2 Timoti 3 - ULufingwi uLupwa

Amanda aga kumpeleela

¹ Ishi umanye ahinza kuuti amanda iga aga kumpeleela, kwe kuvhe amayimba amapiti.

² Avhantu vhaliyisajilaga vhuuvho vheeka nu kuzisungwa impiiya. Havhili vhaliyitiimaga nu kuyibaada nu kuligana. Te vhahavhashindihaje avhapaafi vhaavho, poosye kusalifwa, poosye kusaajila izya Mulungu.

³ Havhili vhaliivha vhantu vhe vhatakuvhakunda avha ku mwavho, poosye kwanza ulwivwano. Vhaliivha vhantu vhe vhakuvhalonjeelela avhamwavho izya ilenga nu kupootwa kuyikonzya. Vhaliivha vhahali, havhili te vhahasungwaje inyinza.

⁴ Vhaliivha vhantu vhe vhakwaniilila avhamwavho, nu kuvha na mabaado nu kuyitumvwa. Havhili vhaliivha vhantu vhe vhakusungwa nkaani izya kuhondezya amooyo gaavho, kuluusya kumukunda uMulungu.

⁵ Vhaliloleha ngati vhali nu lujendo ulwinza pilongolela ilya Mulungu, ileelo mu vhulanzi vhwavho vhakuhaana amaha gaakwe. Avhantu ivho uyefwaje navho.

⁶ Muli ivho, vhaliipo vhe vhakwinjila ku vhushevu mu nyumba izya vhantu. Umwo vhakuvhahopenkanya avhantanda avhapukupuuku vhe vhalemwilwe nu vhutalamalandu nu kumenwa ni mpapilo izya mavhiila mu mavhiila.

⁷ Avhantanda ivho, vhakusambiilila insiku zyonti, ileelo vhakupootwa nziila kuvhwaganya uvhwanalyoli.

⁸ Avhantu ivho vhe vhakuvhahopenkanya avhantanda, vhakudindanjizya uvhwanalyoli, inza vwe uYaane nu Yambule vhámudindanjiziizye uMoose. Injeele zyavho zinanjisile, havhili vhalulesile ulwitiho.

⁹ Ileelo vhatangaafiha naapamo, mwe pe avhantu vhonti kwe vhayilolele uvhwalangani vhwavho, inza vwe avhantu vháyiloleeye uvhwalangani uvhwa Yaane nu Yambule.

UPaavhuli akumulajizya uTiimoti

¹⁰ Ileelo iwe, ulandasite insambiilizyo zyane nu lujendo lwane ni nsiivho zyane nu lwitiho lwane nu vhujimbiilizu vhwane.

¹¹ Havhili ulandasite ishikunzi shaane nu kuyigomwa kwane. Umanyile vwe nálavile nu kuyimba, na zyonti zye zyánaazile mu nkaaya iya Antiyookiya ni ya Ikooniya ni ya Lisitila. Havhili umanyile kuuti nájimbiliiye mu ngomu zyonti, woope uMwene uYeesu ahampoha mu zyonti izyo.

¹² Nalyoli, vhonti vhe vhakwanza kuvha nu lujendo ulwinza pilongolela ilya Mulungu mwa Chilisiti uYeesu, vhoope kwe vhayimbaje.

¹³ Ileelo avhantu ivho avhavhiivhi, havhili vhe vhakuhopela, kwe vhajendeelele kuvha vhavhiivhi nkaani. Kwe vhahopenkanyaaje, ileelo vhoope kwe vhahopenkanywaje.

¹⁴ Ileelo iwe ugalemaje amazwi ge wásambiliiye nu kuhomeshezya kuuti ga nalyoli, mwe pe uvhamanyile vhe vhakusambiliziizye.

¹⁵ Kufuma ku vhwana vhwaho, wámanyile ahinza uVhusimbe uVhufinjile vhwe vhuli na maha aga kuukupa uvhushindamu uvhwa njeele, inga ufishile kuvhwaga uvhuposhi kwi idala ilya kumwitiha uChilisiti uYeesu.

¹⁶ UVhusimbe uVhufinjile vhwonti vhusimviilwe mu vhulongozi uvhwa Mulungu. Vhuhondeeye kuvhasambiilizya avhantu nu kuvhasoha ku vhutalamalandu vhwavho nu kuvhalongozya kuuti vhaleshe uvhutalamalandu nu kuuvhapa amasunde ku vhugolosu.

¹⁷ Kuli izyo, umuntu uwa Mulungu akuvha mulunjisu, havhili akuvha ayisengiinye kuvhomba imbombo inyinza zyonti.