Ŋwà’ne Ngyà jʉ’ 17 - Nouveau Testament en Ngienboum

Anò máamáa ngàŋ mpfwɔ́’ manzwě

¹ Mèŋ m biŋ ńgyá tsɔ̌ tà’ ná *mecÿɔ́’ Ssé sɔɔn mbʉ́a pie é la gẅiin mentú’ sɔɔn mbʉ́a la tó ńgɔɔn né mèŋ ngie: Tóo, mèŋ n ge nyɛɛ gú pá’ Ssé ge gÿo néŋ ngʉ̀ngʉ̀ twó máamáa ngàŋ mpfwɔ́’ manzwě pú’u. Á máamáa tÿǒsoŋ gie mé la kwɛ́ɛ ngʉ̀ŋe mentse tà ńgyɔ́ɔn la.

² Pâ mefùɔ ndùmo ssé tsetsá’ métsèm kéen ńgÿo mpfwɔ́’. Epʉ̀a mesoŋ pie ée ndùmo ssé tsetsá’, nú melù’ mpfwɔ́’ mé tà ḿbʉ́a.

³ A Zẅìge Ndʉalʉ̌a tó ńjʉʉ wɔ̀ɔn, *cÿɔ́’ Ssé wa kaa wɔ̀ɔn ńdɔg ńgʉ́a né tsɔ̌ nkwòŋo tsẅɛ. Mèŋ n gyá tsɔ̌ manzwě ńnéŋe ndùm tsɔ̌ nɔ̀ɔn, á paŋa lê gʉm, mezíŋ lɔg ńzoonte Ssé pú ḿbáte mbùm nɔ̀ɔn ŋwɛ́, e twó sé gwɔ́ sɔɔn mbʉ́a, mendóŋ mé gwɔ́ legém.

⁴ Manzwě áwɛ̌ ma’ menzsǒ tʉ̀ nzẅìŋ, é paŋa lê gʉm. Eshúm sie à lɔgɔ ńkẅiŋe mbùm ye, é gwɔ́, mbà mé la lɔgɔ tʉ̌ gɔ̂l, lâ metóon mie ée me tʉ̀ nzẅìŋ, laa metɔgɔ́ tsyé ńdɔg ńnyɛte. Á gẅiin tsɔ̌ ntú’ mbwo yé, mbà mé la lɔgɔ tʉ̌ gɔ̂l ńnyɛte. Menò ncÿǒ mie éfóo ná menò mpfwɔ́’ mé gwɔ́ tsoló tà ńdúe.

⁵ Mbà mé la ŋwe’e tsɔ́ lezíŋ nà zǐ yé. Lezsě mmó gie é lɔgɔ ńgɔɔn á tʉ tɛ’. Lezíŋ ŋwɛ́ lɔgɔ ńgwɔ́ ngie máamáa tÿǒsoŋ Mbabilonia, má pà pà ngÿò mpfwɔ́’ mbɔɔ ntí ntí menò tepòŋ mie ée ndùmo ssé tsetsá’.

⁶ Mèŋ n gyá manzwě áwɛ̌, mbà à ně nú metse pʉ̀a Ssé mbɔɔ me pʉ̀a pie pɔ́ gɔɔn mmó gie pɔ́ zsé ná Yěsô nǔ tà ḿbʉ́a. Mèŋ n gyá yé ḿbú ḿmɔɔn tɛ’.

⁷ Tá *cÿɔ́’ Ssé gɔɔn né mèŋ ngie: Ɔ̀ mɔɔn kɔ́? N ge kyɛ́’ ntsèm manzwě wɛ, éshwóŋó gú, mbɔɔ ye nɔ̀ɔn gẅie etwó sé ée sɔɔn mbʉ́a, mendóŋ mé gwɔ́ legém la.

⁸ Nɔ̀ɔn gẅie ɔ̀ gyǎ lɛ, à laa wó, tá’ à ké ńcʉ́’ʉ wó wɔ́. À ge gÿo gíŋe gwɔ́ wó, éfóo tsɛ̀ɛ pÿé té lǎŋ kwɔ́’ gʉa lé jʉ’ gie à ge kúu wó é kúu pyé. Epʉ̀a pie ée ndùmo ssé tsetsá’, mbà mé la tè ŋwe’e lezíŋ sɔ́b tsɛ̀ɛ ŋwà’ne gie á gÿo mé gwɔ́ wó, tà fó fʉ̀’ gie mé la nuŋe njÿó wɔ́, pɔ́ ge gÿo gyá nɔ̀ɔn ŋwɛ́ é mɔɔn tɛ’. Á nue à laa wó, à tè gíŋe ńgwɔ́ wó wɔ́, é ké gÿo gíŋe kẅɛ.

