Ŋwà’ne Ngyà jʉ’ 18 - Nouveau Testament en Ngienboum

Anò ná pá’ Mbabilonia la gwe

¹ N gyá sɔɔn shúm tà ńtsẅé jʉ’, e Ssé gíŋe ńnyɛ́’ nÿɔ́g mɔ́ɔn, n gyá wetsɔ̌ *cÿɔ́’ Ssé fó tÿǒ lepwó sẅɛ́’, e sé lefuɔ fáŋ tɛ’, we shʉ́shÿɔ́g pú ńkyɛ’ɛ tsetsá’ ntsèm.

² Á lɔg ngyè tetʉ́ʉ ńgɔɔn ngie: À kéen ńgwe ssé. N gɔ̌ɔn ngie à kéen ńgwe ssé. N gɔɔn máamáa tÿǒsoŋo Mbabilonia. Mbabilonia kéen ńcʉ́’ mbʉ̀a *messé tepòŋ, ńcʉ́’ nkʉ̀a mezẅìge tepòŋ ntsèm, mbaa ye meshʉ́ŋ pie nzse ée ná pɔ́b, á lépfɛ́, mé piŋ tè nò yɔ́b kwòŋ,

³ ńgwe ssé pú’u, á nue, mengwòŋ ntsèm kéen ńnú melù’ mpfwɔ́’ mé tɛ’, á nue pâ mefùɔ ndùmo ssé tsetsá’ kéen ńgÿo mpfwɔ́’, mbɔɔ pá’ pàtáŋa metʉ̌a pie ée ndùmo ssé tsetsá’ kéen ńcʉ́’ megàŋ nkáb, ńzẅɛ́’ɛ pá’ à ka gẅiin shúm kẅìŋ é gyɔ́ɔn tɛ’.

⁴ N jú’ yetsɔ̌ ngyè fó tÿǒ lepwó ńne ńgɔɔn ngie: Epʉ̀a pɔ́ɔn, pi fó tsɛ̀ɛ yɔɔn tÿǒsoŋo ńkẅɛ, ḿbɔ́gɔ gẅi légÿo menò tepòŋ pá’ yé, ńzsé ngie ngʉ̀ngʉ̀ ntí ntí gie e ge kúu ná yé e tè kúu gẅi wɔ́.

⁵ Ngʉ̀ngʉ̀ ntí ntí ge kúu yé, á nue à kéen ńcub menò tepòŋ á ná metsɔ́ cub tà é kwɔ́’ tà ńkúu tÿǒ lepwó. Mbɔɔ pá’ e Ssé kéen ńkímte menò mé mie à gwǎ ńgÿo, é té tyé ndʉŋ ndʉŋ wɔ́.

⁶ Pi gíŋe ńgÿo ná yé pá’ à ka zɔɔn ńgÿo yé ná petsɔ́ pʉ̀a. Pi cʉ́’ʉ légÿo, ammó gie à ka gÿǒ ná petsɔ́ pʉ̀a tà’ legʉ̀a, pi gÿo ná yé ngʉ̀a mbʉ́a. Ntú’ gie à ka néŋ melù’ ntʉ̀ tʉ tsoló, ńná né petsɔ́ pʉ̀a, pí néŋ mé tsoló é gwɔ́ mie é tʉ ńcʉa mɛ̌ ngʉ̀a mbʉ́a.

⁷ À lɔɔn ńgwɔ́ gie à ka fǎŋ lêkɔ́ wɔ́, ńgwɔ́ tsɛ̀ɛ shúm kẅìŋ lêkɔ́ wɔ́, pi ná ye ngʉ̀ngʉ̀ pɔ́ nzẅìŋó, ńgíŋe ńgÿo á lʉa legwé pɔ́ nzẅìŋó. Á nue à ka ne ńgɔɔn tsɛ̀ɛ ntʉ́m wé ngie: À ńnéŋe nà lʉŋe memáfùɔ, ngie à tè mpfɔ̌g wɔ́, ngie à tè lá’a tsɔ́ lyɛ̌’ tá lʉa legwé wɔ́,

⁸ pá’ à ka ne ńgɔɔn pú’u la, ngʉ̀ngʉ̀ ntí ntí gie mé la nyɛte ńtí yé, e ge tóo ná yé pɔ́ tà’a lyɛ̌’, é gwɔ́ lékwé, é gwɔ́ lélʉa legwé, é gwɔ́ gwáŋa, mé piŋ ńdɔg mmɔ̌g ńtuɔ yé. Á nue Cʉ̀apʉ̀a Ssé gẅie à ŋaga yé, à gẅiin metʉ̀.

