Roma 14 - Nouveau Testament en Ngienboum

Tà nyìŋ túu lɔ̌’ fɛ́ we

¹ Mefɛ́ pɔ́ɔn, pi ne ńzsé ngie áa tsetsɛ̀ɛ pege, tsɔ́ pʉ̀a lɔg pá’ pɔ́ ne ńjú’u yɔ́b nò Ssé, ńne ńdÿɔ́’te tsɔ́ shúm, pi kú’te wɔ́b kú’te tà pia pɔ̌ zoŋo nò ná yɔ́b mmó gie pɔ́ ne ńkwaŋa.

² Tsɔ̌ nyìŋ lɔgɔ nò Ssé ńzsé ngie à gyá kɔ́ wɔ́, ńgwɔ́ á pfɛ́ ye pfɛ́. Wetsɔ́ nyìŋ gẅie à ne ńdɔgɔ nò Ssé ńdÿɔ́’te tsɔ́ shúm zsé ngie à ge pfɛ́ pɔ́ ndà’ nzab.

³ Nyìŋ gẅie à gyá kɔ́ wɔ́ ńgwɔ́ á pfɛ́ yé pfɛ́, à pɔ́ɔn lékʉ́e nyìŋ gẅie à tè pfɛ́ shúm ntsèm wɔ́. Nyìŋ gẅie à tè pfɛ́ shúm ntsèm wɔ́ à pɔ́ɔn létúu *lɔ̌’ nyìŋ gẅie à gyá yé kɔ́ wɔ́ ńgwɔ́ á pfɛ́ yé pfɛ́ á nue e Ssé kúe yé yé.

⁴ Ɔ̀ɔ wɔ̌ tà ńtúu *lɔ̌’ ngàŋa fà’ nyìŋ ndyɛ̀’ɛ? À lɔɔn fʉa nò lo, à tè fʉa lo, mbà tá fà’ we zɔ gẅiin légɔɔn. Yé Cʉ̀apʉ̀a zɔɔn ńku’u légɔɔn ngie ngàŋ kaa nò fʉa.

⁵ Áa mbwo tsɔ̌ nyìŋ, á zsé ngie tsɔ́ melyɛ’ɛ́ lá’ cʉa metsɔ́, ńgwɔ́ mbwo wetsɔ̌ nyìŋ, á zsé yé ngie melyɛ’ɛ́ lá’ gwɔ́ pɔ́ ndʉŋ ndʉŋ. Á zɛ́te ngie wɔ̌wɔ́ɔ kwa’ ńnyɛte ńzsé mmó gie aa ntʉ́m yé ne ńzsé.

⁶ Nyìŋ gẅie à gẅiin tyɛ’te ná melyɛ’ɛ́ lá’, à gÿo tyɛ’te pú’u, pɔ́ lélɔg ńgu’te Cʉ̀apʉ̀a. Nyìŋ gẅie à gyá kɔ́ wɔ́ ńgwɔ́ à pfɛ́ yé pfɛ́, à pfɛ́ pú’u, pɔ́ lélɔg ńgu’te Cʉ̀apʉ̀a, á nue à ne ńnáa ndǎg mbwo Ssé mǒ. Nyìŋ gẅie à piŋ tè gyá kɔ̀ɔkɔ́ɔ ḿpfɛ́ pfɛ́ wɔ́, à tè pfɛ́ pú’u, á gwɔ́ pɔ́ lélɔg ńgu’te Cʉ̀apʉ̀a. Á giŋé ńne ńnáa yé ndǎg mbwo Ssé.

⁷ Á zɔɔn ńgwaa gwɔ́, àtsɔ̌ nyìŋ wege tè gwaa gwɔ́ wó á gwɔ́ légÿo mmó gie á poŋo yé wɔ́, à tsɔ̌ nyìŋ piŋ ńké tè gwɔ kwé á gwɔ́ légʉa ńgÿo mmó gie á poŋo yé wɔ́.

⁸ Pege gwaa gwɔ́ wó á gwɔ́ pɔ́ ngie pege ge gwɔ́ shúm Cʉ̀apʉ̀a, ńgwɔ kwé á gwɔ́ pɔ́ ngie pege ge gwɔ́ shúm Cʉ̀apʉ̀a. Pú’u la, pege lɔɔn ńgwɔ́ pɔ́ ntentʉ́ lo, mbà pege gwɔ́ pɔ́ pʉ̀a Cʉ̀apʉ̀a, ńkwé kwé lo, mbà pege gwɔ́ pɔ́ pʉ̀a Cʉ̀apʉ̀a.

⁹ Kristo la zɔɔn ńkwé ḿbiŋ ńzím légwɔ́ gie à ge gwɔ́ Cʉ̀apʉ̀a mepfó mbɔɔ we pʉ̀a pie pɔ́ ée ntentʉ́.

¹⁰ Pá’ áa pá’ɔɔn la, gù, mélà’a kɔ́ ɔ̀ gíŋe ńtúu *lɔ̌’ fɛ́ gú? Gù jú mélà’a kɔ́ ɔ̀ gíŋe ńkʉ́e fɛ́ gú? Pege metsèm zɔɔn ḿbú ńgẅiin lélá’ ńcʉa mvfò Ssé à ŋaga wégè.

