Ŋwà’ne Ngyà jʉ’ 5 - Nouveau Testament en Ngienboum

Anò ŋwà’ne pɔ́ nò mûɔ Njʉ̀njÿò

¹ Mèŋ m biŋ ńgyá nyìŋ gẅie à la ńnéŋe nà lʉŋe lefùɔ la, á gẅiin tà’ shʉ̀a ffo ŋwà’ne á nà pwó yé ye tʉ̀, mbà mé la ŋwe’e mmó mǒ, á nzèm ntsèm, ńkáte, ńdɔgɔ lìi nŋwá’ ńdɔg ńdyɛte nà mejʉ’ sɔɔn mbʉ́a.

² N gíŋe ńgyá tsɔ̌ *cÿɔ́’ Ssé gẅie à gẅiin metʉ̀, á gɔɔn lê ngyè tétʉ́ʉ ngie: Tà nyìŋ aa wó gẅie à lɔɔn ńgwɔ́ á ku’u nyìŋ gẅie ńgwɔ́ á nyɛ́’te lìi nŋwá’, ńkyɛ́’ɛ ŋwà’ne yɔɔn?

³ Ńgɔɔn pú’u, mé té gyá nyìŋ fó tÿǒ lepwó, kà ndùmo ssé tsetsá’ wɔ́, kà tsɛ̀ɛ tsetsá’ wɔ́, ńku’u nyìŋ gẅie ńgwɔ́ á kyɛ́’, ḿbiŋ ńdíe mmó gie áa tsoló wɔ́.

⁴ Mèŋ n gyá pú’u, ńzye lélʉa tɛ’, mélà’mie mé kaa gyá nyìŋ gẅie à ku’u lékyɛ́’ɛ tà’ shʉ̀a ffo ŋwà’ne ŋwɛ́, ḿbiŋ ńdíe mmó gie áa tsoló wɔ́.

⁵ Tá tsɔ̌ nyìŋ ná melÿò pá tó ńgɔɔn né mèŋ ngie: Tè gíŋe ńdʉa. Nyìŋ aa ssé. Pú’ ntʉ̀ gẅie à fóo ná tsìŋe ndá Jẅida, é lejÿɔ́g mmó sie é fóo ná lenŋàŋ fùɔ Ndavíd, à kéen ńdÿɔ́’ ncù tà ńcʉa nò tepòŋ. À ge lɔg pú’u, é ku’u nyìŋ gẅie ńgwɔ́ á kyɛ́’te lìi nŋwá’ gie mé la lyɛte nà mejʉ’ sɔɔn mbʉ́a, é piŋ kyɛ́’ɛ tà’ shʉ̀a ffo ŋwà’ne.

⁶ Ńgɔɔn pú’u, mèŋ n deen ńké ńgyá mûɔ *njʉ̀njÿò tyé tsetsɛ̀ɛ lʉŋe lefùɔ, á tsetsɛ̀ɛ menɔ̀ɔn lekùa, mbɔɔ tsetsɛ̀ɛ melÿò, ńgwɔ́ pɔ́ pá’ fʉ̀’ gie mé la shʉ́ʉ lóŋ we la. Mendóŋ gwɔ́ twó yé sɔɔn mbʉ́a. Menÿɔ́g mé gwɔ́ sɔɔn mbʉ́a ńdɔgɔ ńgwɔ́ mezẅìge sɔɔn mbʉ́a mie ée me Ssé, é mie e Ssé ne ńtúmo wɔ́b ngwòŋ jʉ’ ntsèm ndùmo ssé tsetsá’.

⁷ Mûɔ *Njʉ̀njÿò tóo lejʉ́ŋ nyìŋ gẅie à la ńnéŋe nà lʉŋe lefùɔ la, ńkẅé ŋwà’ne ŋwɛ́ gie à la gẅiin nà pwó yé ye tʉ̀.