⁹ Pú’u la, mefùɔ pie ée ndùmo ssé tsetsá’ ntsèm, é pie pâ pɔ̌ kɔ́ɔn ńzɔ́gɔ ńgÿo mpfwɔ́’, ńzɔ́gɔ ńgẅiin shúm meshùm, pɔ́ kɔ́’ legwé ńdʉa yé, á fʉ̀’ gie pɔ́ ge gÿo gyá ndyé mmɔ̌g kwɔ́’, à ne shÿó.

¹⁰ Pɔ́ ge gÿo tyé pɔ́ tàa ngʉ̀a shʉ̀shʉ̀a, á nue pɔ́ ne ḿbɔ́gɔ ngʉ̀ngʉ̀ gie e kǔ yé, é ne gɔɔn ngie: Ɔ̀ɔ shÿó tepòŋ. Ɔ̀ɔ shÿó tepòŋ. Gù máamáa tÿǒsoŋ Mbabilonia. Ɔ̀ kaa wó tɛ’. Ndòon jù gwǒon gú, é ge gwaa cʉa tà’ áwà mbɔɔ mǎg.

¹¹ Pàtáŋa metʉ̌a pie ée ndùmo ssé tsetsá’ ge gÿo ńnéŋe tetʉ́a legwé ne lʉa, á nue mé cʉ́’ʉ ńjúu shúm sie pɔ́ lɔgɔ stima ńkaa ńdɔgɔ ńtóo wɔ́,

¹² é shúm pá’ tʉ̌ gɔ̂l, mbɔɔ tʉ̌ nkáb. Eshúm pá’ metóon pie ée pe tʉ̀ nzẅìŋ, mbɔɔ metɔgɔ́ tsyé, mbɔɔ menzsǒ mie é fɔ́g tɛ’, mbɔɔ mie é paŋ paŋ, mbɔɔ menzsǒ meselɛg, mbɔɔ mie é paŋa lê gʉm, mepeláŋ mie éfóo ná tsɔ̌ ntí tÿǒ gie mé té lwo ńgyá wɔ́, mbɔɔ yɛ̌ ntí mmó wɔ́ gie mé la lɔg lesoŋ shÿɔ́ɔ ńnyɛte, mbɔɔ yɛ̌ ntí mmó wɔ́ gie mé lɔgɔ tÿǒ gie nzẅìŋ ée mǒ tɛ’ ńnyɛte, mbɔɔ gie mé lɔgɔ tʉ̌ nʉ̀ ńnyɛte, mbɔɔ gie mé lɔgɔ kwà’ tʉ̌ ńnyɛte, lâ gie mé lɔgɔ tsɔ̌ ntí tóon gie mé tóŋo lé marbre ńnyɛte.

¹³ Ammó pá’ tsɔ̌ ntí shúm nná’ pá’ gie mé tóŋo lé kanɛl mbɔɔ laméndɔɔn ntí ntí, lê lìi lâ tsɔ́ shúm sie mé tuɔ, lê melù’, lê mèvɛ, lê faline ntí ntí, lê mefòŋ, lê *menjʉ̀njÿò, lê melÿóon lâ mekélêg, lâ pu’ ye ńjú jǔ mbɔɔ ye ncù.

¹⁴ Pàtáŋa métʉ̌a ne ńgɔɔn ná tÿǒsoŋ ngie: Eshúm sie ɔ̀ ka ne ńtsɔ́ɔn légẅiin pǔ shÿó mbʉ̀a gù tà mag. Eshúm ntsèm sie ɔ̀ ka gẅiin, é gwɔ́ sie mé lɔɔn ńgẅiin tepòŋ é cʉŋte, mbaa sie é ńnéŋe neŋé, é pǔ maga mbwo gù, mé piŋ tè lá’ gíŋe gyá sɛ̌ shúm wɔ́.

¹⁵ Pàtáŋa metʉ̌a pie pɔ́ la sẅiŋ pɔ́ shúm sɔɔn mbwo yé tà ńdɔg ńcʉ́’ megàŋ nkáb ge gÿo tyé pɔ́ ngʉ̀a shʉ̀shʉ̀a, é ne pɔ́gɔ ngʉ̀ngʉ̀ gie e kǔ yé, é ne kɔ́’ɔ legwé lʉa,

¹⁶ é ne gɔɔn ngie: Ɔ̀ɔ shÿó tepòŋ. Ɔ̀ɔ shÿó tepòŋ. Gù máamáa tÿǒsoŋ gẅie ɔ̀ kɔ̌ɔn ḿma’a meféfɔ́gɔ nzsǒ, ḿma’a mie é paŋ paŋ, lâ mie é paŋa lê gʉm, ńdɔgɔ shúm gɔ̂l ńkẅiŋe mbùm jù, mbɔɔ metóon pe tʉ̀ nzẅìŋ, mbɔɔ metɔgɔ́ tsyé,

