1 VaKolinti 9 - ULufingwi uLupwa

Avhavhomvi vhakwanzilwa kuvhaavwa ivwa muvhili

¹ Vhuli, ine te ne musatushe? Havhili ine te ne mutumwa? Ine ntámuvhwenyi uMwene wiitu uYeesu? Havhili imbombo ye návhomvile te ye yivhavhiisile imwe kumwitiha uMwene?

² Poosye inga avhantu avhanji vhatakwitiha kuuti ne mutumwa, ileelo kuli imwe ne mutumwa, mwe pe ulwitiho lwinyu kwa Chilisiti, she shilolesyo isha kuhomeshezya kuuti, ntumiilwe nu Mwene.

³ Ishi, avhantu vhe vhakundonga ine kuuti te ne mutumwa, nkuvhavhuziilizya kuuti,

⁴ vhuli, iswe tutahondeeye kupeelwa ivwakulya ni vwakumwela ku mbombo ino?

⁵ Mukusiivha kuuti iswe tutakwitishilwa kushuula na vhashi vhiitu avhiitisi, inza vwe vhakushuula uKeefa na vhatumwa avhanji na vhanine avha Mwene uYeesu?

⁶ Vhuli, ine nu Balinaaba twe tukwanzilwa kuvhomba imbombo izinji, inga tuvwaje ivintu ivwa kutwavwa mu vhulanzi vhwitu?

⁷ Musikaali vhuli we akusogola kulwa uvhulugu ku mpiiya zyakwe wuuyo? Mulimi vhuli we atakulya amantonongwa aga mugunda waakwe? Mudiimi vhuli we atakumwela izivha ilya visugwa vwakwe?

⁸ Amazwi iga ge nkuyanga, te nsiivho zya vhantu vhweleele, zyope indajizyo izya Moose vwe zikulondovhola vhwevhulo.

⁹ Mu ndajizyo izya Moose yisimviilwe kuuti, “Utayipinyaje ingʼombe kwi ilomu lwe yikuhanyanjila ingana kupantula insanga pa luvhuga.” Vhuli, mu mazwi iga kwe kuuti uMulungu ahayangaga izya ngʼombe vhweleele?

¹⁰ Vhuli, atahayangaga izyo ku nongwa yiitu? Mwe muumwo, inongwa izi zyásimviilwe ku zyitu, mwe pe we akulima, na we akuvuna mu mugunda uwo, vhonti vhakwanzilwa kusuuvhila kuposheela shimo kufuma mu vwe vivuniilwe.

¹¹ Ileelo iswe tulumbiliiye Izwi iLyinza kuli imwe, inza umuntu we akuvhwala imbeyu. Vhuli, shikuvha shigomu nkaani kuposheela ivintu ivwa kutwavwa kufuma kuli imwe, inza umuntu we akuvuna?

¹² Inga vhaliipo avhanji vhe vhahondeeye kupeelwa ivintu vimo kufuma kuli imwe, ishi, iswe tutahondeeye kuluusya ivho? Ileelo iswe tutánzile ivintu vwe tuhanzilwaga kuposheela kufuma kuli imwe, twájimbiliiye mu zyonti, inga tutahavhadinde avhantu kwitiha Izwi iLyinza ilya Chilisiti.

¹³ Vhuli, mutamanyile kuuti vhaala vhe vhakuvhomba imbombo mu Nyumba iMfinjile, vhakulya ivwa mu Nyumba iyo? Havhili mutamanyile kuuti vhoope vhe vhakuvhomba imbombo iya pa shifinjilo, vhakuposheela vimo kufuma mu mpuutile izya pa shifinjilo isho?

¹⁴ Vhwevhulo, woope uMwene uYeesu álajiziizye átili vhe vhakulumbiilila Izwi iLyinza, vhakwanzilwa kulya kufumiilana ni mbombo iyo.

