Ŋwà’ne Ngyà jʉ’ 8 - Nouveau Testament en Ngienboum

Ngʉ̀ngʉ̀ ye sɔɔn mbʉ́a

¹ Mûɔ *Njʉ̀njÿò la gwɔ́ tà nyɛ́’ɛ lìi nŋwá’ nà jʉ’ mbɔ́ɔntè Sɔɔn mbʉ́a, ejʉ’ pú ńdáŋte tÿǒ lepwó lê kěm nà mmó minẅid móm ntá.

² Mèŋ n gyá mé ná mentàŋ Sɔɔn mbʉ́a á mbwo *mecÿɔ́’ Ssé sɔɔn mbʉ́a pie pɔ́ ée ntyé mvfò Ssé.

³ Atsɔ̌ *cÿɔ́’ Ssé tó ńtyé ngʉ̀ŋe jʉ’ gie mé tuɔ shúm gyě wó, ńgẅiin mmó gie mé ńnéŋe mmó gyě tsoló ńtuɔ. Á gwɔ́, mbà mé la lɔgɔ tʉ̌ gɔ̂l ńnyɛte. Mé náa laméndɔ́ɔn mbwo yé tà á gyɔ́ɔn gyɔ̌ɔn pá’, à ge temte mesẅíŋtè pʉ̀a Ssé mǒ, é tuɔ jʉ’ gie mé nuŋe pwɔ́’ wó, é náa mbwo Ssé. Yɛ̌ jʉ’ gwɔ́, mbà mé la lɔgɔ tʉ̌ gɔ̂l ńnyɛte. Á gwɔ́ mvfò lʉŋe lefùɔ.

⁴ Ndyé melaméndɔ́ɔn lâ mesẅíŋtè pʉ̀a Ssé fó mbwo *cÿɔ́’ Ssé ńkwɔ́’ ńgʉa ne mvfò Ssé.

⁵ *Cÿɔ́’ Ssé piŋ ńkaa mmó gie mé tuɔ shúm gyě tsoló, ńnéŋ mmɔ̌g gẅie éfóo jʉ’ gie mé nuŋe pwɔ́’ wó tà é lúe, á zé’e ḿma’a ndùmo ssé tsetsá’. Lefàŋ vɛ́te. Mé jú’ mengyè, ńgyá menně mbʉ̀ŋ. Atsetsá’ ńcʉ’e.

Mentàŋ

⁶ *Mecÿɔ́’ Ssé pie pɔ́ la gẅiin mentàŋ sɔɔn mbʉ́a la, pɔ́ nyɛte mbùm yɔb pá’ pɔ́ gee ńtóŋ mentàŋ ŋwɛ́.

⁷ Ndùŋ mvfò tóŋ wé ntàŋ. Mé ma’ megẅì lê mmɔ̌g á ndùmo ssé tsetsá’. Á gwɔ gwɔ́ mbà mé temté metse mǒ. Tà’ nzsè á nà ndùmo ssé tsetsá’ nzsè tá, pú shÿó lê metÿǒ, lâ legǐ gẅie à ne sẅéte.

⁸ Mbɔ́ɔntè yépʉ́a tóŋ wé ntàŋ. Etsɔ́ ntí máamáa lekwɛ́ sie mé těm mmɔ̌g mǒ, mé zé’e ḿma’a tsɛ̀ɛ ntse té pàa. Tà’ nzsè ntse té pàa nà menzsè méntá sele ńcʉ́’ metse.

⁹ Tà’ nzsè ná shúm sie ée ntse tà ńŋele ŋele á nà nzsè tá pú ńdége. Tà’ nzsè nà mestíma nzsè tá pú ńtágte.

¹⁰ *Cÿɔ́’ Ssé mbɔ́ɔntè yétá tóŋ wé ntàŋ. Atsɔ̌ máamáa cÿɔ́’ saŋ fóo lefàŋ ńgwe, ńne ńkÿó pá’ máamáa nkà’ mmɔ̌g gẅie mé lǐɛ la, ńgwe pú’u, ná tà’ nzsè nà memí nzsè tá tà mbɔɔ ná mesá’a ntse.

¹¹ Lezíŋ wɛ̌ cÿɔ́’ saŋ gwɔ́ lé melẅe mie ée mecÿɔ́b, tà’ nzsè ná mentse nzsè tá cʉ́’ melẅe ŋwɛ́ mie ée mecÿɔ́b. Epʉ̀a mesoŋ tà ńgyɔ́ɔn kwéte ńtí pá’ pɔ́ nǔ wɛ̌ ntse gẅie é cʉ́’ʉ ńdẅe lẅe.

¹² *Cÿɔ́’ Ssé mbɔ́ɔntè lekùa tóŋ wé ntàŋ. Ammó cʉa ná tà’ nzsè lejÿɔ́g nèm á nà nzsè tá, ńcʉa ná tà’ nzsè lejÿɔ́g saŋ á ná nzsè tá, ńcʉa ná tà’ nzsè mecÿɔ́’ saŋ á ná nzsè tá légwɔ́ gie pɔ́ ge cʉ́’ʉ lékyɛ’ jʉ’, tà’ nzsè pyé mǒ á nà nzsè tá, mbɔɔ pá’ fʉ̀’e zsó ge pyé tà’ nzsè nèm, afʉ̀’e lêtsẅɛ́’ à gíŋe ḿbyé yé tà’ nzsè ná saŋ lâ mecÿɔ́’ saŋ á nà nzsè tá.

¹³ N nyé ńdíe lǐe, ńjú’ atsɔ̌ máamáa gúm ndóŋ gẅie à la ne ńzie tàa tÿǒ á ne ńgɔɔn nê ngyè tetʉ́ʉ ngie: Pi ee pà shÿó tepòŋ. Pi ee pà shÿó tepòŋ. Pi ee pà shÿó tepòŋ. Pi pʉ̀a mesoŋ pie ée ndùmo ssé tsetsá’, ńtí ngyè mentàŋ mie *mecÿɔ́’ Ssé méntá nyé tá ńgee ńtóŋo.