1 VaKolinti 7 - ULufingwi uLupwa

Insambiilizyo izya kwimala

¹ Ishi, naakuyanjila inongwa ziila zye mwaansimbiiye ine kuuti, “Hinza umwanaavuli atajendaje nu mwantanda.”

² Ileelo, mwe pe kuli indingo izya kumupelela umuntu kuvhomba uvhulugusu, umwanaavuli avhanje nu mushi waakwe wuuyo, woope umwantanda avhanje nu mulume waakwe wuuyo.

³ Umulume amuvhombelaje umushi waakwe inza vwe yikwanzilwa ku vhe vhimaliine, woope umushi amuvhombelaje umulume waakwe inza vwe yikwanzilwa ku vhe vhimaliine.

⁴ Umushi atali na maha nu muvhili waakwe, nkandi umulume waakwe. Woope umulume atali na maha nu muvhili waakwe, nkandi umushi waakwe.

⁵ Mutimanaje, nkandi inga mwitinkiine kuleha ku havhaliilizyo hansi, inga muyifumwe kumulaavha uMulungu. Ileelo pisinda mugalushilanaje havhili, inga uSeetano atahinze avhalinje kuzya kupootwa kuyikonzya kwinyu.

⁶ Inongwa izi zye navhavhuuzya kuuti mungaaleha ku havhaliilizyo hansi vhweleele te ndajizyo, mpanzyo vhweleele.

⁷ Ine naasungwilwe kuuti, avhantu vhonti vhavhe inza ine, ileelo te vwe zili, mwe pe uMulungu avhapiiye avhantu vhonti ivikunjilwa vwavho, wumo ishikunjilwa ishi, uwamwavho shiila.

⁸ Ishi nkuvhavhuuzya vhe vhatimaaye nu kwimalwa na vhaziishe kuuti, hinza kuuti vhasyale vhwevhulo inza vwe ine indi.

⁹ Ileelo inga vhakupootwa kujimbiilila, hinza kwimala poosye kwimalwa, mwe pe kwashi kuvhomba vhwevhulo, kuluusya kuyimvilwa ni mpapilo.

¹⁰ Vhaala vhe vhimaliine nkuvhalajizya kuuti, umushi atahalehaane nu mulume waakwe. Ululajizyo ulu te lwane, lwa Mwene uYeesu.

¹¹ Inga amuleha, atahiimalwe ukunji, pamo ayivwane havhili nu mulume waakwe nu kugalushilana. Woope umulume, atahamuleshe umushi waakwe.

¹² Ileelo avhantu avhanji nkuvhavhuuzya kuuti, inga aliipo uwamwitu wumo we umushi waakwe te mwitisi, ileelo umushi uyo akwitiha kutendama nawo, atahamuleshe. Ululajizyo ulu te lwa Mwene uYeesu, lwane neene.

¹³ Woope umwantanda umwitisi we umulume te mwitisi, ileelo umulume uyo akwitiha kutendama nawo, atahamuleshe.

¹⁴ Nkuyanga vhwevhulo, mwe pe uMulungu akumwitiha umulume uyo kuvha muntu waakwe kwi idala ilya mushi waakwe. Woope umushi we te mwitisi, uMulungu akumwitiha kuvha muntu waakwe kwi idala ilya mulume waakwe. Inga te she shiyo avhaana vhiinyu, nkandi vhatitishiliilwe nu Mulungu, ileelo ishi vhitishiliilwe.

¹⁵ Ileelo umwanaavuli, poosye umwantanda we te mwitisi inga akwanza kumuleha uwamwavho we mwitisi, mumuleshe avhombe inza vwe akwanza. Ipo umwitisi umwanaavuli, poosye umwantanda, atakukungwa nu lulajizyo ulwa kwimalana. Ileelo uMulungu avhiisite kuuti, mulandilaje ku vhutehamu.

¹⁶ We mwantanda iwe, umanyile vhuli kuuti pamo kwe umuposhe umulume waaho? Poosye we mwanaavuli iwe, umanyile vhuli kuuti pamo kwe umuposhe umushi waaho?

Avhantu vhonti vhasyale inza vwe vháamile

¹⁷ Avhantu vhonti vhakwanzilwa kulandila inza vwe uMwene uYeesu avhavhiisile, havhili vhasyale inza vwe vháamile lwe uMulungu akuvhiita. Ulu lwe lulajizyo lwane ku vivhanza vwonti.

¹⁸ Inga wátahiliilwe lwe uMulungu akukwita, utahayivhiishe ngati fwe utátahiliilwe. Havhili inga utátahiliilwe lwe uMulungu akukwita, utahayivhiishe ngati fwe wátahiliilwe.

¹⁹ Kutahiililwa poosye kuvha ishisita kutahiililwa kutali ni ilonka naalimo, nkandi kulema indajizyo izya Mulungu.

²⁰ Ishi, avhantu vhonti vhasyale inza vwe vháamile lwe uMulungu akuvhiita.

²¹ Inga wáamile we muzya lwe uMulungu akukwita, ilyo litahakutamwe. Ileelo inga ungalyaga idala ilya kukuvhiiha kuvha we musatushe, kwashi uvhombe vhwevhulo.

