2 VaTesaloniki 3 - ULufingwi uLupwa

Kuvhalaavhila avhantu kwa Mulungu

¹ Ishi vhamwitu, mutulavhilaje inga izwi ilya Mwene uYeesu lijendelelaje kukumuha naluvhiilo, havhili avhantu vhaliposheelaje ku mushinzi, inza vwe zyáli kuli imwe.

² Mutulavhilaje inga uMulungu atuposhe ku vhantu avhavhiivhi, havhili vhe te vha nalyoli, mwe pe te vhonti vhe vhakwitiha izwi ilyo.

³ Ileelo uMwene uYeesu mutungamu, uweene alivhagomwa imwe nu kuvhaguulila kwa Muvhiivhi ula.

⁴ Woope akuutupa ulusuuvhilo ulupiti kuuti, ishi mukuvhomba ziila zye tukuvhalajizya, havhili kwe mujendeelele kuzivhomba.

⁵ UMwene agalongozye amooyo giinyu mu shikunzi isha Mulungu na mu vhujimbiilizu uvhwa Chilisiti.

Kuvhasoha avhahata

⁶ Vhamwitu, tukuvhalajizya kwi izina ilya Mwene uYeesu Chilisiti kuuti, muyefwaje mu vhamwinyu vhonti vhe vhahata, vhe vhatakulandata insambiilizyo zye twávhapiiye.

⁷ Tukuyanga isho, mwe pe imwe mumanyile vwe yikwanzilwa kulandata ishiholanyo shiitu. Iswe lwe twámile niimwe tutáamile twe vhahata,

⁸ havhili tutahalyanga ishaakulya kwa muntu wonti ishisita kukala. Ileelo tuhavhombaga imbombo ku mute uvhusiku nu musanya, inga tutahamutamwe umuntu wonti kuli imwe.

⁹ Lwe tukuvhomba isho, te kuuti tutáhondeeye kwanza shimo kuli imwe, ileelo tuhanzaga tuvhe twe shiholanyo kuli imwe inga mutulandate.

¹⁰ Havhili lwe twáli pooka niimwe, twávhalajiziizye kuuti, “Umuntu wonti we atakwanza kuvhomba imbombo, atalyanje ishaakulya.”

¹¹ Twayanga amazwi iga, mwe pe twivuuye kuuti vhaliipo vhamo kuli imwe vhe vhahata, vhatakuvhomba naashimo, vhakuyinjizya mu zya vhanji.

¹² Avhantu ivho tukuvhalajizya nu kuvhasoha kwi izina ilya Mwene uYeesu Chilisiti kuuti, vhavhombaje imbombo ku vhutehamu, inga vhavhanje ni shaakulya.

¹³ Ileelo imwe vhamwitu, mutahaalite kuvhomba inyinza.

¹⁴ Inga umuntu wonti atakwanza kuzilema indajizyo zyitu zye zili mwa kalaata uno, mumwenyelezyaje nkaani. Mutizyaje nawo, inga alole insoni.

¹⁵ Ileelo mutamulolaje ngati mulugu, nkandi mumusohaje ngati munine wiinyu.

Amazwi aga kulagana

¹⁶ Ishi, uMwene uYeesu wuuyo we vhwandilo vhwa vhutehamu, avhapanje uvhutehamu amanda gonti ku madala gonti. Uweene avhe pooka niimwe mwenti.

¹⁷ Ine ne Paavhuli nkuvhasimbila umulaamu uno ku nyoovhe yaane neneene. Ishi she shilolesyo mu vhakalaata vhaane vhonti, vwe nkusimba vhwevhulo.

¹⁸ UMwene wiitu uYeesu Chilisiti avhafwilaje uvhwila imwe mwenti.