu havhizya waakwe.”

¹⁶ Ahavhaliilizyo iho uPeeteli ahajendelelaga kwiguzya ku mulyango. Pe vhahasogola, vhahiigula umulyango, vhahalola kuuti wuuyo, vhahasukumila.

¹⁷ UPeeteli ahavhahandanizya ni nyoovhe kuuti vhapuume, ahavhapanjila vwe uMWENE uMulungu amufumwizye mu jeela. Ahavhavhuuzya ahati, “Izi zye zivhombesile, mumuvhuuzye uYaakobu na vhamwitu.” Pe uPeeteli aheepa paala, ahasogola ukunji.

¹⁸ Lwe kwasha, avhasikaali vhaala vhahavha ni lyoga nkaani, mwe pe vhatámanyile zye zyámwazile uPeeteli.

¹⁹ UHeelodi ahalajizya avhasikaali kuuti vhamulondole nkaani uPeeteli. Ileelo lwe vhapootwa kumwaga, ahavhavhuziilizya vhaala vhe vhahamugulilaga. Lwe vhapootwa ilya kwamula, pe ahalajizya kuuti vhavhagoje. Pisinda, uHeelodi aheepa mu nsi iya Yudeeya nu kusogola mu nkaaya iya Kayisaaliya, ahatendama ukwo ku havhaliilizyo hamo.

Umwene uHeelodi akufwa

²⁰ UHeelodi ávhavitiliilwe nkaani avhantu avha mu nkaaya iya Tiilo, ni ya Siidoni. Pe avhantu avha mu nkaaya izyo vhahiima pooka kuuti vhasogole vhalolane nawo. Vhahivwana nu muntu wumo we vhahatinji uBulaasito, we ahimililaga inyumba iya mwene. Woope ahiima pooka navho. Vhahasogola kwa mwene, kulaavha kuuti kuvhe uvhutehamu, mwe pe inkaaya zyavho zihasuvhilaga ivwakulya kufuma mu nsi yaakwe.

²¹ Lwe lyafiha isiku lye umwene uHeelodi ásavhuuye kuyanga navho, ahazwala amenda gaakwe aga shimwene, ahatendama pa shitengo shaakwe isha vhumwene, ahanda kuvhila pilongolela pa vhantu ivho na vhamwavho avhinji.

²² Pe avhantu ivho vhahanda kuhoolela ku luseshelo vhahati, “Ili te lizwi lya muntu! Lizwi lya mulungu!”

²³ Lwe vhamutiima uHeelodi vhwevhulo, atahaamupa uMulungu uvhushindamu. Panaapo vhweleele, uhavhizya uwa MWENE uMulungu ahamusunda ku vhuvhinu uvhwa kuliiwa ni nchololo, ahafwa.

²⁴ Ileelo izwi ilya Mulungu lihajendeelela kukumuha mu vhantu, avhiitisi vhahonjelaga nkaani.

²⁵ Avha Balinaaba nu Saavhuli lwe vhaamala imbombo yaavho, vhaheepa ku Yelusaleemu pooka nu Yoohani we vhahatinji uMaaliko, vhahasogola ku Antiyookiya.