2 Peteli 3 - ULufingwi uLupwa

Isiku ilya kwinza uMwene uYeesu

¹ Vhankundwa, uno wu kalaata uwa vhuvhili we nkuvhasimbila. Mu vhakalaata ivho vhavhili, nkuvhakumbusya inongwa zye muzimanyile, inga zivhavwaje kusiivha ahinza.

² Nkwanza mukumbushe amazwi ge avhakuvhwi avhafinjile vháyanzile hali, ni ndajizyo izya Mwene uMuposhi zye avhatumwa vhaakwe vhávhaleteeye.

³ Yikwanzilwa mumanye suuti kuuti insiku izya vhusililishilo vhaliyinza avhantu avha isuufwo, vhe vhalivhasufwaga imwe nu kuzilandata impapilo zyavho.

⁴ Avhantu ivho vhalivhasufwaga vhalitinji, “UChilisiti áfinzile kwinza! Vhuli, ishi ali kwoshi? Mwe pe kufuma pe avhataata vhiitu vháfwiliiye, inongwa izyo zikuloleha kuuti zili sheshiila inza vwe zyáli ku vhwandilo uvhwa vhupezi uvhwa nsi!”

⁵ Avhantu ivho, vhakuyivhiiha ngati vhaluviilwe kuuti, kufuma hali uMulungu ápezile imwanya ni nsi kwi idala ilya kuyanga izwi vhweleele. Havhili ápezile insi kufuma mu minzi kwi idala ilya minzi.

⁶ Havhili ku minzi igo, uMulungu áyilovwizye insi iya havhaliilizyo haala.

⁷ Havhili kwi izwi liniilyo, uMulungu azivhiisile imwanya ni nsi iya havhaliilizyo iha, kufishila isiku ilya vhulonzi lye alivipemba vwonti mu mwoto. Isiku ilyo alivhalonga nu kuvhalovwa vhonti vhe vhakuvhomba zye zitakwanzilwa pilongolela lyakwe.

⁸ Ileelo vhankundwa, mutaluvwaje izwi ili kuuti kwa Mulungu isiku lyoka lili inza amaaha 1,000, goope amaaha 1,000 gali inza isiku lyoka.

⁹ UMWENE uMulungu atakuhaavha kulunjisya ziila zye afinzile inza vwe avhantu avhanji vhakusiivha kuuti akuhaavha. Uweene akujimbiilila ku zyitu, mwe pe atakwanza umuntu wonti ateeje, nkandi kuuti avhantu vhonti vhatonte uvhutalamalandu vhwavho.

¹⁰ Isiku ilya Mwene ilya kulonga avhantu liliyinza kwi idala ilya kwitushizya inza umwivha. Isiku ilyo, imwanya yiliyeepa ku lujilimo ulupiti, ivintu vwe vwápeziilwe hali vilipembwa nu mwoto, yoope insi yiliilovha pooka ni vintu vwonti vwe vili muumwo.

¹¹ Mwe pe uMulungu alivinanganya ivintu vwonti kwi idala ilyo, vhuli, imwe mukwanzilwa kuvha mwe vhantu vhe vhali inza vhuli? Mukwanzilwa kulandila mu vhufinjile nu kuvha nu lujendo ulwinza pilongolela ilya Mulungu,

¹² uku mukuguliilila isiku liila ilya Mulungu nu kulaavha kuuti lyinze naluvhiilo. Isiku ilyo uMulungu aliyipemba imwanya nu kuyinanganya, havhili alivilovwa nu kuviyengusya nu mwoto ivintu vwonti vwe vili muumwo.

¹³ Ileelo iswe tukuguliilila imwanya impwa ni nsi impwa inza vwe áfinzile. Ukwo kwe vhalilandilaga avhagolosu.

¹⁴ Ishi vhankundwa, lwe mukuguliilila izyo kuuti zilunjishe, muvhanje nu mute kuvhomba inyinza, inga uMulungu avhavhiishe kuvha mwe vhafinjile, mwe mutali nu vhunanzi pilongolela lyakwe, nu kuvha nu vhutehamu mu mooyo giinyu.

¹⁵ Mukumbushe kuuti uMwene akuvhajimbiilila, inga muhavhwaje uvhuposhi. Vhwevhulo, vwe uwamwitu uPaavhuli unkundwa ávhasimbiiye ukalaata ku vhushindamu uvhwa njeele inza vwe uMulungu ámupiiye.

¹⁶ UPaavhuli azisimvile zyonti izyo mu vhakalaata vhaakwe vhonti, ileelo vhamo shigomu kuvhamanyinsanya. Avhantu vhe vhatasambiliiye ahinza na vhe vhatagomile mu lwitiho vhakuvhapuvwa inza vwe vhakupuvwa uVhusimbe vhumo uVhufinjile. Kuli izyo, vhakuyilondolela vhuuvho kulovha.

Amazwi aga vhusililishilo

¹⁷ Ishi ileelo imwe vhankundwa, mwe pe mwazimanya inongwa izya vhasambiilizi avha ilenga, muvhanje minso kuuti vhatahinze vhavhahopenkanye kwi idala ilya kuvhalumila ilenga. Inga mukuvhatejeelezya, munginze mugwe nu kululeha ulwitiho lwinyu ulwa nalyoli.

¹⁸ Ileelo mujendeelele kukula mu vhwila nu kumumanya uMwene wiitu nu Muposhi uYeesu Chilisiti. Uvhushindamu vhuvhanje nu weene ishi na shiima! Amina.