2 VaTesaloniki 1 - ULufingwi uLupwa

Umulaamu

¹ Ukalaata uno nsimvile neene ne Paavhuli pooka nu Silwano nu Tiimoti. Tukuvhasimbila mwe mpuga iya vhantu mwe mumwitisile uTaata wiitu uMulungu nu Mwene uYeesu Chilisiti, mwe muli mu shivhanza isha mu nkaaya iya Tesaloniiki.

² UTaata wiitu uMulungu nu Mwene uYeesu Chilisiti vhavhafwilaje uvhwila nu kuuvhapa uvhutehamu.

Uvhulonzi uvhwa Mulungu ku manda aga kumpeleela

³ Vhamwitu, tukwanzilwa kumusalifwa uMulungu amanda gonti ku zyinyu, mwe pe ulwitiho lwinyu lukukula, havhili kukundana kwinyu kukwonjela nkaani.

⁴ Pe iswe tukuyitiima mu vivhanza ivwa Mulungu kuzya vhujimbiilizu nu lwitiho lwinyu lwe muli nalwo, mu mayimba gonti na malavha ge gakuvhaaga.

⁵ Izyo zyonti zikulolesya kuuti, uvhulonzi uvhwa Mulungu vhugolosu. Ku vhulonzi uvhwo, imwe mulihondela kwinjila mu vhumwene vhwakwe vhwe imwe mukuyimbila.

⁶ UMulungu alivhomba ingolosu, uweene aliivhapa amayimba vhe vhakuvhayimvwa imwe,

⁷ nu kuuvhapa ulutuuzyo imwe mwe mukuyimvilwa pooka niiswe. Alivhomba izyo lwe uMwene uYeesu akugaluha kufuma ku mwanya nu mwilo uwa mwoto, pooka na vhahavhizya vhaakwe avha maha.

⁸ Uweene we alivhasunda vhonti vhe vhakumuhaana uMulungu, na vhe vhatakulishindiha Izwi iLyinza ilya Mwene wiitu uYeesu.

⁹ Isunde lyavho liliivha vhunanjisu uvhwa shiima nu kuvhavhiiha ukutali nu Mwene nu vhushindamu vhwakwe uvhupiti.

¹⁰ Isunde ilyo liliivha isiku liila lye uMwene uYeesu aliyinza, kuposheela uvhushindamu kufuma ku vhafinjile vhaakwe, kwe kuuti aliposheela umushinzi kufuma ku vhonti vhe vhamwitisile. Niimwe vhuulo muliivha pooka navho, mwe pe muvhwitisile uvhwahoome vhuula vhwe twávhaleteeye.

¹¹ Kuli izyo, tukuvhalaavhila shiima. Tukumulaavha uMulungu wiitu kuuti avhahondezye kutendama inza vwe ahavhiita. Havhili tukumulaavha kuuti ku maha gaakwe amasisya, alunjisye vwe mukwanza kuzivhomba inongwa inyinza nu kulunjisya imbombo yiinyu yonti iya mu lwitiho.

¹² Tukulaavha vhwevhulo, inga izina ilya Mwene wiitu uYeesu lishindikwaje ku zyinyu. Havhili niimwe mushindikwaje ku zyakwe, kufumiilana nu vhwila uvhwa Mulungu wiitu, nu vhwa Mwene uYeesu Chilisiti.