¹⁵ Ileelo ntahalaavha naalumo, poosye inga shooka muli ivwo vwe nkwanzilwa kupeelwa. Havhili ntakusimba izi, inga mpeelwe ivwo. Kuli ine kwashi kufwa kuluusya umuntu wonti kundinda ine kuyitumvwa kuzya kulumbiilila Izwi iLyinza ishisita amalipilo.

¹⁶ Ine ntahondeeye kuyitumvwa kuzya kulumbiilila Izwi iLyinza, mwe pe ino ye mbombo ye uYeesu andajiziizye kuyivhomba. Nasheela ine, inga ntakulumbiilila Izwi iLyinza!

¹⁷ Inga nkuvhomba imbombo ino ku lusukasamo lwane, pe nkandi nsuvhiiye kuposheela amalipilo. Ileelo nkuvhomba imbombo ino, mwe pe uMulungu ampiiye yeneyo ku lukasamo lwakwe.

¹⁸ Ishi amalipilo gaane shintu vhuli? Amalipilo gaane kwe kulumbiilila Izwi iLyinza ishisita kwanza kulipwa nu muntu wonti ku mbombo iyo.

Zye avhatumwa vhakwanzilwa kuvhomba

¹⁹ Pooka nu kuuti ine te ne muzya uwa muntu wonti, njivhiisile kuvha ne muzya uwa vhantu vhonti, inga mbaaje avhantu avhinji avha kumwitiha uChilisiti.

²⁰ Lwe náali ku Vhayuuda, náali inza uMuyuuda, inga mbaaje aVhayuuda vhamwitishe uChilisiti. Havhili lwe náali ku vhaala vhe vhakulandata indajizyo izya Moose, náali inza umulandati uwa ndajizyo, poosye she te ne muzya uwa ndajizyo, inga mbaaje vhe vhali ni ndajizyo vhamwitishe uChilisiti.

²¹ Lwe náali ku vhe vhatazimanyile indajizyo, náali inza umuntu we atazimanyile indajizyo, inga mbaaje vhe vhatali ni ndajizyo vhamwitishe uChilisiti. Kuvhomba vhwevhulo, te kuuti ntali ni ndajizyo pilongolela ilya Mulungu, indi nazyo, mwe pe nkulongolwa ni ndajizyo izya Chilisiti.

²² Havhili lwe náali ku vhayeyevhazu mu lwitiho, náali inza umuyeyevhazu mu lwitiho, inga mbaaje vhamwitishe uChilisiti. Ku vhantu vhonti náyivhiisile kuvha ne wamwavho, inga ku madala gonti imbaposhe vhamo.

²³ Nkuvhomba izi zyonti kuzya Izwi iLyinza, inga nkaavhe nu vhuliilani na vhanji mu vhuloote uvhwa mbombo ino.

²⁴ Vhuli, mutamanyile kuuti avhantu vhe vhakutumvanya mu luvhilo, vhonti vhakushimbila, ileelo we akuposheela ishipeelwa akuvha wooka? Vhwevhulo niimwe, muyikungulaje kuvhomba zye zihondeeye pilongolela ilya Mulungu, inga muhaposheele ivipeelwa.

²⁵ Vhe vhakutumvanya mu luvhilo, vhakuvhomba izya kugakonzya amavhili gaavho, inga vhapoote ulutumvanyo. Vhakuvhomba izyo, inga vhaposheele ishipambwi she shikunanjiha. Ileelo iswe tukuvhomba vhwevhulo, inga tuhaposheele ishipambwi she shitakunanjiha naalumo.

²⁶ Vhwevhulo, niine ntakushimbila inza umuntu we akushimbila shaaha, havhili ntakulwa inza umuntu we akusumba imbuli ku maha pe patali ishintu naashimo.

²⁷ Ileelo nkuwuyimvwa nu kuwuvheelezya umuvhili waane kujimbiilila, inga lwe navhakumusizya avhanji Izwi iLyinza, uMulungu atahinze ankaane.