⁸ Mûɔ *Njʉ̀njÿò la kẅé ŋwà’ne tà ńgẅiin, menɔ̀ɔn pá lekùa, mbɔɔ melÿò pɛ̌ ntsɔ̀b lekùɔ lê móm mbʉ́a kẅí’te mvfò yé. Awɔ̌wɔ́ɔ ná pɔ́b wɔ́ gẅiin tsɔ̌ ntí kekÿɛ̀ mbɔɔ mentú’ mie mé la lɔgɔ tʉ̌ gɔ̂l ńnyɛte, lamendɔ́ɔn gwɔ́ tsoló tà ńdúe, ńdɔgɔ ńgwɔ́ mesẅíŋte pʉ̀a Ssé.

⁹ Melÿò pá, pâ menɔ̀ɔn pá ne ńzɔbɔ zɔ́bɔ ntsè ye sẅé ńgɔɔn tsoló ngie: Ɔ̀ ku’u nyìŋ gẅie ńgwɔ́ ɔ̀ kẅé ŋwà’ne, ńku’u nyìŋ gẅie ńgwɔ́ ɔ̀ nyɛ́’te lìi nŋwá’ gie mé la lɔg ńdyɛte. Mé la zẅé gú ńdɔg ńnuŋe pwɔ́’ Ɔ̀ la pfɛte metse mú ńdɔg ńcu’ pʉ̀a, ńcu’ tà mbɔɔ pʉ̀a pie ée ná yɛ̌ ngẅɛ̀ ndá wɔ́, tà mbɔɔ pʉ̀a pie é shwóŋó yɛ̌ shwóŋè wɔ́, tà mbɔɔ yɛ̌ ntí wɔ́, tà mbɔɔ pe wɛ̌ ngwòŋ wɔ́, ńcu’u wɔ́b pú’u, pɔ́ piŋe mbwo Ssé.

¹⁰ Ɔ̀ la lɔgɔ wɔ́b ńgÿo pʉ̀a pie ée tsɛ̀ɛ nò *lefùɔ Ssé, ńgíŋe ńdɔgɔ wɔ́b ńgÿo pànuŋe pwɔ́’ pá’ pɔ́ ge fa’a mbwo Ssé yege. Mbɔɔ pá’ pɔ́ ge gÿo sá’ pʉ̀a ndùmo ssé tsetsá’.

¹¹ N nyé ńdíe lǐe, ńjú’, ngyè *mecÿɔ́’ Ssé, pɔ́ gwɔ́ mentsá’ tà ngwɔ́ mé le sáŋ ńzsé nzẅìŋ wɔ́, mbà pɔ́ tÿɔ’ɔ́ lʉŋe lefùɔ, mbàa menɔ̀ɔn pá lâ melÿò pá, ńnéŋe soŋ,

¹² ńne ńzɔbɔ ńgɔɔn ngie; Mûɔ *Njʉ̀njÿò gẅie mé la zẅé yé la, à ku’u nyìŋ gẅie à lɔɔn ńgwɔ́ mé ná metʉ̀ né yé, ńná shúm né yé, ńnáa zse nò né ye, ńná ngʉ̀’ né yé, ńná mekù’ né yé, ńnáa legú’ né yé, ńzɔb lezíŋ sé.

¹³ Mèŋ n gíŋe ńjú’, akɔ́ɔkɔ́ɔ gie e Ssé la nyɛte, á gie áa tÿǒ lepwó, á gie áa ndùmo ssé tsetsá’, á gie áa tsɛ̀ɛ tsetsá’, á gie áa tsɛ̀ɛ ntse té pàa tà mbɔɔ kɔ̀ɔkɔ́ɔ gie áa tsɛ̀ɛ njÿó wɔ́, á ne ńzɔbɔ ńgɔɔn ngie: Mé zɔb lezíŋ, ńgÿo mekù’ ńnáa legú’, ńnáa lesá’ njÿó á mbwo nyìŋ gẅie à ńnéŋe nà lʉŋe lefùɔ, mbɔɔ mbwo mûɔ *Njʉ̀njÿò á nà ngù’ nkɔ́ɔn nê nkɔ̌ɔn.

¹⁴ Mé zɔb pú’u, menɔ̀ɔn pá lekùa lêen ńké ngie *Amen. Melÿò pá lêen ńké ńkẅí’te ssé, ńgu’te Ssé.