1 VaKolinti 10 - ULufingwi uLupwa

Insoshi kufumiilana ni shiholanyo isha Vhaisilayeeli

¹ Vhamwitu, nkwanza mumanye ahinza kuuti, lwe avhataata vhiitu vhakutuuha mu luugwa, vhonti vhahalongolwaga ni ivhingo, havhili vhonti vhátuusile pahati pa sumbi uwa Shaamu.

² Kulongolwa ni ivhingo ilyo nu kutuuha pahati pa sumbi, kwáli inza kwozelwa nu kuvha vhalandati vha Moose.

³ Vhonti vháliiye ishaakulya sheshiila she sháfumile ku mwanya.

⁴ Havhili vhonti vhámweleeye aminzi gegaala ge uMulungu ávhapiiye kwi idala ilya kusukumizya, kufuma mwi iyalaawe lye lyáfumile ku mwanya. Iyalaawe ilyo lyámile wu Chilisiti we ahajendaga pooka navho.

⁵ Ileelo avhinji muli ivho, uMulungu atáhondeziilwe navho. Kuli izyo, uMulungu ávhalovwizye, ivwala vwavho vihasaata shaaha mu luugwa.

⁶ Inongwa izi shiholanyo isha kutusoha iswe, kuuti tutanyonywaje imbiivhi inza avheene vwe vhahanyonywaga.

⁷ Ishi mutapuutaje iviholanyo inza vhamo muli ivho vwe vhahavhombaga. Izyo zili inza vwe yisimviilwe mu Vhusimbe uVhufinjile kuuti, “Avhantu vhátendiime kulya nu kumwela, pisinda vhahimiilila kwimba ishilugusu.”

⁸ Havhili tutavhombaje uvhulugusu inza vhamo muli ivho vwe vhávhomvile, vhahalovha avhantu 23,000 kwi isiku lyoka.

⁹ Havhili tutamulingaje uChilisiti inza vhamo muli ivho vwe vhámulinzile, vhahalumwa ni njoha, vhahafwa.

¹⁰ Havhili mutakwinkwinaje inza vhamo muli ivho vwe vhákwinkwinile, uhavhizya umugozi ahavhalovwa.

¹¹ Ishi zyonti izyo zye zyávhaazile avheene, zyásimviilwe, inga shivhe shiholanyo isha kutusoha iswe twe tukulandila ahavhaliilizyo iha aha kumpeleela.

¹² Pe ishi, we akuyilola kuuti ayimiliiye ahinza mu lwitiho, avhe minso, inga atahinze agwe.

¹³ Indingo zye zikuvhaaga imwe, zili inza zye zikuvhaaga avhantu avhanji. Ileelo uMulungu mutungamu, uweene te avhaleshe mulingwe kuluusya amaha giinyu. Lwe imwe mukulingwa, uweene akuuvhapa amaha aga kujimbiilila ni idala ilya kufumila.

Insoshi kuzya shaakulya isha Mwene

¹⁴ Kuli izyo vhankundwa, mutapuutaje iviholanyo!

¹⁵ Nkuyanga niimwe mwe muli ni njeele, musivhiilile ahinza zye nkuyanga.

¹⁶ Ishi, lwe tukumusalifwa uMulungu ku zya lupindi luula lwe tukumwelela ahavhaliilizyo aha shaakulya isha Mwene, vhuli, tutakuvha nu vhuliilani nu Chilisiti mu mavhanda gaakwe? Havhili lwe tukumensula ikaati nu kulya, tutakuvha nu vhuliilani nu muvhili uwa Chilisiti?

¹⁷ Kuli ikaati lyoka vhweleele. Poosye inga iswe twe vhinji, ileelo tuli umuvhili wooka, mwe pe tuli nu vhuliilani mwi ikaati liniilyo lyoka.