²² Nkuyanga vhwevhulo, mwe pe umuntu we áamile muzya lwe uMwene uYeesu akumwita, uyo musatushe kwa Mwene uYeesu. Woope we áamile musatushe lwe uMwene akumwita, uyo muzya uwa Chilisiti.

²³ Mukaziilwe imwe ku nsavho impiti. Ishi mutavhanje mwe vhazya avha vhantu.

²⁴ Vhamwitu, avhantu vhonti vhasyale inza vwe vháamile lwe uMulungu akuvhiita.

Impanzyo ku vhalindu na vhaziishe

²⁵ Ishi, avhalindu vhe vhatimaliilwe, ntali nu lulajizyo kufuma kwa Mwene uYeesu. Ileelo nkuvhapanzya ku nsiivho zyane ine ne uMulungu ambiisile kuvha ne mutungamu kwi idala ilya vhwila uvhwa Mwene uYeesu.

²⁶ Kulandatana ni ntamwo zye ziliipo insiku izi, nkusiivha kuuti hinza umuntu asyale inza vwe ali.

²⁷ Vhuli, iwe uyimaaye? Inga uyimaaye, utahanze kulehaana nu mushi waaho. Vhuli, iwe ushiili kwimala? Inga ushiili kwimala, utahanze kwimala.

²⁸ Ileelo poosye inga wiimala, utakuvha wavhomba uvhutalamalandu. Woope umulindu inga ayiimalwa, atakuvha avhomba uvhutalamalandu. Ileelo vhe vhimaliine vhaliivha na mayimba aga mu nsi umu. Ine nkuvhasoha, inga zitahinze zivhaaje izyo.

²⁹ Vhamwitu, nkuyanga kuuti ahavhaliilizyo he hasyaye, hansi. Ishi kufuma ahavhaliilizyo iha, vhaala vhe vhimaaye vhaleshe kuvhasiivha vhe vhashi vhaavho vhweleele, vhasiivhaje nkaani kumuvhombela uMwene uYeesu.

³⁰ Vhoope vhe vhakukuuta vhavhe ngati vhatakukuuta, havhili vhe vhakuseshela vhavhe ngati vhatakuseshela. Vhoope vhe vhakukala ivintu vhavhe ngati vhatali navwo.

³¹ Vhaala vhe vhakuvhomba izya mu nsi umu, vhaleshe kuzisiivha izyo, mwe pe insi ino inza vwe tukuyilola yikutuuha.

³² Ishi nkwanza kuuti muleshe kuzisiivha intamwo izya mu nsi. Umuntu we atimaaye, akuyikungula kumuvhombela uMwene uYeesu, mwe pe akusiivha kumuhondezya we Mwene.

³³ Ileelo umuntu we ayimaaye, akuyikungula kuvhomba izya mu nsi, akusiivha vwe angamuhondezya umushi waakwe,

³⁴ insiivho zyakwe zikuvha imbazu zivhili. Umulindu asugiine nu mwantanda we ayimaliilwe. Umwantanda we atimaliilwe akuyikungula kumuvhombela uMwene, inga avhe mufinjile umuvhili nu mwoyo. Ileelo umwantanda we ayimaliilwe, akuyifumwa kuvhomba izya mu nsi umu nu kusiivha vwe angamuhondezya umulume waakwe.

³⁵ Amazwi iga ge nkuvhavhuuzya te kuuti nkwanza kuvhadinda, nkandi kuvhaavwa. Nkwanza kuuti mulandilaje inza vwe yikwanzilwa, mumuvhombelaje uMwene uYeesu ishisita kuvha ni zya kuvhapinzya.

³⁶ Umwanaavuli angaalola kuuti te hinza kumuleha umulindu we amuzinjiiye, she impapilo zyakwe zikumupoota. Umwanaavuli uyo inga akulola kuuti yihondeeye kwimalana, avhombe inza vwe akwanza, vhimalane. Ipo atakuvha avhomba uvhutalamalandu.

³⁷ Ileelo inga umwanaavuli uyo ayitisile mu mwoyo waakwe kuuti te ayiimale, havhili inga angawukonzya umuvhili waakwe, lwe avhomba ahinza kuvha ishisita kumwimala umulindu uyo.

³⁸ Kuli izyo, we akumwimala umulindu we amuzinjiiye, akuvhomba ahinza. Ileelo we atakwimala, akuvhomba ahinza nkaani.

³⁹ Umwantanda we ayimaliilwe, akuvha akunziilwe nu lulajizyo ulwa vhusendelo ahavhaliilizyo honti he umulume waakwe mupuuma. Ileelo inga umulume waakwe aafwa, pe akuvha musatushe kwimalwa nu mwanaavuli uwunji we akumwanza, ileelo umwanaavuli uyo avhe mwitisi uwa Mwene uYeesu.

⁴⁰ Ileelo kwashi umuziishe uyo asyale ishisita kwimalwa. Izyo nsiivho zyane, ileelo ine nkusiivha kuuti niine uMupepo uwa Mulungu akundongola kuyanga amazwi igo.