Filipi 1 - ULufingwi uLupwa

Umulaamu

¹ Ukalaata uno nsimvile ine ne Paavhuli pooka nu Tiimoti, twe vhavhomvi avha Chilisiti uYeesu. Tukuvhasimbila imwe, mwe vhafinjile avha mu nkaaya iya Fiilipi, pooka na vhimiilizi vhiinyu na vhatuuli avha shivhanza.

² UTaata wiitu uMulungu nu Mwene uYeesu Chilisiti, vhavhafwilaje uvhwila nu kuuvhapa uvhutehamu.

UPaavhuli akuvhalaavhila aVhafiilipi

³ Nkumusalifwa uMulungu waane, amanda gonti ge nkuvhasamba.

⁴ Kulaavha kwane kwonti, nkuvhalaavhila mwenti ku luseshelo,

⁵ mwe pe imwe mukunaavwa kulumbiilila Izwi iLyinza kufuma isiku lye mwítisile, kufishila ileelo.

⁶ Ishi nkuhomeshezya kuuti, nalyoli uMulungu we ahataliha imbombo inyinza iya vhuposhi mu mooyo giinyu, kwe ajendeelele kuyimala kufishila isiku lye uYeesu Chilisiti aligaluha.

⁷ Nalyoli yihondeeye kuvhasivhiilila izi mwenti ku luseshelo, mwe pe imwe muli mu mwoyo waane. Imwe mwenti mukunavwaga ine imbombo iya Mulungu iya kuliyanjila Izwi iLyinza izya kulipoha, ahavhaliilizyo he nkunziilwe, poosye he náshiili kukungwa.

⁸ UMulungu amanyile kuuti, zye nkuyanga zya nalyoli lwe nkuhomeelezya kuuti, ku shikunzi isha Chilisiti uYeesu, nsamvile nkaani kuvhalola.

⁹ Ine nkuvhalaavhila kwa Mulungu kuuti, ishikunzi shiinyu shonjelaje nkaani pooka nu vhushindamu uvhwa njeele nu vhumanyi vhwonti,

¹⁰ inga mwamulaje zye nyinza. Pe muliivha mwe vhagolosu ishisita uvhunanzi kufishila isiku lye uChilisiti aligaluha.

¹¹ Muvhavhombelaje inyinza avhamwinyu, kwi idala ilya Yeesu Chilisiti, kuzya kumushindiha nu kumutiima uMulungu.

Kukungwa ukwa Paavhuli kwakumusya Izwi iLyinza

¹² Mwe vhamwitu, nkwanza mumanye kuuti, amayimba gonti ge ganaazile gavwizye nkaani kukumusya Izwi iLyinza.

¹³ Kufumiilana niizyo, avhaguulizi vhonti avha nyumba iya kukonzezya, pooka na vhanji vhonti, vhamanyile kuuti nkunziilwe kuzya ku lumbiilila izwi ilya Chilisiti.

¹⁴ Kukungwa kwane, kutwaliiye avhamwitu avhinji kumwitiha uMwene, havhili vhali nu vhudandamazu nkaani kulumbiilila izwi ilya Mulungu ishisita kwogopa.

¹⁵ Vhamo vhakukumusya izwi ilya Chilisiti, mwe pe vhakundolela umwone, havhili vhakwanza kutumvanya niine. Ileelo vhamo, vhakukumusya izwi ilya Chilisiti ku mwoyo umugolosu.

¹⁶ Ivha, vhakulumbiilila ku mwoyo uwa shikunzi, mwe pe vhamanyile kuuti uMulungu ansavhuuye, inga ndumbililaje Izwi iLyinza.

¹⁷ Ileelo avhamwavho ivho, vhakulumbiilila izwi ilya Chilisiti ku lutumvanyo, te ku mwoyo umugolosu. Vhakusiivha kuuti, kuli izyo, kwe vhanonjezezye amayimba agamwavho mu jeela.

¹⁸ Zitali naashimo! Zye zili ni ilonka kwe kuuti ku madala gonti uChilisiti akulumbiililwa, yivhe ku mwoyo umwinza, poosye ku mwoyo umuvhiivhi. Izya kumulumbiilila uChilisiti, zye zikuntwalila kuuti nseshelaje. Havhili kwe njendeelele kuseshela,

¹⁹ mwe pe imanyile kuuti, izyo zye zinaazile ziligalunkana kuvha vhuposhi kuli ine, mwe pe mukundaavhila, havhili, mwe pe uMupepo uwa Yeesu Chilisiti akunaavwa.

²⁰ Nkusuuvhila nkaani kuuti te nkasuupile naalumo, ileelo kwe njendeelele kuvha nu vhudandamazu ishi na havhaliilizyo honti. Kwe mbombe vhwevhulo, inga uChilisiti ajendeelele kutiimwa ku zyonti zye nkuvhomba, yivhe ku vhulanzi vhwane, poosye ku vhufwe vhwane.

²¹ Kuli ine, uChilisiti vhwe vhulanzi vhwane, havhili kufwa vhwe vhulonsi vhwane.

²² Inga nkuvha ne mupuuma, indiilola ziila zye zikufumiilana ni mbombo yaane, pe ntakumanya lye ingalisaavhula!

²³ Ivintu vivhili vikundunzaanya. Lumo nkusiivha kwepa ipa, insogole imbe pooka nu Chilisiti. Ili lye lihondeeye nkaani.

²⁴ Ileelo ku zyinyu, hinza kuuti njendeelele kuvha nu vhulanzi.

²⁵ Mwe pe nkomesheziizye izyo, imanyile kuuti kwe njendeelele kuvha pooka niimwe mwenti, inga mujendeelele kukula nu kuvha nu luseshelo mu lwitiho lwinyu.

²⁶ Lwe navha pooka niimwe havhili, uluseshelo lwinyu mwa Chilisiti uYeesu ku zyane kwe luvhe lupiti.

²⁷ Ileelo ulujendo lwinyu luvhe inza vwe Izwi iLyinza ilya Chilisiti likwanza. Pe inga nkwinza kuvhavuula, poosye inga ntaliipo, inivwaje inongwa zyinyu kuuti mukusimpa ku mwoyo wooka. Havhili inivwaje kuuti, mukulwila ulwitiho ulwa Izwi iLyinza pooka.

²⁸ Mutavhogopaje avhalugu vhiinyu, muvhanje mwe vhadandamazu amanda gonti. Ilyo likulolesya kuuti avheene vhaliilovwa, ileelo imwe muliipokwa, mwe pe uMulungu wuuyo we akuuvhapa uvhuposhi.

²⁹ Imwe mufwililiilwe uvhwila, te kwe kumwitiha uChilisiti vhweleele, nkandi nu kuyimvilwa ku zyakwe.

³⁰ Ishi muli nu lutumvanyo luula lwe mwáluvhwenyi kuli ine nu kwivwa kuuti indi nalwo poosye ishi.