¹⁷ mé lɔ̌g pɔ́ tà’ nèm wémɔ’ɔ́ ńcʉŋte kɔ̀ɔkɔ́ɔ fù’ wɔ́ gie á kaa mbwo gù Ngwòŋ pʉ̀a metsèm pie pɔ́ shwóŋó mestíma, ngwòŋ pàkúu stima ńdɔg ńgʉa jʉ’, ngwòŋ megàŋa fà’ tsɛ̀ɛ stíma, ngwòŋ pàgiŋe ntse ńtáŋa sɔ̌ɔn, tyé pɔ́ ngʉ̀a shʉ̀shʉ̀a,

¹⁸ ńne ńgyá ndyé mmɔ̌g gẅie éfóo ná tÿǒsoŋ pá’ á ne shÿó, ńne ńga’te ńgɔɔn ngie: Yɛ̌ tÿǒsoŋ kaa gwɔ́ gie á lɔɔn ńgwɔ́ á gwɔ́ pá’ máamáa tÿǒsoŋ?

¹⁹ Pɔ́ la ne ńŋwaa pfepfɔ́b ńdɔgɔ ńdɔɔn twó sɔ́b, ńne ńkɔ́’ɔ legwé ńga’te ńdʉa ńgɔɔn ngie: Ɔ̀ɔ shÿó tepòŋ. Ɔ̀ɔ shÿó tepòŋ. Gù máamáa tÿǒsoŋ gẅie ɔ̀ ka gẅiin nkáb tɛ’, ḿbiŋ ńne ńjú’u mboŋó, ńgíŋe ńgÿo epʉ̀a pie pɔ́ gẅiin stíma tsɛ̀ɛ ntse té pàa cʉ́’ megàŋ nkáb, á yɛ, mbà ɔ̀ lɔ̌g pɔ́ tà’ nèm wémɔ’ɔ́ ńcʉ́’ʉ nkwòŋo tsẅɛ lɛ.

²⁰ Mé ne ńdʉa Mbabilonia, tá’, á gʉa ná pi tÿǒ lepwó, pi kág kág ńtí pá’ á gwě ssé. Mbɔɔ pi pʉ̀a Ssé, pia megàŋ ntúm lâ pà *ntsẅì nkʉ̀ Ssé, pi kág gí. Á nue e Ssé ŋagá yé nà nò tepòŋ gie á ka gÿo ná pi.

²¹ Atsɔ̌ *cÿɔ́’ Ssé gẅie à gẅiin metʉ̀ tɛ’ lêen ńké ńkaa tsɔ̌ máamáa tóon, á zɛ pá’ lùŋo mesaŋá la, ńgwaa zé’e ma’a tsɛ̀ɛ ntse té pàa, ńne ńgɔɔn ngie: Á lɔɔn ńgwɔ́ gie mé ze’é wɔɔn tóon, ḿma’, á gwe ntse lê tʉ̀ lêkɔ́ wɔ́, mbà áa ndʉŋ ndʉŋ pá’ mé ge gÿo zé’e gù Mbabilonia, máamáa tÿǒsoŋ, é ma’, ɔ̀ gwe jú pú’u. Mé piŋ le lá’ ńgíŋe ńgyá gú wɔ́.

²² Mbɔɔ pá’ mé téen ńdá’a ńgíŋe ńjú’u ngyè pàpú’ tsɔ̌ ntí kèkÿɛ̀, á mbʉ̀a gù wɔ́, é ké le ye pàpú’ leluŋó lâ ye pàtóŋo màndèle mbɔɔ ye pàtóŋ ntaŋ á mbʉ̀a gù jú’. Mé le gíŋe ńgyá tsɔ̌ ngàŋ levfò mbʉ̀a gù wɔ́. Tà mbɔɔ gẅie à fa’a pɔ́ yɛ̌ fà’ wɔ́. Mé le gíŋe ńjú’ pá’ mé lɔgɔ lùŋo ńgwɔ’ɔ mmó mbʉ̀a gù wɔ́.

²³ Akyɛ̀’ gie á fóo ná lâm á téen ńdá’a ńgíŋe ńkyɛ’ɛ jʉ’ mbʉ̀a gù wɔ́. Mé ké le gíŋe ńjú’ ngyè ndǔm nzwě ngʉ̀ wɔ́, é ké le ye nzwě ngʉ̀ jú’. Mé lě ńjú’u wɔ́ pú’u, á nue pʉ̀a pie pɔ́ kɔ́ɔn ńtáŋa metʉ̌a gù, é kaa memáa pʉ̀a ndùmo ssé tsetsá’. Ɔ̀ lɔg mekàŋ mú ńdʉte mengwòŋ ntsèm.

²⁴ Mbɔɔ nue mé ka tóo mbʉ̀a gù, ńgyá metse pà *ntsẅì nkʉ̀ Ssé, ńgyá me pʉ̀a Ssé mbɔɔ me pʉ̀a metsèm pie mé la zẅéte wɔ́b ndùmo ssé tsetsá’.