¹⁸ Vhasivhiilili aVhaisilayeeli, vhuli, vhatáali umuvhili wooka kwi idala ilya kupuuta nu kulya pooka impuutile, zye avhapuuti vhahafumwaga pa shifinjilo?

¹⁹ Vhuli, ishi inti vhuli? Vhuli, ivintu vwe avhantu vhakufumwa ku viholanyo vili ni ilonka limo? Poosye iviholanyo ivwo vikwavwa shimo?

²⁰ Ndaali! Impuutile zye vhakufumwa avhantu vhe vhakupuuta iviholanyo, vhatakumufumwizya wu Mulungu, vhakufumwa kwe ku mpepo inkandamanu. Ine ntakwanza kuuti imwe muvhe nu vhuliilani ni mpepo inkandamanu.

²¹ Imwe yitakwanzilwa kumwelela ulupindi ulwa Mwene, havhili kumwelela ulupindi ulwa mpepo inkandamanu. Mutakwanzilwa kulya ishaakulya isha Mwene, havhili kulya ishaakulya isha mpepo inkandamanu.

²² Vhuli, tukwanza kumuviisya uMwene? Vhuli, tuli na maha kuluusya uweene?

Zye tukuvhomba zileetaje uvhushindamu kwa Mulungu

²³ Vhamo vhakuyanga vhakuti, “Iswe twitishiliilwe nu Mulungu kuvhomba zyonti.” Ileelo ine nkuti, te zyonti zye zili ni ilonka. Havhili poosye she vhakuti, “Iswe twitishiliilwe nu Mulungu kuvhomba zyonti.” Ileelo ine nkuti te zyonti zye zikwavwa kuvhagomwa avhantu mu lwitiho.

²⁴ Avhantu vhonti vhatavhombaje zye zili ni ilonka ku kwavho, nkandi vhavhombaje zye zili ni ilonka ku vhamwavho.

²⁵ Inyama zye vhakukazya mu nsokooni mulyanje ishisita kuvhuziilizya-vhuziilizya, inga mutayimbaje mu mooyo giinyu.

²⁶ Yeenya, yisimviilwe mu Vhusimbe uVhufinjile kuuti, “Insi pooka ni vintu vwonti vwe vili muumwo vwa MWENE uMulungu.”

²⁷ Umuntu we te mwitisi inga avhalanjila kulya, niimwe mwitiha kusogola, ivintu vwonti vwe avhasenganiziinye, mulyanje ishisita kuvhuziilizya-vhuziilizya, inga mutayimbaje mu mooyo giinyu.

²⁸ Ileelo inga umuntu avhavhuuzya kuuti, “Ishaakulya ishi vhafumwizye impuutile ku viholanyo,” pe mutahasheele kulya kuzya muntu we avhavhuuzya, havhili kuzya kuyimvilwa mu mooyo.

²⁹ Lwe nkuti kuzya mooyo, ntakuyanga izya mooyo giinyu, nkandi izya mwoyo uwa ula we akuvhavhuuzya. Ishi shooni she kuyimvilwa ukwa mwoyo uwa wunji kuneefwezye uvhusatushe vhwane?

³⁰ Inga ine nkulya ishaakulya isho uku nkumusalifwa uMulungu, pe shooni she nkulongwa kuzya shaakulya she nkumusalifwa uMulungu?

³¹ Ishi, zyonti zye mukuvhomba, yivhe kwe kulya, poosye kumwela, poosye ishinji shonti she mukuvhomba, muvhombaje kuzya kuumupa uMulungu uvhushindamu.

³² Mutavhavwalazyaje amooyo aVhayuuda, poosye vhe te Vhayuuda, poosye avhantu avha mu shivhanza isha Mulungu.

³³ Muvhanje inza ine. Nkuyikungula kuuti ku zyonti zye nkuvhomba, avhantu vhonti vhaseshelaje. Ntakuvhomba vhwevhulo, inga ine indyaje ilonka, nkandi inga avhantu avhinji vhalyaje ilonka, inga vhapokwe.