¹¹ Á nue áa tsɛ̀ɛ ŋwà’ne Ssé, ńgwɔ́ ngie: Mèŋ Cʉ̀apʉ̀a gẅie aa ntentʉ́ n gɔ̌ɔn ngie: Pʉ̀a mesoŋ tà ḿmag ge lá’ kẅí’te mvfò mèŋ. Wɔ́ɔwɔ́ɔ tsɔ́’ ncwò we, éshʉashʉa ńzẅíŋ ngie mèŋ n gee Ssé.

¹² Pege lɔgɔ pá’ɔɔn ńgyá ngie wɔ̌wɔ́ɔ tsetsɛ̀ɛ pege wɔ́ ge lá’ tyé mvfò Ssé, kwà’ yé zɔ píte ncwò wé ná pá’ à kɔ̌ɔn ńgÿo.

Tà nyìŋ gÿo fɛ́ we gwe ssé

¹³ Pú’u, tà pege gíŋe ńŋag mennɛ́ mégè. Ammó gie pi gẅiin légÿo á gwɔ́ pɔ́ pá’ pi ge pɔ́ɔn légÿo tsɔ́ mmó gie fɛ́ gẅi ge kwɔɔnte mǒ à tsóte yé à gÿo nò tepòŋ.

¹⁴ Mèŋ n ne ńzsé, tá ńdɔgɔ pɔ́ pá’ mèŋ n da nnɛ́ ná Cʉ̀apʉ̀a Yěsô, ńnyɛte ńzsé ngie atsɔ́ mmó té wó gie á pu’ ssé ńgẅiin *lɔ̌’ wɔ́. Tá ńké ńgwɔ́ gie nyìŋ lɔɔn ne ńkwaŋa ngie *lɔ̌’ áa nà tsɔ́ mmó, mbà á ge gwɔ́ nà yé twó à *lɔ̌’ gwɔ́ nà yɛ̌ mmó.

¹⁵ Pú’u, á lɔɔn ńgwɔ́ gie ńgwɔ́ ɔ̀ cʉa ná nò mmó gie ɔ̀ pfɛ́ɛ, ńgÿo mbùm fɛ́ gù kÿo, mbà ɔ̀ tè gíŋe ńgÿo ná ntí gie ɔ̀ lɔgɔ ńkwoŋo fɛ́ gù wɔ́. Tè lɔgɔ nò mmó léjÿó ńgÿo fɛ́ gù gẅie Kristo la kwé nà twó yé kúu pyé,

¹⁶ mbɔɔ légÿo mmó gie mé ge cʉa mǒ, éshwóŋte ná gù, tà mbɔɔ pá’ ɔ̀ lɔɔn ńzsé jú pɔ́ ngie yɛ̌ mmó áa mbòŋ.

¹⁷ Á zɔɔn ńgwaa gwɔ́, anò *lefùɔ Ssé té nò shúm léjÿó kà nò melù’ wɔ́ wɔ́. Anò *lefùɔ Ssé á gwɔ́ pɔ́ légÿo menò mie é fóo mbwo Zẅìge Ndʉalʉ̌a. Á gwɔ́ pɔ́ légÿo menò mie ée ndʉŋ ndʉŋ mvfò Ssé, ńgwɔ́ léńnéŋe lê sẅéte, ńgwɔ́ léńnéŋe nê lekág.

¹⁸ Nyìŋ lɔɔn fa’a fà’ Kristo lê yɔɔn ntí, mbà nò yé ge poŋ Ssé, epʉ̀a mesoŋ piŋ ńná mekù’ ngàŋ.

¹⁹ Pú’u la, pege fa’a mmó gie á ge gÿo pege ńnéŋe ńnéŋe lê sẅéte, ḿbiŋ ńkẅi’i ńtóonte mennɛ́ mégè ná lezáb ntʉ́m nà Ssé.

²⁰ Tè cʉŋte fà’a Ssé ńtí nò mmó léjÿó. Áa nénʉ́ ngie *lɔ̌’ té pu’ ssé ńgwɔ́ nà tsɔ́ mmó léjÿó wɔ́, tá’ á pÿɔ́gɔ ná nyìŋ lé jÿó tsɔ́ mmó gie pʉ̀a ge gyá é kwɔɔnte mǒ gwe ssé.

²¹ Ammó gie áa mbòŋ, aa lélʉ’ʉ kɔ̀ɔkɔ́ɔ gie ńgwɔ́ fɛ́ gù kwɔɔnte mǒ ńgwe ssé, kà ńgwɔ́ á gwɔ́ pɔ́ lépfɛ́ mbab wɔ́, kà lénú melù’ wɔ́.

²² Ɔ̀ lɔɔn ńgʉa ná sɔɔn shúm ńzsé ngie kɔ́ tsɛ̀ɛ ntʉ́m gu wɔ́, pi Ssé zɔ̌ zsé. Ashÿó mbòŋo aa nyìŋ gẅie ntʉ́m wé té sá’a yé nà mmó gie à gee ńgÿo wɔ́.

²³ Tá’ nyíŋ lɔɔn ḿmʉ́’te nà mmó tà á jÿó, ńké ńjÿó, mbà à gwě ntsaŋ mvfò Ssé. Á nue à kaa gÿo pá’ à zsě ngie nò Ssé ne ńzɛ́te wɔ́. Nyìŋ lɔɔn ńgwɔ́ gÿo mmó ńne ḿmʉ́’te, mbà à gÿo nò tepòŋ.