Roma 4 - Nouveau Testament en Ngienboum

Efʉ̀’ gie e la fó ná Ábalam

¹ Tà áa pá’ɔɔn pege ge gɔɔn ngie kɔ́, á nà nò Ábalam gẅie aa mangʉa njʉ’ weg pà Yuda? À la lɔg metʉ̀ nyìŋ mesoŋ ńgẅiin kɔ́?

² À laa pé’è e Ssé wɔ́ gɔɔn ngie aa ndʉŋ ndʉŋ mvfò yé, á fó pɔ́ nà mefà’ mbòŋo mé, mbà à lɔ̌ɔn ńgwɔ́ á lɔg ńŋá’te, tá tsɔ̌ légwɔ́ gẅie ńgwɔ́ á lɔg ńŋá’te mvfò Ssé à tè wó wɔ́.

³ Ŋwà’ne Ssé zɔɔn ńgɔɔn ngie kɔ́? Á gɔɔn ngie: «Ábalam la záb ntʉ́m wé nà Ssé, e Ssé fó mǒ ńcʉ́’ ńdíe yé, á gwɔ́ mvfò yé ńgwɔ́ pɔ́ ndʉŋ ndʉŋ».

⁴ Pege zɔɔn ne ńzsé ngie, nyìŋ fa’a fà’, tà mé ná nkáb né yé ńtí yɛ̌ fà’, yɛ̌ nkáb é tè gwɔ́ pɔ́ tsɔ́ mmó gie mé náa né yé pɔ́ sẅɛɛ sẅɛɛ wɔ́, ee gie á zɛ́te ngie mé ná né yé.

⁵ Tá ńké ńgʉa ná nyìŋ gẅie à kaa lɔg pɔ́ mefà’ mé wɔ́, ńzáb pɔ́ ndà’ ntʉ́m wé nà Ssé gẅie à gÿo nyìŋ tepòŋ cʉ́’ʉ nyìŋ gẅie aa ndʉŋ ndʉŋ mvfò yé, e Ssé lɔg pú’u, ńcʉ́’ ńdíe yé á gwɔ́ pɔ́ ndʉŋ ndʉŋ mvfò yé.

⁶ Á gíŋ ńgwɔ́ mmó gie fùɔ Ndavíd la gɔɔn. À la gɔɔn nò ná nyìŋ gẅie e Ssé cʉ̌’ ńdíe yé á gwɔ́ mvfò yé ńgwɔ́ pɔ́ ndʉŋ ndʉŋ, á ké tè fóo nà mefà’ ngàŋ wɔ́, wɛ̌ nyìŋ aa shÿó mbòŋo.

⁷ Fùɔ Ndavíd la gɔɔn ngie: Pàshÿó mbòŋo ée pʉ̀a pie e Ssé legé mefʉa mɔ́b MÀvéle menò tepòŋ mɔ́b

⁸ Ashÿó mbòŋo aa nyìŋ gẅie Cʉ̀apʉ̀a cʉ’ʉ́ ńkímte menò tepòŋ mé wɔ́

⁹ Tà áa pá’ɔɔn wɔɔn légwɔ́ shÿó mbòŋo, á gwɔ́ pɔ́ we pʉ̀a pie mé la pú’u wɔ́b pá’ pɔ́ ge gwɔ́ pʉ̀a Ssé kà à giŋé ńgwɔ́ mbɔɔ we pʉ̀a pie mé la tè wɔ́b pú’? Pege ee pá’ɔɔn ne ńgɔɔn ngie á la gʉa ná Ábalam, e Ssé lɔg pɔ́ pá’ à zǎb ntʉ́m ná yé Ssé, ńcʉ́’ ńdíe yé á gwɔ́ pɔ́ ndʉŋ ndʉŋ mvfò yé.

