2 VaKolinti 13 - ULufingwi uLupwa

Insoshi izya vhusililishilo

¹ Ulu kwe luvhe lwa vhutatu kuli ine kwinza kuli imwe. UVhusimbe uVhufinjile vhukuti, “Uvhunanzi vhwonti vhulongwaje lwe vhaafumwa uvhwahoome avhantu vhavhili, poosye vhatatu.”

² Ahavhaliilizyo he nínzile kuli imwe ulwa vhuvhili návhavhuziizye nátili, lwe ninza te nkaavhe nu vhwila na vhantu vhe vhakuvhomba uvhutalamalandu. Ishi lwe indi ukutali niimwe, nkuvhavhuuzya havhili kuuti, te ninze imbe nu vhwila kuli ivho na vhanji vhonti vhe vhakuvhomba izyo.

³ Kwe mbombe vhwevhulo, mwe pe mukwanza ishilolesyo isha kumanya inga uChilisiti akuyanga kutuushila ku kwane. UChilisiti uyo te muyeyevhazu, ali na maha, havhili we akuvhomba imbombo pahati yiinyu.

⁴ Poosye she uChilisiti áali muyeyevhazu lwe akuhomeelwa pa shihovhenkanyo nu kufwa, ishi mulanzi ku maha aga Mulungu. Vhwevhulo, niiswe ishi twe vhayeyevhazu inza vwe uChilisiti áali, poosye vhwevhulo tuliivha twe vhalanzi ku maha aga Mulungu, inza vwe uChilisiti ali.

⁵ Ishi muyilingaje mweneemwe, inga mumanye kuuti muli nu lwitiho. Vhuli, mutamanyile kuuti uYeesu Chilisiti ali muhati zyinyu? Inga mutamanyile, ipo lwe muposiitwe.

⁶ Ileelo nkusuuvhila kuuti imwe kwe mumanye kuuti iswe tutaposiitwe.

⁷ Tukumulaavha uMulungu kuuti mutavhombaje uvhutalamalandu. Tutakwanza tuloleshe kuuti tuhondeeye, nkandi kuuti imwe muvhombaje inyinza, poosye she iswe tukuloleha ngati tuposiitwe.

⁸ Yeenya, tutali na maha aga kudinda uvhwanalyoli, nkandi kuvhuhomeshezya uvhwanalyoli uvhwo.

⁹ Tukuseshela, mwe pe iswe twe vhayeyevhazu, ileelo imwe muli na maha. Tukumulaavha uMulungu avhaavwe kuuti muvhe mwe vhagolosu.

¹⁰ Nkuvhasimbila amazwi iga lwe nshiili kwinza, inga lwe naafiha kuli imwe, intahazilole zye zingambiiha kuvha ne muhali. Nkuvhasimbila vhwevhulo, mwe pe nkwanza kuuti amaha ge ampiiye uMwene uYeesu gavhe ga kuvhazenga imwe, gatahaavhe maha aga kuvhagwisya mu lwitiho.

Amazwi aga kulagana

¹¹ Ishi vhamwitu, nkuvhalaga nkuti museshelaje. Musimpaje nu kusuvhalizanya nu kuvha nu vhuliilani nu vhutehamu. Woope uMulungu uwa shikunzi nu vhutehamu kwe avhanje pooka niimwe.

¹² Mulamunkane ku lwofwanyo ulwa shikunzi.

¹³ Avhafinjile vhonti vhe tuli pooka, vhakuvhalamuha.

¹⁴ UMwene uYeesu Chilisiti avhafwilaje uvhwila. UMulungu alolesyaje ishikunzi kuli imwe. Woope uMupepo uMufinjile, avhapanje uvhuliilani imwe mwenti.