2 VaKolinti 3 - ULufingwi uLupwa

Avhavhomvi avha lufingwi ulupwa

¹ Vhuli, mukusiivha kuuti twanda havhili kuyihomeshezya inyinza sweneeswe? Ndaali! Iswe tutali inza avhantu avhanji vhe vhakwinza kuli imwe na vhakalaata vhe vhakuvhahomeshezya kuuti vhinza, poosye vhe vhakulaavha kuli imwe avhakalaata vhe vhakuvhahomeshezya kuuti vhinza ku vhantu avhanji.

² Imwe mwe mwe kalaata we akutuhomeshezya iswe, we asimviilwe mu mooyo giitu. Avhantu vhonti vhakuvhaazya nu kumanya imbombo iya Mulungu ye tuyivhomvile kuli imwe.

³ Mukulolesya kuuti imwe mwe kalaata we afumile kwa Chilisiti, we akulolesya imbombo zye tuvhomvile kuli imwe. Ukalaata uyo atali inza ukalaata we asimviilwe nu wiino, nkandi nu Mupepo uwa Mulungu uMulanzi. Havhili mutali inza ukalaata we asimviilwe mwi ivhwe, nkandi we asimviilwe mu mooyo aga vhantu.

⁴ Tukuyanga izyo, mwe pe ulwo lwe lusuuvhilo lwitu kwa Mulungu kutuushila kwa Chilisiti.

⁵ Te kuuti tukusiivha kuuti tukuvhomba zyonti ku maha giitu, amaha giitu gakufuma kwa Mulungu.

⁶ Uweene we atupiiye amaha aga kuvha twe vhavhomvi avha lufingwi ulupwa, lwe lukufuma kwa Mupepo uMufinjile. Ulufingwi ulwo te ndajizyo zye zisimviilwe, mwe pe indajizyo zye zisimviilwe zikuleeta uvhufwe, ileelo uMupepo uMufinjile akuleeta uvhulanzi.

Uvhushindamu uvhwa lufingwi ulupwa

⁷ Indajizyo zye zyásimviilwe mu mavhwe, zye zikuleeta uvhufwe, zyínzile mu vhushindamu vhwe vhukulama, kufishila aVhaisilayeeli kupootwa kumwenya uMoose ku minso, pooka nu kuuti kulama ukwo kwámile ahavhaliilizyo hansi vhweleele. Inga imbombo izya ndajizyo zye zikuleeta uvhufwe zyínzile nu vhushindamu inza uvhwo,

⁸ vhuli, imbombo izya Mupepo uMufinjile zitakuvha nu vhushindamu nkaani?

⁹ Inga imbombo zye zikuvhavhiiha avhantu kulongwa zili nu vhushindamu, vhuli, imbombo zye zikuvhavhiiha avhantu kuvha vhagolosu zitakuvha nu vhushindamu nkaani?

¹⁰ Ishi uvhushindamu uvhwa lufingwi ulwa hali vhutakulingaana nu vhushindamu uvhwa lufingwi ulupwa, mwe pe uvhushindamu uvhwa lufingwi ulupwa vhupiti nkaani.

¹¹ Inga she sháali sha havhaliilizyo hansi vhweleele, sháali nu vhushindamu, pe isha havhaliilizyo honti shikuvha nu vhushindamu nkaani.

¹² Ishi, mwe pe tuli nu lusuuvhilo ulwa lufingwi ulupwa, lwe lwa shiima, tuli nu vhudandamazu kuvhomba imbombo.

¹³ Havhili, iswe tutakuvhomba inza uMoose we áyidinzite ku minso nu mwenda, inga aVhaisilayeeli vhatahaalole pa minso gaakwe, lwe kulama ukwa vhushindamu kukufwimfwila.

¹⁴ Ileelo aVhaisilayeeli injeele zyavho zyávhisiilwe kuvha ngomu. Kufishila ishi lwe vhakuvhaazya amakalaata aga ndajizyo izya Moose, vhakupootwa kumanya uvhwanalyoli, mwe pe vhakuvha vhadindiliilwe nu mwenda uwo. Uvhwanalyoli uvhwo vhukumanyiha kwi idala ilya kumwitiha uChilisiti, mwe pe uweene we akwefwa umwenda uwo.

¹⁵ Nalyoli, kufishila ileelo, lwe vhakuvhaazya amakalaata aga ndajizyo izya Moose, amooyo gaavho gadindiliilwe, vhakupootwa kumanyinsanya.

¹⁶ Ileelo umuntu wonti we akumwitiha uMwene uYeesu, akumwefwa umwenda uwo.

¹⁷ Yeenya, uMwene we wu Mupepo, pe pali uMupepo uwa Mwene pali uvhusatushe.

¹⁸ Ishi iswe swenti twe tutadindiliilwe ku minso nu mwenda, tukulolesya uvhushindamu uvhwa Mwene inza ilooli vwe likulolesya ishiholanyo. UMwene we wu Mupepo, we akutwandula tuholane nu weene. Akutwandula kufuma pa vhushindamu vhumo kufishila pa vhushindamu uvhupiti nkaani.