⁹ Yɔɔn áa jʉ’ gie á zɛ́te ngie zse nò à kẅéte legyè sie nyìŋ gẅiin lélɔg ńjú’u mmó gie mé gɔɔn yɛ̌. Etwó sɛ̌ sɔɔn mbʉ́a lɔgɔ ńgwɔ́ mekwɛ́ sɔɔn mbʉ́a mie wɔɔn manzwě à ńnéŋe ndumó,

¹⁰ é gíŋe ńdɔgɔ ńgwɔ́ mefùɔ sɔɔn mbʉ́a. Epe métʉ̀a tsetsɛ̀ɛ pɔ́b kéen ńgwe, tà’ gwɔ́ nà kwɔ̀’ɔ fʉ̀’ɔɔn, wetsɔ̌ nyé té tó, à ge ké gÿo gwɔ́ tà tó, é ké le ńnéŋe tɛ’ wɔ́.

¹¹ Nɔ̀ɔn gẅie à la zɔɔn ńgwɔ́ wó, à piŋ ńcʉ́’ʉ ńgwɔ́ wó wɔ́ la, yé lê twó yé lɔgɔ ńgwɔ́ fùɔ mbɔ́ɔntè lefɔ̌ɔn, ńgíŋ ńgwɔ́ tsɔ̌ tà’ ná pe sɔɔn mbʉ́a. À piŋ ńne ńgee, légʉa ńkúu pyé.

¹² Mendóŋ legém mie ɔ̀ kě ńgyá la lɔgɔ ńgwɔ́ mefùɔ legém pie mé nyé tè ná sɔ́b lefùɔ. Tá pâ nɔ̀ɔn ge gÿo pú temte sá’a lá’ ndà’ ná tà’ nèm wémɔ’ɔ́.

¹³ Pɔ́b legém e pú ńgẅiin tà’ nkwaŋá. À gwɔ́ lépúte mɔ́b metʉ̀, pâ sɔ́b lefùɔ, ńnáa mbwo nɔ̀ɔn.

¹⁴ Pɔ́ ge ma’a Mûɔ *Njʉ̀njÿò lê ncù, tá à ké ńcʉa wɔ́b, á nue aa Cʉ̀apʉ̀a mecʉ̀apʉ̀a, ńgwɔ́ Fùɔ mefùɔ. Epʉ̀a pie à la tóŋo wɔ́b, ńtsɔ́’ɔ wɔ́b, pɔ́ zsé pɔ́ ndà’ yé, pâ pɔ̌ pú ńcʉa nɔ̀ɔn ŋwɛ́.

¹⁵ *Cÿɔ́’ Ssé gíŋe ńgɔɔn né mèŋ ngie: Mentse mie ɔ̀ ně ńgyá, é gwɔ́ ngʉ̀ŋe jʉ’ gie ngàŋ mpfwɔ́’ manzwě wa tsẅé wó la, mentse ŋwɛ́ lɔgɔ ńgwɔ́ pʉ̀a ntí ntí, ńgwɔ́ pʉ̀a menùɔ menùɔ, ńgwɔ́ ngwòŋo ngwòŋ, ńgwɔ́ meshwóŋè ntí ntí.

¹⁶ Mendóŋ legém mie ɔ̀ ně ńgyá mbɔɔ nɔ̀ɔn, pɔ́ ge gÿo pʉa ngàŋ mpfwɔ́’ manzwě wɛ̌, é pú kẅé shúm sé tà à tyé té jÿɔ́g nzsǒ, é pfɛ́ mbab nnɛ́ ye, é tuɔ pfwɔ́’ mmɔ̌g.

¹⁷ Á nue e Ssé la kwaŋa mmó ńnéŋe ntʉ́m pɔ́b pá’ pɔ́ zɔ̌ ge cʉ́’ gÿo mmó gie à la kwaŋ. Á gwɔ́ pá’ mendóŋ ŋwɛ́ legém ge gẅiin tà’ nkwaŋá, é cú’te lefùɔ sɔ́b náa mbwo nɔ̀ɔn, e gwɔ́ pɔ́ mbwo yé tà lá’ ńkú lyɛ̌’ gie ammó gie Ssé la gɔɔn á pumté.

¹⁸ Manzwě gẅie ɔ̀ ně ńgyá, á lɔgɔ ńgwɔ́ máamáa tÿǒsoŋ gie á sá’a mefùɔ pie ée ndùmo ssé tsetsá’.