¹⁰ À la gÿo pú’u, ná yé á fʉ̀’e kɔ́? Á la gwaa gwɔ́, mbà mé pú’u Ábalam kà mé la nyé tè pú’u yé? Á la tè gwaa gwɔ́, mbà mé pú’u yé wɔ́.

¹¹ Mé la gwaa pú’u Ábalam, e Ssé ne ńdíe yé á gwɔ́ pɔ́ ndʉŋ ndʉŋ mvfò yé, á nue à la ne ńzába ntʉ́m wé nà Ssé. Mé la gÿo tá ńcÿɔ’ɔ liŋé nyìŋ gẅie mé pú’u yé ná yé. Yɛ̌ liŋé lɔ́ɔn ńda’te ngie Ssé fǒ ná pá’ yé Ábalam zǎb ntʉ́m ná yé, ńdɔgɔ yé ńgÿo nyìŋ gẅie aa ndʉŋ ndʉŋ mvfò yé. Á fó pú’u Ábalam cʉ́’ʉ tá pà pʉ̀a métsèm pie pɔ́ ne ńzába ntʉ́m nà Ssé tà mbɔɔ pá’ mé kaa wɔ́b pú’u, e Ssé cʉ́’ʉ ńdíe wɔ́b pɔ́ gwɔ́ ndʉŋ ndʉŋ mvfò yé.

¹² Ábalam gǐŋ ńgwɔ́ tá pà pʉ̀a pie mé la pú’u wɔ́b. N tě ńgɔɔn pʉ̀a pie mé la pú’u wɔ́b á ku’ pú’u mbwo pɔ́b wɔ́. N gɔɔn pie pɔ́ gíŋe ne ńzába ntʉ́m nà Ssé, pá’ tá wege Ábalam la záb wé yé tá mé gÿo ḿbú’u yé.

Ammó gie Ssé la ka’ la pumte ná Ábalam

¹³ Atsɔ́ nò gíŋ ńgwɔ́ ngie e Ssé la ka’a mbwo Ábalam, mbɔɔ mbwo ngẅɛ̀ ye ngie à ge lá’ ná ngwòŋ mbwo pɔ́b. E Ssé lɔ̌ɔn tě ńka’a pá’ɔɔn, pɔ́ mélà’mie Ábalam la ne ńgÿo mmó gie *lepʉ̌ ne ńzɛ́te wɔ́, á la fó pɔ́ ná pá’ à záb ntʉ́m nà Ssé, e Ssé cʉ́’ ńdíe yé á gwɔ́ pɔ́ ndʉŋ ndʉŋ mvfò yé.

¹⁴ Á la gwe’e pé’è ńgwɔ́ gie mé ge fó pɔ́ ná pá’ mé gÿǒ mmó gie *lepʉ̌ ne ńzɛ́te, tá gẅiin mmó gie e Ssé la ka’, mbà lézáb ntʉ́m nà Ssé à gwɔ́ pɔ́ sẅɛɛ sẅɛɛ, ammó gie Ssé la ka’ piŋ le pumte.

¹⁵ *Lepʉ̌ zɔɔn ńgÿo lóŋ Ssé gyáŋ gyáŋ á nue pʉ̀a té ne ńkú’te wɔ́. Á la gwé’e pé’è *lepʉ̌ té wó wɔ́, mbà pʉ̀a té fʉa *lepʉ̌ pá’ɔɔn wɔ́.

¹⁶ Áa mmó gie á gÿo, nyìŋ lɔg pɔ́ lézáb ntʉ́m nà Ssé tá ńgẅiin shúm sie mé la ká’. E Ssé lɔgɔ pú’u, ńcÿó pɔ́ gem yé, á lêen ńké ńcʉa pú’u, awɔ̌wɔ́ɔ gẅie aa nà ngẅɛ̀ Ábalam wɔ́ gẅiin ye mǒ. Tà é le gwɔ́ pɔ́ ndà’ pʉ̀a pie pɔ́ ńnéŋe ńjú’ yɔ́b pɔ́ mbwo *lepʉ̌ Mǒsê wɔ́, é gíŋe ńgwɔ́ mbɔɔ pʉ̀a pie pɔ́ zába yɔ́b pɔ́ ntʉ̀m nà Ssé pá’ Ábalam. Àa tá wege metsèm pie pege ee pʉ̀a Ssé.

