2 VaTesaloniki 2 - ULufingwi uLupwa

Kwinza ukwa Mwene uYeesu nu kuloleha ukwa Musambusu

¹ Ishi vhamwitu, tukuvhasimbila kuzya kwinza uMwene wiitu uYeesu Chilisiti, na vwe tulihomaana pooka nu kutendama nawo. Tukuvhalaavha kuuti

² mutasaagaje nu kuvha na maganigani kuzya nongwa izya vhukuvhwi, poosye izya kulumbiilila, poosye izya kalaata we akusivhiililwa kuuti afumile kuli iswe, kuuti isiku ilya kwinza uMwene lifisile.

³ Mutahiitishe umuntu wonti kuvhahopenkanya ku lyonti, mwe pe isiku ilyo te lihaafishe suuti, she zishiili insiku ziila lwe avhantu avhinji vhalisambuha nkaani kwa Mulungu, havhili lwe uMusambusu ula aloleha. Uyo we ahavhaliilizyo aha kumpeleela uMwene uYeesu alimulovwa nziila.

⁴ Uweene alidindanjizya vwonti vwe avhantu vhakuvilola kuuti wu Mulungu, poosye vwe vhakuvipuuta nu kuyitumvwa ku vwonti ivwo. Havhili aliyinjila nu kutendama mu Nyumba iMfinjile iya Mulungu nu kuyitumvwa kuuti wu Mulungu.

⁵ Imanyile mukukumbuha kuuti, nkavhavhuzyaga zyonti izyo lwe nkavhanga pooka niimwe!

⁶ Ileelo kuli shintu shimo she shikumudinda uMusambusu uyo ishi, inga ahaloleshe ku havhaliilizyo he hahondeeye. Imwe mushimanyile ishintu isho.

⁷ Poosye ishi uMusambusu uyo akuvhomba imbombo ku vhuzigizigi. Ileelo te ahaloleshe kufishila inga vhamwefwa ula we akumudinda.

⁸ Ipo pe uMusambusu uyo aliloleha, ileelo uMwene uYeesu lwe akwinza alimugoga nu mwuyu kufuma mwi ilomu lyakwe. Havhili alimulovwa ku vhuzelu uvhwa vhushindamu uvhwa kwinza kwakwe.

⁹ UMusambusu uyo, aliyinza na maha gonti aga Seetano nu kuvhomba ivilolesyo ni zya kusukumizya izya ilenga.

¹⁰ Havhili alivhahopenkanya ku mavhiila na mavhiila vhonti vhe vhali mwi idala ilya kupuvha, mwe pe vhatítisile kusungwa uvhwanalyoli inga vhaposheele uvhuposhi.

¹¹ Kuli izyo, uMulungu alesheleeye amaha aga vhupuvi, inga vhajendeelele kwitiha ilenga.

¹² Ipo vhonti vhe vhatakwitiha uvhwanalyoli, ileelo vhakusesheelela uvhutalamalandu, vhalilongwa.

Kusimpa nu kulema insambiilizyo

¹³ Ileelo iswe tukwanzilwa kumusalifwa uMulungu amanda gonti ku zyinyu imwe vhamwitu, mwe uMwene uYeesu avhakunzite. Tukwanzilwa kuvhomba isho, mwe pe ávhasavhuuye imwe kufuma ku vhwandilo uvhwa kupela kwakwe inga muposheele uvhuposhi. Uvhuposhi uvhwo muvhuposheleeye kwi idala ilya Mupepo uMufinjile we akuzelufwa ni lya kwitiha uvhwanalyoli.

¹⁴ UMulungu ahavhiita, inga muposheele uvhuposhi uvhwo kwi idala ilya Izwi iLyinza lye twálumbiliiye kuli imwe. Pe muvhanje mu vhushindamu uvhwa Mwene wiitu uYeesu Chilisiti.

¹⁵ Ishi vhamwitu, musimpe nu kulema insambiilizyo zye mwáposheleeye kutuushila mu mazwi giitu ge twálumbiliiye, poosye ge twávhasimbiiye mwi ikalaata lyitu.

¹⁶ UTaata wiitu uMulungu atukunzite, na ku vhwila vhwakwe akutusuvhaalizya shiima nu kuutupa ulusuuvhilo ulwinza. Tukumulaavha uMwene wiitu uYeesu Chilisiti pooka nu weene, kuuti

¹⁷ avhasuvhaalizye amooyo nu kuvhagomwa, inga muvhombaje nu kuyanga zye nyinza.