iMbombo izya Vhatumwa 1 - ULufingwi uLupwa

UMupepo uMufinjile we uMulungu áfinzile

¹ Wamwitu Teyofiilo, mwi ikalaata lyane liila itanzi, nákusimbiiye vwe uYeesu ahavhombaga, na vwe ahasambilizyaga, kufuma ku vhwandilo uvhwa mbombo yaakwe,

² kufishila isiku lye ányatuliilwe kusogola ku mwanya. Lwe ashiili kunyatulwa, uMupepo uMufinjile ahamulongola kuvhalajizya avhatumwa vhaakwe vhe ávhasavhuuye, vwe yikwanzilwa vhavhombaje imbombo.

³ Ku havhaliilizyo aha nsiku 40 kufuma pe ázyusile, ahavhaloleshelaga ulwinji avhatumwa vhaala. Ahavhahomelezyaga ulwinji kuuti uweene mupuuma, havhili ahavhasambilizyaga inongwa izya vhumwene uvhwa Mulungu.

⁴ Isiku limo lwe uYeesu ahalyanga pooka navho, ahavhalajizya ahati, “Mutaheepe mu nkaaya iya Yelusaleemu, muguliilile munuumu, kufishila ahavhaliilizyo he muliposheela ishikunjilwa, kwe kuuti uMupepo uMufinjile. Isho she shikunjilwa she uTaata uMulungu áfinzile, ulufingwi ulwo lwe nkavhavhuzyaga.

⁵ Nalyoli uYoohani ahavhozyaga avhantu na minzi, ileelo ku havhaliilizyo aha nsiku nyinsi vhweleele zye zikwinza, imwe muliyoozelwa nu Mupepo uMufinjile.”

UYeesu akunyatulwa kusogola ku mwanya

⁶ Lwe avhatumwa vhavhungiine pooka nu Yeesu, vhahamuvhuziilizya vhahati, “Vhuli, Mwene, ahavhaliilizyo iha he ukuvhavhiishila havhili aVhaisilayeeli uvhumwene vhwavho?”

⁷ UYeesu ahavhavhuuzya ahati, “Amanda na havhaliilizyo aha nongwa, te mbombo yiinyu kumanya, nkandi uTaata wuuyo avhiisile ku maha gaakwe amapiti.

⁸ Ileelo kwe muposheele amaha, lwe uMupepo uMufinjile akuvhiishila imwe. Pe muliivha mwe vhahoome vhaane mu Yelusaleemu, na mu shigavho isha nsi shonti isha Yudeeya ni sha Samaliya, nu kufishila kumpeleela iya nsi.”

⁹ Lwe uYeesu ayanga izyo, pe ahanyatulwa kusogola ku mwanya, she avhatumwa vhonti vhakulola. Ivhingo lihamudindila, vhatahamulola havhili.

¹⁰ Lwe vhakujendeelela kwenya ku mwanya vwe akusogola, naluvhiilo avhahavhizya vhavhili vhe vházwaye amenda amazelu vhahavhaloleshela vhimiliiye papiipi navho.

¹¹ Vhahati, “Mwe vhanaavuli vha mu Galilaaya, shooni she mwimiliiye ipa nu kutontomela ku mwanya? UYeesu uno we anyatulwa kufuma kuli imwe, aligaluha havhili vhwevhulo inza vwe mwamulola akusogola ku mwanya.”

Vhakumupwanizya uMatiiya pa Yuuda

¹² Pe avhatumwa avha Yeesu vhaheepa pi igamba ilya Mazayituuni, vhahagaluha ku nkaaya iya Yelusaleemu, ye yáali uvhutali uvhwa kilomiita yooka kufuma pi igamba ilyo.

¹³ Lwe vhinjila mu nkaaya, vhahazuvha mu shumba isha pamwanya mu nyumba injelenkanu, vhahinjila mu shumba isho, mwe vhahatendamaga. Ivho vháamile vhe vha Peeteli nu Yoohani nu Yaakobu nu Andeleeya nu Fiilipo nu Toomasi nu Batolomaayo nu Mataayi. Avhamwavho vháamile vhe vha Yaakobu umwana wa Alufaayo nu Siimoni we ahayikungulaga kulwila insi yaakwe nu Yuuda umwana wa Yaakobu.

¹⁴ Ivho vhonti vhahavhungaanaga kulaavha, pooka na vhantanda vhamo nu Maliiya umaayi wa Yeesu na vhanine avha Yeesu.

¹⁵ Isiku limo, avhantu 120 ishi vhe vhámwitisile uYeesu vhávhungiine pooka. Pe uPeeteli ahimiilila pahati yaavho,

¹⁶ ahavhavhuuzya ahati, “Mwe vhamwitu, zye zyásimviilwe mu Vhusimbe uVhufinjile kuzya Yuuda, we ávhalongooye avhantu vhaala vhe vhámulemile uYeesu, zyaanziliilwe zivhombeshe. Izyo zye uMupepo uMufinjile áyanzile kwi ilomu ilya taata wiitu uDaavhudi.

¹⁷ Ku vhwandilo uYuuda áamile pooka niiswe swe vhatumwa, ásavhuliilwe kuuti twavwane kuvhomba imbombo.”

¹⁸ Uweene ahaposheela impiiya kuzya kuvhomba imbiivhi, pe impiiya izyo ahakalila umugunda. Mu mugunda uwo mwe ahagwa pansi, ulwanda luhatumbunkana, uvhula vhuhafuma panzi.

¹⁹ Inongwa izyo zihamanyiha mu vhantu vhonti avha mu Yelusaleemu. Pe umugunda ula wuhiitwa ku njango yaavho kuuti Akeludaama, kwe kuuti uMugunda uwa Mavhanda.

²⁰ UPeeteli ahajendeelela kuyanga kuuti, “Izyo zye uDaavhudi ásimvile mwi ikalaata ilya Zabuuli kuuti, ‘Pa vhutendamo vhwakwe pasyale litongo, patahaavhe umuntu we angatendama puupo.’ Havhili yisimviilwe kuuti, ‘Imbombo yaakwe iya kulongozya anyatule umuntu uwunji.’

²¹ Kuli izyo, yikwanzilwa tumusevhe umuntu uwunji wooka we ajendaje pooka niiswe mu mbombo, avhanje akufumwa uvhwahoome kuuti uMwene uYeesu azyusile. Umuntu uyo, yikwanzilwa tumusevhe kufuma mu vhaala vhe vháamile niiswe ahavhaliilizyo honti lwe uMwene ahatandaalaga kuli iswe.

²² Avhe áliipo kufuma lwe uYoohani ahozyaga avhantu, kufishila amanda gaala ge uYeesu ányatuliilwe kuli iswe kusogola ku mwanya.”

²³ Pe avhantu vhe vhámwitisile uYeesu, vhahasaavhula avhantu vhavhili. Wumo áamile wu Yoosefu we vhahatinji uBalisaaba, ileelo vhamo vhahatinji uYuusito, nu wamwavho, vhahatinji uMatiiya.

²⁴ Lwe vhavhasaavhula, vhahamulaavha uMulungu vhahati, “We MWENE, iwe umanyile zye zili mu mooyo aga vhantu vhonti. Ishi utulanje ula we umusevile muli ivha,

²⁵ inga apwanile pa mbombo iya vhutumwa ye uYuuda aayilesile, aafwa nu kusogola pe pamuhondeeye wuuyo kuposheela isunde.”

²⁶ Pe vhahahoma ulutambu, ulutambu luhamugwila uMatiiya, woope ahonjela ku vhatumwa 11.