¹⁷ Ndʉŋ ndʉŋ pá’ ŋwà’ne Ssé ne ńgɔɔn ná yé ngie: «Mèŋ n zabá gú pá’ ɔ̀ ge gwɔ́ mangʉa njʉ’ pʉ̀a melá’a melá’». Ábalam aa mvfò Ssé gẅie yé Ábalam la záb ntʉ́m ná yé, ńgwɔ́ mangʉa njʉ’ wege, é gwɔ́ Ssé gie e gÿo mepfó gíŋe ńgwɔ́ wó, ńtóŋo mmó gie á zɔɔn tè wó wɔ́, á kẅɛɛ ńtyé.

¹⁸ E Ssé la ka’a mmó mbwo Ábalam, atsɔ́ légwɔ́ gẅie à lɔ̌ɔn ńgwɔ́ á kwaŋa légẅiin à la tè wó wɔ́, tá á ke ńzáb ntʉ́m wé nà Ssé zǎb, ńnéŋe ne ńzẅí’te yɛ̌ mmó, ńgÿo ńcʉ́’ʉ tá pà mengwòŋ tà ńgyɔ́ɔn. Á lɔgɔ ńcʉ́me ná nò gie Ssé la gɔɔn né yé ngie: «Gyá pá’ ngẅɛ̀ jù ge lá’ gyɔ́ɔn pú’u».

¹⁹ E Ssé la gwɔ́ gɔɔn yɔɔn nò né Ábalam á cʉ́’ pɔ́ méjʉ’ à gẅiin ngù’ nkÿo. Mbà mbùm ye tǎŋ tɛ’. Anzwě we Sara gíŋ ńzẅiŋ tà ńgwɔ́ gie à lɔɔn ńgwɔ́ á le gíŋe ńzyé wɔ́. Tá Ábalam ké tè kʉ́a lézáb ntʉ́m nà nò gie Ssé gɔ̌ɔn wɔ́.

²⁰ À la tè mʉ́’te nà nò gie Ssé ka’á mbwo yé wɔ́. Tà ńcʉ́’ pú’u, mbà lézáb ntʉ́m nà Ssé la gÿo á tʉ́te, ńnéŋe ne ńgu’te Ssé,

²¹ ńkwa’ ne ńcwoŋo ńzsé ngie Ssé gẅiin metʉ̀ lélɔg ńgÿo ammó gie yé Ssé kǎ’ á pumte.

²² Áa mmó gie á la gÿo e Ssé líe Ábalam á gwɔ́ ndʉŋ ndʉŋ mvfò yé.

²³ Tá mé lɔ́ɔn tě sáŋa pɔ́ ndà’ yé gílé yé tá ńŋwe’e ngie: «E Ssé la líe yé, á gwɔ́ ndʉŋ ndʉŋ mvfò yé wɔ́».

²⁴ Mé lɔ́ɔn sáŋa mbɔɔ wégè yégè, pie e Ssé lɔ̌ɔn ńge gÿo líe wégè, pege gwɔ́ ndʉŋ ndʉŋ mvfò yé, á wégè pie pege zába ntʉ́m ná yé Ssé gẅie à la gÿo Ndè wege Yěsô Kristo fó lá’ mepfó ńzím.

²⁵ Yé zɔ la ńnéŋe Kristo mbwo pʉ̀a pá’ à ge kwé é tí menò tepòŋ mégè. Á la piŋ ńzíme yé nà legwé éfó mǒ ńcʉ́’ ńdíe wégè pege gwɔ́ ndʉŋ ndʉŋ mvfò yé.