1 Peteli 4 - ULufingwi uLupwa

Uvhulanzi vhwe vhukumuhondezya uMulungu

¹ Mwe pe uChilisiti áyimviliilwe mu muvhili waakwe, niimwe vhweleele muyisengaanye kuyimvilwa inza uweene. Nkuyanga vhwevhulo, mwe pe umuntu we akuyimvilwa umuvhili, akulehaana nu vhutalamalandu.

² Ahavhaliilizyo hiinyu he hasyaye aha kulandila pa nsi ipa, muleshe kulandila kulandatana ni mpapilo izya mavhili giinyu, nkandi mulandilaje inza vwe uMulungu akwanza.

³ Nkuyanga vhwevhulo, mwe pe hali ahavhaliilizyo honti mu vhulanzi vhwinyu muhavhombaga zye avhantu vhe vhatamwitisile uMulungu vhakusungwa kuvhomba. Ahavhaliilizyo iho muhavhombaga uvhumalaaya nu kulandata impapilo imbiivhi nu vhwashimwela nu vhupafu nu kuvha ni vikulukuulu ivwa kumwela nu kupuuta iviholanyo.

⁴ Avhantu ivho vhe vhatamwitisile uMulungu, vhakusukumila, mwe pe mutakuvha pooka navho kuvhomba uvhutalamalandu, pe vhakwanda kuvhasaamula.

⁵ Ileelo vhaliyiyanjila vhuuvho pilongolela ilya Mulungu, we ayisengiinye kuvhalonga avhantu vhonti avhalanzi na vhafwe.

⁶ Ye nongwa avhantu vhe vhafuuye, vhoope vhálumbiliilwe Izwi iLyinza, inga vhalongwe ku mbombo zyavho izya muvhili inza avhantu avhanji, havhili vhavhe nu vhulanzi ku maha aga Mupepo uMufinjile pilongolela ilya Mulungu.

⁷ Uvhusililishilo uvhwa vintu vwonti vhupalamiiye, ishi muyikonzyaje, havhili muvhanje minso ku zye mukuvhomba, inga mulaavhaje vwe yikwanzilwa.

⁸ Ipiti ku zyonti mukundanaje ku mwoyo wonti, mwe pe inga wamukunda umuntu kwe uvhanje ukumuswila, poosye inga akuvhombela uvhutalamalandu ulwinji.

⁹ Lwe mukuvuulana, mutetelanaje ishisita ulukwinkwino.

¹⁰ UMulungu avhapiiye avhiitisi ivikunjilwa ivwa mavhiila mu mavhiila. Kuli izyo, vhonti vhakwanzilwa kuvhombela ivikunjilwa vwavho kuvhavhombela avhanji inza umwimiilizi umwinza uwa vipeelwa ivwa mavhiila mu mavhiila ivwa Mulungu.

¹¹ We ali ni shikunjilwa isha kulumbiilila, alumbililaje mu vhwanalyoli uvhwa Mulungu. We ali ni shikunjilwa isha vhuvhomvi, avhavhombelaje avhamwavho ku maha ge uMulungu amupiiye. Kwi idala ilyo, uMulungu kwe avhanje akutiimwa ku zyonti kutuushila kwa Yeesu Chilisiti we ali nu vhushindamu na maha shiima shiima. Amina.

Kuyimba kuzya Chilisiti

¹² Vhankundwa, indingo impiti zye zikuvhaaga kwi idala ilya mayimba, mutazisukumilaje ngati shintu she shijeni kuli imwe.

¹³ Ileelo museshelaje, mwe pe mukuyimba inza vwe uChilisiti áyimvile. Kuli izyo, muliivha nu luseshelo ulupiti nkaani, lwe uChilisiti aloleha mu vhushindamu vhwakwe.

¹⁴ Inga mukuligwa, mwe pe mwe vhiitisi avha Chilisiti, mumanyaje kuuti mulosiitwe, mwe pe uMupepo uwa kusukumizya uwa Mulungu ali pooka niimwe.

¹⁵ Inga mukuyimvilwa, mutayimvilwaje kuzya kugoga ni zya kwivha ni zya kuvhomba uvhunanzi, poosye izya vhulumaluma.

¹⁶ Ileelo umuntu inga akuyimba, mwe pe Muchilisiti, atalolaje insoni, nkandi amutiimaje uMulungu, mwe pe akwitwa kuuti Muchilisiti.

¹⁷ Ahavhaliilizyo aha vhulonzi haafiha, uMulungu akwanda kuvhalonga avhantu vhaakwe. Ishi inga uvhulonzi vhukwanda kuli iswe swe vhantu vhaakwe, vhuli, ivho vhe vhatakwitiha Izwi iLyinza ilya Mulungu, kulongwa kwavho te kuhaavhe kwa kwogofwa nkaani?

¹⁸ Izyo zili inza vwe yisimviilwe mu Vhusimbe uVhufinjile kuuti, “Inga shigomu kwa mugolosu kupokwa, ziliivha vhuli kwa mutalamalandu we atakumunyila uMulungu?”

¹⁹ Pe ishi, avhantu vhonti vhe vhakuyimba ku lukasamo ulwa Mulungu, vhajendeelele kuvhomba inyinza nu kuyivhiiha mu nyoovhe izya Mulungu we ahavhapela, havhili we mutungamu.