1 VaTesaloniki 1 - ULufingwi uLupwa

Umulaamu

¹ Ukalaata uno nsimvile neene ne Paavhuli pooka nu Silwano nu Tiimoti. Tukuvhasimbila imwe mwe muli mu shivhanza isha mu nkaaya iya Tesaloniiki, mwe mpuga iya vhantu mwe mumwitisile uTaata uMulungu nu Mwene uYeesu Chilisiti. UMulungu avhafwilaje uvhwila nu kuuvhapa uvhutehamu.

Insalifwo kuzya lwitiho ulwa Vhatesaloniiki

² Tukumusalifwa uMulungu amanda gonti ku zyinyu mwenti, havhili tukuvhalaavhila ishisita kulita.

³ Lwe tukuvhalaavhila kwa Taata wiitu uMulungu, tukukumbuha pilongolela lyakwe imbombo ye mukuvhomba ku lwitiho. Tukukumbuha umute wiinyu we wukufumiilana ni shikunzi shiinyu, havhili vwe mwimiliiye kufumiilana nu lusuuvhilo lwinyu kwa Mwene wiitu uYeesu Chilisiti.

⁴ Mwe vhamwitu, mwe uMulungu avhakunzite, tumanyile kuuti uMulungu avhasavhuuye kuvha mwe vhantu vhaakwe.

⁵ Tumanyile vhwevhulo, mwe pe lwe tukulumbiilila kuli imwe Izwi iLyinza, tutálumbiliiye ku mazwi geeka vhweleele, nkandi twálumbiliiye ku maha na kwa Mupepo uMufinjile na ku vhwahoome uvhwinji. Havhili twámanyile kuuti Izwi iLyinza ilyo lya nalyoli. Imwe mumanyile ahinza vwe tuhatendamaga pooka niimwe, inga tuvhaavwe.

⁶ Pooka nu kuuti mwámile mu mayimba kuzya lwitiho lwinyu, ileelo mwáposheleeye Izwi ilyo ku luseshelo lwe lukufuma kwa Mupepo uMufinjile. Vwe mwávhomvile vhwevhulo, mwálandasite ishiholanyo shiitu ni shiholanyo isha Mwene uYeesu.

⁷ Pe kuli izyo, mwavha mwe shiholanyo ishinza ku vhe vhamwitisile uChilisiti vhonti avha mu shigavho isha nsi isha Makedooniya ni sha Akaaya.

⁸ Kufumiilana niimwe, avhantu vhivuuye izwi ilya Mwene uYeesu. Te ku vhantu avha ku Makedooniya na vha ku Akaaya vhweleele, ulwitiho lwinyu kwa Mulungu lumanyisile kwonti. Mwe pe izya lwitiho lwinyu zimanyisile kwonti, tutakuyitamwa kuyanga zyenezyo.

⁹ Kwonti kwe tukusogola, avhantu vhakuyanga vwe mwátuposheleeye lwe tukwinza kuli imwe. Vhakuhomeshezya vwe mwávilesile iviholanyo vwinyu, nu kumwitiha uMulungu. Havhili, vhakuhomeshezya vwe mukumuvhombela uweene we mulanzi, havhili wa nalyoli

¹⁰ nu kumuguliilila uMwana waakwe uYeesu kufuma ku mwanya. Uweene we uMulungu ámuzyusiizye, havhili we akutupoha mu vhuhalazu uvhwa Mulungu vhwe vhukwinza.